O PSOE suspende o procedemento interno tras a denuncia presentada contra José Tomé

Lugo, 2 de marzo, 2026. Hoxe soubose da presentación dunha denuncia particular ante a Fiscalía, que anunciou a interposición dunha querela contra José Tomé Roca por feitos que poderían ser constitutivos dun delito de acoso sexual ou dun delito de abuso no exercicio da función pública.

As e os socialistas animan sempre a denunciar, respectando que a decisión de facelo —e o momento no que se fai— pertence única e exclusivamente á vítima.

Nun Estado de Dereito, confían plenamente na Xustiza. Agora corresponde investigar os feitos con rigor e con todas as garantías, respectando tamén a presunción de inocencia, que é un principio básico da democracia.

Ao pasar o asunto á vía penal, e tal e como establecen as normas internas, o PSOE suspende o procedemento que estaba aberto no Canal Antiacoso. Será a Xustiza quen determine o que ocorreu e, se procede, as responsabilidades correspondentes, a partir das que o partido actuará, como sempre, con responsabilidade, coherencia e respecto ás persoas e ás institucións.