Os socialistas do Vicedo denuncian “o bloqueo do goberno municipal ao rexeitar todas as súas propostas”

A formación lamenta a actitude autoritaria do alcalde e denuncia que “votar en contra destas propostas é votar en contra da veciñanza”

O Vicedo, 31 de xullo de 2025. O Grupo Municipal Socialista do Vicedo denuncia a actitude autoritaria do goberno local, que rexeitou todas as mocións socialistas presentadas no pleno ordinario deste mércores. As iniciativas, centradas en servizos básicos como a prevención de incendios e o saneamento da auga, foron ignoradas polo PP: a primeira votada en contra e a segunda nin sequera chegou a debaterse, ao ser excluída da orde do día malia estar rexistrada en tempo e forma.

As propostas foron defendidas pola voceira Verónica Canoura, quen trasladou ao pleno as preocupacións recollidas directamente da veciñanza a través da campaña Escoitámosvos, coa que o grupo socialista percorre as parroquias do Vicedo para escoitar demandas, detectar necesidades e formular solucións reais.

Na sesión debateuse a proposta presentada polo PSdeG no pleno anterior para habilitar unha praia canina no municipio, que o PP deixara sobre a mesa para un suposto mellor estudo. Porén, nesta ocasión o alcalde votou en contra, alegando que a ordenanza municipal xa regula a presenza de cans nas praias e que, “a solución está na praia de Fomento”, incumprindo a Orden Reguladora do BOP nº 112 de fecha 19/05/2015, Art. 5. Punto 5.2.

Ante a resposta do alcalde, a voceira socialista solicitou que, cando menos, se instalase a cartelería pertinente para informar correctamente á veciñanza. O rexedor negouse, deixando claro que nin vai habilitar unha praia específica, nin vai sinalizar, nin vai modificar a ordenanza existente.

Canoura afirmou que “se hai unha ordenanza, haberá que cumprila. E se non se vai aprobar a nosa proposta, que polo menos se sinalice correctamente para informar á xente. ¿Ou para que está a normativa?”. A voceira tamén reprochou a incoherencia do alcalde ao manter a moción bloqueada no pleno anterior e agora rexeitala sen achegar alternativa real: “Se xa tiña decidido votar en contra, por que a deixou sobre a mesa?”.

A moción sobre a limpeza de parcelas próximas ás vivendas e das faixas secundarias de xestión de biomasa tamén foi rexeitada polo executivo local. O PSdeG lembra que solicitou por rexistro o plan municipal de prevención e defensa contra os incendios o pasado 14 de xullo, sen obter resposta nin acceso ao documento, nin por vía telemática nin durante a sesión plenaria. “Tiveron tempo máis que suficiente para entregalo. Preguntámonos se ese plan existe realmente no Concello do Vicedo”, denuncian.

No caso da moción para a mellora do saneamento, que propoñía un plan de actuacións para mellorar as infraestruturas nas parroquias e núcleos máis afectados do municipio, o goberno local decidiu non incluíla na orde do día. Segundo explican os socialistas, o alcalde respondeu que “se puido esperar ata agora, pode esperar dous meses máis”, o que evidencia a escasa vontade de afrontar un problema estrutural que afecta á saúde pública, ao medio ambiente e á calidade de vida.

Desde a agrupación lembran que estas mocións son peticións concretas recollidas a través da campaña Escoitámosvos. “Cando se vota en contra destas iniciativas, estase votando en contra das demandas que nos traslada directamente a veciñanza”, advirten. “Non é un non ao PSdeG, é un non aos todos os veciños”.

Outros asuntos trasladados nesta sesión foron o mantemento e reparación de beirarrúas (como as de Rosalía de Castro ou Folgueiro), a revisión da sinalización viaria en todas as parroquias, a instalación de papeleiras e baños públicos en puntos como a Praia de Xilloi ou a Casa da Cultura, ou o acondicionamento das rutas de sendeirismo e a promoción do Camiño do Mar. Tamén se propuxo estudar a creación dunha pista multideporte céntrica.

Na rolda de preguntas, o grupo solicitou información sobre a situación da luz pública conectada a vivendas particulares, o estado das pasarelas e estruturas de madeira nas praias, a planificación do alumeado, os danos na pista de pádel de Folgueiro, a rehabilitación das antigas escolas de varias parroquias (San Román do Val, Riobarba e Folgueiro) ou os proxectos de rede de saneamento desde 2001. Tamén se abordaron asuntos como a futura solución para o centro de día, o uso das instalacións municipais durante o Resurrection Fest, a coordinación ambiental cos concellos limítrofes ou a situación urbanística do PXOM, paralizado desde hai máis dunha década.

A agrupación socialista considera esencial seguir levando estas demandas ao pleno, malia que en moitos casos non se obteñan respostas claras nin compromisos por parte do goberno municipal. Neste sentido, denuncian a actitude do alcalde durante o desenvolvemento da sesión, na que houbo momentos nos que non se respectaron os tempos nin as quendas de intervención das concelleiras socialistas, dificultando o exercicio da súa labor como representantes públicas.

“Seguiremos traballando con responsabilidade, achegando propostas e representando con dignidade ás persoas que confían en nós”, afirman. O PSdeG do Vicedo agradece o apoio e os comentarios que continúa a recibir da veciñanza, e reitera o seu compromiso de traballar desde a escoita, a transparencia e a constancia, con propostas realistas e útiles para mellorar o día a día do municipio.