O BNG apoia en Viveiro a concentración de ASFANEMOR para reclamar máis recursos de atención á diversidade

Viveiro, 24 de xaneiro, 2026. Representantes do BNG participaron en Viveiro na concentración convocada pola Asociación de Familias Neurodiverxentes da Mariña Lucense e Ortegal (ASFANEMOR), coincidindo coa celebración do Día Internacional do Ensino, para denunciar a falta de recursos e de profesorado especializado nos centros educativos da comarca.

Na mobilización estiveron presentes a portavoz municipal do BNG en Viveiro, Iria Cotelo, e o deputado do BNG no Parlamento Galego, Daniel Castro, xunto con outros cargos e militantes da organización nacionalista, que amosaron o seu apoio ás reivindicacións das familias, centradas na necesidade de incrementar o profesorado de Audición e Linguaxe e Pedagoxía Terapéutica na Mariña.

Cotelo lembrou que estas demandas “non son novas” e que coinciden coas mobilizacións dos Venres Negros impulsados pola ANPA do CEIP de Covas, unha loita que o BNG acompaña desde o seu inicio. A portavoz cualificou de “lamentable” a actitude da Consellería de Educación, “que mira cara ao outro lado, maquillando datos irreais e reducindo a atención aos nenos e nenas a simples números”, algo que, ao seu xuízo, “demostra un descoñecemento abrumador da Xunta sobre o día a día das familias, do profesorado e do propio alumnado”.

A nacionalista, que traballa diariamente con persoas con necesidades específicas de apoio extenso e xeralizado, subliñou “o abismo entre os datos que presenta a Consellería en materia de inclusión e a realidade que viven as familias e os centros”.

Pola súa banda, Daniel Castro advertiu de que a falta de recursos especializados “está a cronificarse ante a pasividade da Xunta”, e sinalou que “sen persoal suficiente de apoio educativo, a inclusión convértese nun slogan baleiro”. O deputado insistiu en que “o que reclaman as familias é xusto e necesario: profesionais que garantan unha atención digna e adaptada á diversidade do alumnado”.

O profesorado tamén está a denunciar as precarias condicións nas que traballa e coincide na demanda dun incremento de persoal de atención á diversidade. Ademais, anunciou peches nos centros educativos o xoves 29 de xaneiro. “Non é un capricho que ASFANEMOR, a ANPA do CEIP de Covas e o profesorado se mobilicen. Son tres colectivos diferentes reclamando o mesmo, e a Xunta ten a obriga de atendelo: máis profesorado especializado. Tan sinxelo como iso”, afirmou Castro.

Desde o BNG puxeron en valor a loita continuada das familias e do profesorado, e reiteraron o seu compromiso de acompañalos tanto nas mobilizacións como nas institucións ata que a Xunta garanta os recursos necesarios para unha educación pública de calidade e verdadeiramente inclusiva.

CEIP de Covas

O BNG mantén o seu apoio aos Venres Negros do CEIP de Covas, un centro cunha elevada concentración de alumnado con necesidades de apoio educativo, risco de exclusión social e un alto índice de absentismo, que precisa dun reforzo urxente en Audición e Linguaxe e Pedagoxía Terapéutica.

A nivel municipal, o grupo nacionalista presentou un rogo no pleno para instar á alcaldía a mediar coa xefatura territorial de ensino. “Resulta incomprensible que a representación do PP en Viveiro prefira repetir as mentiras da Xunta antes que situarse ao lado das necesidades dos nenos e nenas do concello”, sinalou Cotelo.

No Parlamento Galego, Daniel Castro defendeu recentemente unha proposición non de lei na que se insta á Xunta a reforzar o CEIP de Covas con profesorado especializado e recursos suficientes para garantir unha educación verdadeiramente inclusiva.