O BNG alerta de que a nova variante condena Viveiro a un modelo de comunicacións deficiente

Viveiro, 25 de maio, 2026. O Grupo Municipal do BNG de Viveiro levará ao pleno de xuño o debate sobre a Variante de Viveiro, propoñendo que o Concello reclame á Xunta de Galicia a recuperación do proxecto integrado na Vía de Alta Capacidade (VAC) da Costa Norte e o abandono da alternativa actual, baseada nunha estrada convencional de menores prestacións.

A portavoz municipal do BNG, Iria Cotelo, advirte de que a decisión da Xunta supón “un novo episodio de abandono a Viveiro e á Mariña despois de décadas de promesas incumpridas”.

Segundo Cotelo, trátase dunha infraestrutura “clave para o futuro económico e social de Viveiro e da comarca”, e lembra que Viveiro continúa sendo “a única cidade de máis de 250 quilómetros de costa entre Ferrol e Avilés sen unha variante en condicións”.

O BNG subliña que o proxecto da VAC da Costa Norte leva 25 anos previsto nos plans de infraestruturas da Xunta e denuncia que, tras os avances do goberno bipartito, o Partido Popular mantivo a actuación paralizada desde 2009.

A formación critica que a alternativa presentada pola Xunta en decembro renuncia á vía de alta capacidade e propón unha estrada convencional “cun trazado impropio dunha infraestrutura moderna”, con velocidade de deseño de 50 km/h, curvas de pequeno radio e pendentes do 7% ao 8%. “É unha infraestrutura insuficiente para as necesidades actuais e futuras de Viveiro”, afirma Cotelo.

A portavoz engade que esta proposta “non resolve os problemas de tráfico nin mellora a conexión co resto do país”, e que consolida “un modelo de comunicacións deficiente que limita o desenvolvemento social, económico e industrial do concello”.

Cotelo tamén cuestiona os criterios empregados pola Xunta para xustificar o cambio de proxecto, asegurando que se basean nun estudo “claramente sesgado”.

O BNG considera que os enlaces previstos tampouco solucionan os problemas de mobilidade:

– O enlace co Camiño Vello desemboca xunto ao Pazo de Malates, nunha rúa estreita e de sentido único.

– O enlace de Magazos obrigaría o tráfico procedente do interior a atravesar zonas urbanas que deberían quedar liberadas do paso de vehículos pesados.

“Por que Viveiro ten que conformarse cunha estrada de segunda categoría mentres noutras zonas se executan infraestruturas de primeiro nivel? O que reclamamos é o que nos corresponde e o que se nos prometeu”, conclúe Cotelo.

A moción do BNG propón que o Pleno manifeste o seu rexeitamento á renuncia da Xunta á VAC Costa Norte, reclame a recuperación do proxecto da variante incluído no PXOM e solicite unha revisión dos estudos técnicos con criterios obxectivos sobre capacidade, tempos de desprazamento e potencial de desenvolvemento.

Os acordos serán trasladados á Xunta, aos grupos parlamentarios e aos concellos da Mariña. Ademais, o BNG anuncia que presentará alegacións aos estudos informativo e ambiental das variantes leste e oeste de Viveiro ante a Axencia Galega de Infraestruturas.