A procesión marítima do Carme reúne á flota de Burela e a autoridades galegas

Burela, 7 de xuño, 2026. A Presidenta da Deputación de Lugo e Alcaldesa de Burela, Carmela López, participou este domingo no día grande das Festas Patronais da localidade, acompañada por deputados e deputadas provinciais. A mandataria asistiu á misa de campaña celebrada na nave de redes do porto e á tradicional procesión marítima da Virxe do Carme, portada polo buque O Cantiño e escoltada pola flota burelá. Unha marcha relixiosa profundamente ligada ao mar que, segundo destacou, “é unha expresión da identidade mariñeira da nosa provincia e unha mostra da capacidade dun pobo para manter vivas as súas tradicións”.

López subliñou que a Deputación de Lugo achega 12.000 euros a través do Plan Deputación para apoiar esta celebración, “que forma parte do patrimonio cultural inmaterial da provincia e contribúe a fortalecer a convivencia, o sentimento de pertenza e a dinamización económica da contorna”.

Tamén participou nos actos a conselleira do Mar, Marta Villaverde, quen acompañou á veciñanza na honra á Virxe do Carme e a San Xoán Bautista. Villaverde puxo en valor estas festas como un referente do vínculo entre o mar e as comunidades costeiras, e salientou que contribúen a preservar as tradicións mariñeiras e a reivindicar a protección dos homes e mulleres do mar.