O BNG lamenta que o Goberno de Rueda “mire para o outro lado mentres o sector da faba de Lourenzá se afunde”

Sonia Vidal critica que a Consellería do Medio Rural se dedique a facer campañas publicitarias promocionando un produto que non ten garantido o seu futuro

Santiago de Compostela, 19 de marzo de 2025. A deputada do BNG, Sonia Vidal, reclamou no Parlamento medidas concretas e urxentes que garantan o futuro da Faba de Lourenzá e lamentou que o Goberno de Rueda lle dea as costas a un sector que atravesa serias dificultades. Acusou á Xunta do PP de dedicarse a facer campañas publicitarias desta leguminosa con indicación xeográfica protexida mentres a súa viabilidade está comprometida.

Vidal asegurou que o ano pasado o 80% da colleita de Faba de Lourenzá quedou sen recoller debido ás dificultades derivadas das pragas, fungos, cambio climático, choivas e humidade. Como consecuencia, moitas familias viron como a súa produción quedaba sen valor e sen saída. “Se non hai colleita, para que queren vostedes facer campaña publicitaria da IXP Faba de Lourenzá, se non haberá fabas que vender? Para anunciar o que? Fume?”, preguntou, afirmando que “gobernar non é facer anuncios, é poñer cartos enriba da mesa e solucionar problemas”.

Criticou que as axudas da Xunta son “outro engano máis” porque “non chegan a todo o sector, teñen requisitos que deixan fóra a moitos produtores, non compensan as perdas reais e o proceso é lento e farragoso, e cando chegan os cartos, é demasiado tarde”, lamentou.

Sonia Vidal Lamas denuncia que esta situación non é nova e que, malia levar dous anos advertindo sobre esta crise, o goberno do PP non tomou medidas adecuadas para atallar a situación. “Agora, cando a situación se fai insostible, sacan titulares e fotos, reuníndose co sector como se fosen os salvadores da faba, pero non moveron un dedo ata agora”, sinala a deputada do BNG.

“As produtoras e produtores xa están fartas e fartos de anuncios tarde e mal e de fotos. O que queren é saber se van poder sementar este ano, se van ter semente suficiente, se van recibir compensación polas perdas do ano pasado, se van ter medios para loitar contra os fungos que lle están comendo a planta viva, ou se van quedar abandonadas outra vez”, recalcou,

“Se tan ben coñecen o sector, por que levan anos sen poñer en marcha un plan específico para a faba? Por que levan anos sen pedir máis fondos da PAC para esta produción, cando Galiza produce o 30% de todas as leguminosas do Estado, e a maior parte na Mariña?”, recriminou.

As demandas do BNG

Neste sentido, as propostas do BNG, que foron rexistradas xa hai meses, exixen “medidas concretas e urxentes para garantir o futuro da Faba de Lourenzá”: Un plan urxente de axudas directas para as familias produtoras, xa que —aclarou Vidal— o problema é presente e, sen axuda hoxe, non hai colleita mañá”. Tamén reclama programas de formación en prácticas agrícolas que axuden a loitar contra pragas e fungos, feitos por expertos no propio territorio. Pide así mesmo a dotación de máis fondos ao Centro Pedro Murias, que leva anos sen recursos suficientes para realizar investigación aplicada, fundamental para o sector. E por último, a iniciativa insta a demandar ao Estado máis fondos da PAC para que o cultivo da faba sexa recoñecido como un sector estratéxico para Galiza.

A deputada do BNG advertiu que, se o goberno do PP non apoia esta iniciativa, —como así sucedeu— “os produtores e produtoras da faba comprenderán que, malia as promesas, o PP segue mirando para outro lado mentres o sector se afunde”. “O rural está farto de promesas baleiras, e hoxe, coa súa votación, o PP terá que demostrar de que lado están”. Apelou á coherencia e á responsabilidade do goberno do PP, lembrando que “ou hai futuro para o rural, ou non hai futuro para Galiza”. “A Faba de Lourenzá non pode esperar máis”, apremou.

Na súa intervención na Comisión de Agricultura, a deputada de Lugo quixo poñer en valor o traballo e esforzo de moitas familias que, de maneira tradicional e artesanal, cultivan esta leguminosa. “A súa produción require un coidado intensivo, o que implica un labor continuo na terra: sementado, entitorado, limpeza de malas herbas, control de pragas, colleita e selección. “Este é un modelo de produción que se distingue pola súa dedicación, e non pola produción industrial, representando a esencia do rural galego”, salientou.