O Fogar San Aníbal Os Castros cumpre 3 meses acollendo a 14 menores migrantes en Burela

A Obra Social das Fillas do Divino Celo – Rogacionistas fai balance dos 3 primeiros meses de actividade deste novo recurso, agradecendo a acollida que tivo en Burela e na Mariña por parte de veciños, centros educativos e empresariado local

Burela, 16 de xuño, 2026. O Fogar San Aníbal Os Castros é un centro de acollida especializado en menores migrantes non acompañados concertado coa Xunta de Galicia e xestionado polas Fillas do Divino Celo, entidade referente na atención á infancia e a adolescencia e que conta cunha ampla experiencia na atención a menores en Burela.

O centro, que se atopa integrado nun edificio cedido polo Concello de Burela onde xa funcionaba unha vivenda para a emancipación de mozos maiores de 18 anos, é un fogar funcional no que os menores conviven durante as 24 horas nun ambiente de proximidade e acompañamento cun equipo multidisciplinar de 14 profesionais, dirixidos polo pedagogo Iván Penelo.

Aínda que dispón de 12 prazas, as necesidades e a alta ocupación do sistema de protección de Galicia fan que o centro conte actualmente con 14 mozos, de entre 12 e 18 anos, dos cales 11 chegaron a Burela desde Canarias e os outros 3 desde Ceuta. Os seus países de orixe son Gambia, Mali, Marrocos, Senegal e Mauritania. A maioría chegaron a España en patera ou a nado despois de meses de travesía migratoria por diferentes países africanos, con vivencias moi duras.

“Nestes escasos 3 meses, os seus rostros e esperanzas cambiaron”, asegura Jesús Iglesias, director da Obra Social das Fillas do Divino Celo. “Queremos destacar o traballo do inspector xefe de Educación de Lugo, Íñigo Barreira, que fixo posible a súa escolarización en diferentes centros educativos da comarca. A acollida e implicación destes Centros é todo un exemplo do bo traballo que desenvolven”.

Os menores cursaron diferentes estudos estes últimos meses no IES Monte Castelo de Burela (ESA e ESO), IES Perdouro de Burela (acción formativa para desempregados en operacións de montaxe de instalacións electrotécnicas e de telecomunicacións en edificios), IES Marqués de Sargadelos en San Cibrao (ESO e formación profesional), CPR Martínez Otero de Foz (educación secundaria) e CPR Plurilingüe do Pilar de Foz (Primaria e ESO).

“Tamén queremos destacar a boa acollida por parte dos veciños de Burela nestes primeiros meses. Só podemos dar as grazas pola amabilidade e axuda para a integración destes mozos, sen que recibísemos ningún feito negativo”, confirma o director da Obra Social.

Os menores chegaron con moitísimas carencias de formación e, a pesar de que levaban case todos máis dun ano en España, o seu coñecemento do castelán é escaso, polo que desde o Fogar, xunto os centros educativos, é unha prioridade reforzar o seu coñecemento do castelán e do galego, dedicándolle cada día 2 horas de estudo xunto cos seus educadores. Ademais, 8 dos mozos, 2 que acaban de cumprir a maioría de idade e 6 que xa teñen 17 anos, compaxinan os seus estudos co traballo as fins de semana ou ao saír de clase.

Para Jesús Iglesias, “estes mozos son un claro exemplo de superación, demostrando moitas ganas de aprender e de traballar. Dificilmente poderiamos pedirlles máis en tan pouco tempo. Son conscientes de que Galicia lles axuda, pero eles queren tamén valerse por eles e contribuír ao ben da sociedade galega”.