Villaverde aborda coa Asociaciación Nacional de Mulleres da Pesca as demandas das profesionais do mar e os desafíos actuais da actividade pesqueira

A titular de Mar puxo en valor a maior presenza das mulleres en postos de responsabilidade no ámbito empresarial, da investigación ou nas entidades sectoriais, reforzando o liderado galego no ámbito da pesca a nivel internacional

Santiago de Compostela, 24 de xullo de 2025. A conselleira do Mar, Marta Villaverde, mantivo un encontro de traballo con representantes da Asociación Nacional de Mulleres da Pesca (Anmupesca) para abordar a situación das profesionais do mar e os desafíos actuais da actividade pesqueira. A responsable autonómica enmarcou a xuntanza no diálogo fluído da Administración autonómica con todas as entidades sectoriais co obxectivo de reforzar o modelo de éxito na xestión pesqueira de Galicia sustentado na cogobernanza co sector.

A titular de Mar, acompañada polo director xeral de Pesca, Acuicultura e Innovación Tecnolóxica, Cándido Rial, e pola directora xeral de Desenvolvemento Pesqueiro, Ángeles V. Suárez, puxo en valor o papel da muller no conxunto da cadea mar-industria que xa transcende das actividades tradicionalmente feminizadas como a industria da transformación e elaborados de produtos pesqueiros, o marisqueo ou na reparación de aparellos. Así, destacou que hoxe hai mulleres liderando confrarías, ocupando postos de responsabilidade a nivel empresarial, na investigación mariña ou en postos de mando nos buques. Unha evolución á que ten contribuído os centros de formación náutica-pesqueira autonómicos impulsando un liderado feminino esencial para afrontar con éxito os retos actuais.

A responsable autonómica compartiu coas responsables de Anmupesca a necesidade de seguir afondando en políticas públicas que afonden no recoñecemento do papel da muller no sector pesqueiro como unha forza laboral estratéxica. Tamén a importancia de seguir avanzando en ámbitos como a protección social, a prevención e saúde laboral ou na conciliación. Unha tarefa, dixo, que require da implicación do conxunto das Administracións públicas. Ademais, abordaron outros asuntos de interese como a rexeneración dos bancos marisqueiros, o impulso do turismo pesqueiro, a divulgación das liñas de axuda autonómicas ou o apoio ao emprendemento feminino no ámbito da pesca nos que estreitar a colaboración entre esta entidade sectorial e a Administración autonómica.