Celébrase este 3 de decembro o Día Internacional das Persoas con Discapacidade. Unha xornada que nos convida a visibilizar a tantas persoas que sofren algún tipo de discapacidade: física, sensorial, intelectual, psicosocial, mental. Unha situación que afecta a máis de catro millóns de persoas no noso país, en torno ao 9 % da poboación. E xunto a iso, pretende interrogarnos sobre o tipo de sociedade e de Igrexa que estamos a construír para que todos se sentan plenamente integrados.
Desde a Igrexa trátase dunha realidade que nos debe preocupar. Son moitos os encontros e as visitas que vou realizando a asociacións e colectivos que traballan con estas persoas. Entre as moitas presenzas na nosa diocese, alégrame especialmente a do Hospital San Pablo en Mondoñedo e o traballo que as Hijas de la Caridad alí realizan. Xunto a este exemplo, tantas persoas e iniciativas que dedican tempo, traballo, imaxinación, voluntariado a esta loable realidade. Grazas!
Nos meus encontros comentádesme os vosos proxectos, esperanzas, logros. Sen dúbida, é moito o que se avanzou neste campo na nosa sociedade. Temos que agradecelo e alegrarnos por iso, sabendo que aínda nos queda moito camiño por percorrer. Nunha sociedade marcada pola meritocracia e un individualismo que exalta a «autonomía» absoluta, existen enormes dificultades para acoller a interdependencia e a fraxilidade humana. Por iso, entre outras cousas, fáltanos non pouca sensibilización cara a estes colectivos. Non temos unha mirada atenta que axude a integrar, acoller, promover. Entre todos, habemos de superar e vencer tantas barreiras que dificultan a moitas persoas poder participar e enriquecer a nosa sociedade.
A mensaxe de Xesús enraíza máis fortemente a inviolable dignidade de toda persoa, sexa como for a súa situación e estado. Cada persoa, cos seus dons e a súa historia particular —tamén coas súas fraxilidades—, é un agasallo único de Deus. A discapacidade nunca pode ser vista como unha carencia. Non se trata, por tanto, de compadecernos, senón de promover un camiño de xustiza que constrúa unha sociedade do ben común: nese marco, todos alcanzarán a plena inclusión desde o exercicio dos dereitos. O exemplo de Xesús no evanxeo, que se atopou con tantas persoas con discapacidade ás que volveu introducir no camiño e na comunidade, é un bo exemplo e semente para nós.
Nese sentido, gustaríame hoxe dirixirme ás persoas con discapacidade e ás súas familias: a Igrexa ámavos, e necesita de todos e cada un para ser a gran familia de todos. A Igrexa necesítavos e quere acompañarvos tamén no voso camiñar. O encontro con Cristo pode axudarvos tamén a descubrir un novo sentido e horizonte á vosa existencia que vos leve, como a todos, á plenitude e á felicidade. As vosas vidas de esforzo, sacrificio, valentía, entrega escondida, xenerosidade, solidariedade, alegría… son un testemuño de fe e unha brillante achega para a nosa sociedade que nos gustaría moito fomentar e animar desde a caridade en Cristo.
Tamén, neste día, sería bo que, como Igrexa, nos fixésemos algunhas preguntas: Facemos todo o posible para que todos, segundo as súas capacidades, poidan atoparse con Xesús? Suprimimos ou facemos o posible por suprimir barreiras de todo tipo na nosa comunidade: físicas, culturais, comunicativas, mentais? Escoitamos, acompañamos e acollemos ás asociacións e colectivos con discapacidade nas nosas parroquias? Adaptámonos ás necesidades das persoas? Son as nosas comunidades, de verdade, unha nai/familia que sabe acoller, acompañar, dar protagonismo e atopar un lugar para cada un dos seus membros? Estas preguntas poden ser un bo exame de conciencia que promova camiños de conversión sempre necesarios: na adaptación dos nosos templos, na catequese, na participación litúrxica…
A Igrexa quere ser fermento dunha nova sociedade onde se nos mire como persoas e non polas nosas capacidades. A esa tarefa anímovos.
O voso irmán e amigo,
Fernando García Cadiñanos
Bispo de Mondoñedo-Ferrol
O grupo teatral O Centiño de San Martiño (Foz) actuou este sábado en Marzán, convidado pola asociación veciñal Torques de Marzán. O local quedou pequeno ante a resposta do público: 73 persoas, un récord de asistencia para unha obra de teatro na parroquia. A comedia provocou constantes risas e un ambiente moi participativo. A iniciativa volve demostrar o valor de levar actividade cultural e teatro afeccionado ás parroquias e barrios, achegando propostas escénicas a lugares afastados dos grandes circuítos. O Centiño continuará a xira de “O Autobús” nas vindeiras semanas: Sábado 25 de abril: Vilaronte (Foz). Sábado 2 de maio: Casa da Cultura de Trabada
A xornada contou con degustación gratuíta de viños elaborados por adegas da contorna, unha cata comentada e un mercado de produtos gastronómicos locais, permitindo aos asistentes coñecer de primeira man a riqueza do produto de proximidade. O pregón desta edición correu a cargo de Alejandro Gándara, quen presentou o seu proxecto audiovisual 360 curvas, unha obra que reflexiona sobre a distancia entre A Fonsagrada e Lugo e sobre o conflito social e político asociado á perda da súa condición de cabeceira de comarca, no marco da loita contra a despoboación.
Dezaoito locais hostaleiros de Ribadeo, Rinlo e Vilaframil ofrecerán diversas preparacións ata o domingo: en escabeche, en salpicón, en empanada, ao allo, á prancha, en albóndega, etc… Todas as propostas poden consultarse nas redes sociais de Acisa Ribadeo, que agradece “unha vez máis o apoio da OPP do Porto de Burela, que nos doou 90 quilos de cabala para estas xornadas, produto que entregamos de xeito gratuíto aos locais participantes. Achegámoslles así unha parte do peixe que empregarán nesta nova cita gastronómica na que tamén colabora o Concello de Ribadeo”. Ata o porto, ao restaurante Marinero, se achegaron este venres o director territorial da Consellería de Mar, Alexandre Piñeiro, as concelleiras ribadenses Montse Seijo, Elena Sierra e Begoña Sanjurjo, a presidenta de Acisa, Carmen Cruzado, o xerente do colectivo empresarial, Jesús Pérez, e o técnico de Acisa, Jorge Fernández, que puideron degustar as elaboracións realizadas por este establecemento hostaleiro.
O sábado tivo lugar no Casino o III Showcooking, con cociña en directo e maridaxe de viños. O público poderá votar os seus pinchos favoritos e participar no sorteo dunha noite no hotel Marqués de Riscal. A entrega de premios será o luns 20 ás 19:00 h. O Concello e Destino Navia animan a veciños e visitantes a gozar desta cita gastronómica.
Haberá degustación diaria de ostras na carpa do porto. Concertos, showcookings, visitas guiadas e actividades mariñeiras. Lancha pola ría, exposición de maquetas e concurso fotográfico #somoslasostra2026, ademais propostas especiais en Acueo, La Casilla e Restaurante Peñalba.
A etapa, cun percorrido duns 150 quilómetros, partiu arredor das 11:30 horas e rematou en Barreiros, atravesando concellos como Xermade, Muras, Viveiro ou Foz. A proba reúne a equipos do ciclismo profesional internacional e sitúa a provincia de Lugo como escenario dunha das citas deportivas máis destacadas do calendario. O Goberno colabora no desenvolvemento da carreira a través das Forzas e Corpos de Seguridade do Estado, que velan polo correcto desenvolvemento da proba e pola seguridade de participantes e afeccionados.
A cita contará con charlas, obradoiros, concurso de fotografía e unha ampla zona expositiva. A feira será de acceso gratuíto e está pensada para gozar en familia.
