O BNG de Ribadeo propón destinar a alugueiro para xente moza o proxecto de construción de vivendas en Cabanela

Ribadeo, 26 de novembro, 2025. O grupo municipal do Bloque de Ribadeo propón que o goberno leve a cabo o proxecto para a construción de vivendas en Cabanela dedicadas ao alugueiro para xente moza. Este proxecto foi iniciado a comezos do ano 2023 polo anterior goberno do BNG ao facerse este con varios inmobles en propiedade para este fin. Martín Graña anuncia que presentarán unha moción no pleno para instar ao goberno municipal a levar a cabo os trámites necesarios para que este proxecto sexa unha realidade canto antes ante a grave crise de acceso a vivenda que afecta tamén a Ribadeo.

Martín Graña, concelleiro do BNG, engade que “o acceso a vivenda é un problema grave que afecta especialmente á xente moza, basta con botar unha ollada a portais como Idealista para ver que tamén o sufrimos en Ribadeo. Tendo isto en conta, a comezos do ano 2023, o goberno do BNG fixo unha serie de xestións para adquirir unhas parcelas e inmobles na zona de Cabanela para construír neles vivendas destinadas ao aluguer para xente moza. No noso programa levábamos esta proposta e despois de dous anos sen ter ningún tipo de avance nese sentido por parte do PP, hoxe queremos propoñerlle ao goberno municipal que se leven a cabo os trámites necesarios para iniciar esta actuación”.

“Sabemos que non é a solución ao problema e que os concellos teñen unha capacidade limitada neste sentido, pero si que pode ser un bo comezo para aliviar a situación. No próximo pleno presentaremos unha moción, que agardamos que conte co apoio de todos os grupos políticos representados na corporación. Esta é a primeira das medidas que presentaremos sobre a cuestión da vivenda. Se as novas xeracións non teñen garantido o acceso á vivenda é moi complicado que poidan pensar en plans de futuro, en progresar, en facer a súa vida en Ribadeo e que o noso pobo poida avanzar”, conclúe.