Medio Rural salienta que preto do 80 % do territorio da Pastoriza está concentrado

A conselleira María José Gómez reuniuse con Darío Cabaneiro, alcalde desta localidade lucense, que recibiu da Xunta máis de 700.000 euros desde 2020 para a mellora das súas infraestruturas rurais

Lugo, 16 de xullo de 2025. A conselleira do Medio Rural, María José Gómez, puxo en valor que preto do 80 % do territorio municipal da Pastoriza está concentrado. En total, son 21 as parcelarias rematadas neste concello, que, en conxunto, abranguen unha superficie de case 14.000 hectáreas, dentro dun termo municipal de algo máis de 17.500. Esta cuestión foi analizada durante unha xuntanza co alcalde desta localidade, Darío Cabaneiro.

Nesta reunión avaliáronse estes datos, que evidencian a clara vocación agrogandeira dunha localidade que se sitúa nos primeiros lugares dentro de Galicia en produción de leite e en número de explotacións gandeiras de vacún.

A reunión serviu tamén para reforzar a colaboración entre a Consellería e o Concello en materia de mellora de infraestruturas e camiños rurais. Cómpre lembrar, neste sentido, que A Pastoriza recibirá preto de 81.000 euros ao abeiro do Plan Camiña Rural para as anualidades de 2025 e 2026. Con esta achega, o orzamento destinado pola Xunta desde o ano 2020 para a construción e mellora de infraestruturas rurais neste municipio supera os 700.000 euros.

Estes fondos permitiron actuar tanto en vías municipais en diferentes parroquias como acondicionar os accesos a diversos núcleos, mediante a súa pavimentación ou a limpeza de gabias. Así, leváronse a cabo intervencións de reforma, adaptación e mellora en camiños de parroquias como Bretoña, Rigueira, A Pousada, Baltar, Cadavedo ou Saldanxe. Ademais, pavimentáronse os accesos aos núcleos das Fontes, As Maciñeiras ou O Alto, entre outros labores.