“O goberno municipal de Ribadeo non pode pagar nin o 20% das obras de abastecemento de auga”, afirma o BNG

Ribadeo, 11 de outubro, 2025. O BNG explica que: “O PP de Ribadeo foi un auténtico especialista en disimular que a Xunta non se comprometía co noso concello. Durante moitos anos fartouse de xustificar a negativa do goberno galego a apoiar investimentos que lle correspondían polas súas competencias (a residencia de maiores, as obras de abastecemento de auga, instalacións deportivas…). Mesmo avalou as declaracións da conselleira de medio ambiente en 2017 cando afirmaba que a reforma do abastecemento de auga para Ribadeo era competencia municipal. Por aquel entón, á Xunta, e á propia conselleira, resultábanlle “incomprensíbeis” as queixas do anterior goberno municipal acerca da falta de investimento por parte do goberno autonómico. Incluso o propio Daniel Vega chegou a xustificar que, en canto que a Xunta xa destinara até 850.000€ dos Fondos de Cooperación Local á Ribadeo, o noso concello debería dedicar ditos fondos a emprender a obra de reforma do abastecemento da auga”.

“E agora que a Xunta está disposta a financiar unha obra como a reforma do abastecemento de auga para Ribadeo, o goberno municipal do PP, no canto de se felicitar por vir este investimento para o noso concello, anda á procura de chibos expiatorios para desviar a atención da responsabilidade que lle toca asumir: o 20% do investimento. Polo que se ve, agora, para o PP, xa non é competencia municipal (nin sequera no 20% que lle corresponde asumir)”, engaden.

“Non é a primeira vez que, ao longo deste mandato, o goberno municipal perdeu algunhas subvencións para abordar obras de certo calibre por non poder achegar a parte que lle correspondía como concello. E por que? Pois porque foi malgastando os remanentes de que dispoñía o concello e agora non ten liquidez nin para pagar nun prazo de tempo aconsellábel as facturas, nin tampouco para facer fronte a obrigas do concello cando se presenta a oportunidade de abordar algunha reforma importante e se conta con subvención doutros organismos”.

“Coa reforma do abastecemento de auga de Ribadeo está a ocorrer algo semellante. Ademais de querer polemizar contra o goberno da Deputación Provincial poñendo o concello de Ribadeo ao servizo da estratexia de Elena Candia na Deputación, agora tamén sabemos que lle vén como anel ao dedo a Daniel Vega montar esta polémica para así desviar a atención da carencia de solvencia económica do goberno que preside. Daniel Vega fulminou as arcas municipais e ten que disimular proxectando sobre os demais a súa responsabilidade. Ben deitou Ribadeo do esforzo inversor da Deputación de Lugo ao longo destes anos con obras de grande calado das que agora todos e todas nós nos beneficiamos. Lembremos o pavillón, a residencia de maiores, varias reformas no viario ribadense que deixaron totalmente transformados barrios enteiros…”.

“Non nos vai despistar Daniel Vega, non. Por moito que queira facer como cando se tramitou o centro de saúde, que un día dicía unha cousa e ao seguinte xusto a contraria, segundo lle conviñera. Céntrese, alcalde; céntrese e achegue a parte que lle corresponde para que se poida levar a cabo a reforma do abastecemento da auga de Ribadeo. Tanto como lle dá voltas ao tema, semella que non lle saen as contas e por iso insiste na polémica. Agardemos que non nos pase como no caso doutras subvencións perdidas porque o concello non tiña diñeiro para poñer a súa parte”, conclúen.