O portavoz provincial, Antonio Ameijide, analizou coa voceira municipal, Eugenia Requeijo, as razóns da denuncia do PP de Muras ao rexedor por presunto delito continuado de prevaricación administrativa
Lugo, 22 de xullo de 2026. O PP condena a “hipocrisía” e “dobre moral” do BNG “porque pretende dar leccións, pero o alcalde de Muras incumpre deliberadamente a lei”. Así o sinalou o portavoz do Grupo Provincial Popular de Lugo, Antonio Ameijide, durante unha visita a Muras xunto coa portavoz municipal, Eugenia Requeijo, onde afeou que “o BNG é o primeiro que cae en contradicións: din unha cousa pero fan a contraria, tanto en Galicia, como na provincia de Lugo como en Muras”.
“O exemplo que coñecemos máis recentemente é o do alcalde nacionalista de Muras, moi crítico coa xestión do Partido Popular en tódalas administracións, pero el mesmo incumpre á fronte do Concello”, segundo subliña Ameijide. De feito, Manuel Requeijo leva anos levantando os reparos de Intervención que o advirten de superar o límite legal correspondente a contratos menores en facturas de asesoramento xurídico. “Pero, a pesar de ser coñecedor polas reiteradas advertencias de Intervención, continúa sen adoptar outra solución administrativa”, indica o popular. Ante esta situación, o PP de Muras presentou formalmente unha denuncia ante a Xustiza por un presunto delito continuado de prevaricación administrativa.
O popular apunta tamén que os gabinetes xurídicos están relacionados entre si e co deputado autonómico do BNG, Óscar Ínsua. “Non deixa de ser curioso que, precisamente, el mesmo teña criticado este tipo de contratación; que, por certo, está recollida na lei, a mesma que establece o límite da contía”. Pero, ademais, “esas empresas son as que dirixen tamén a asesoría xurídica de Adega en todos os contenciosos contra a Xunta polos parques eólicos”.
Ao respecto, Ameijide subliña que “é contraditorio que en Galicia o BNG diga non aos eólicos cando se trata de producir enerxía renovable sen comprometer o rigor ambiental do noso territorio, pero en Muras diga si a negociar coas promotoras dos parques eólicos”.
A portavoz municipal, Eugenia Requeijo, condena esta práctica do alcalde do BNG “que presume de transparencia e xestión, pero en realidade está desoíndo as advertencias do servizo municipal de Intervención polo pago destas facturas por riba do límite legal para contratos menores”. Dende o 2015 leva pagado a estas empresas vinculadas ao BNG máis de 387.000 euros, “un gasto elevado para un concello pequeno coma o noso”. Dende o PP de Muras “o que lle pedimos ao alcalde é que dea explicacións e corrixa as irregularidades”, subliñou.
O BNG NA DEPUTACIÓN, SEMPRE DO LADO DO PSOE E TOMÉ
O portavoz provincial lembrou tamén o que considera “dobre moral do BNG na Deputación de Lugo” porque “condena publicamente o acoso sexual -polo que está sendo investigado o ex presidente da Deputación, José Tomé-; pero non tivo problemas en unirse a el para volver formar goberno na Deputación e así manter a Vicepresidencia e seguir pisando moqueta”.
Tamén se manifestan en Monforte en contra dunha nova ponte aberta ao tráfico no Malecón; pero a Deputación, onde teñen responsabilidade de goberno, aproba un convenio para financiar parte desas obras. “Tamén teñen anunciado unha reunión na que participarían os responsables autonómicos de ambas formación, pero da que non sabemos máis nada”, apunta o popular. “Pero moito nos tememos que entre defender as súas propias consignas ou apoiar ao PSOE e a Tomé, o BNG elixirá de novo apoiar ao PSOE e a Tomé”.
“Esa mesma postura é a que adoptan en Galicia cando se trata de reclamar os incumprimentos do Goberno de España: póñense do lado de Sánchez e do PSOE. Tan bravos aquí e tan mansos en Madrid”, conclúe.
As crianzas desfrutaron dunha refrescante xornada con inchables e xogos acuáticos na contorna do complexo deportivo da Veiga.
O campo de fútbol do Cascabeiro acolleu o pasado sábado a III Festa do Mexillón, organizada polo Celta Barreiros. Centos de persoas achegáronse a gozar dunha tarde de gastronomía e de música. En total foron servidas 670 racións entre veciñanza e visitantes, que saborearon mexillóns e lacón. Os organizadores amosasen satisfeitos da acollida: “estamos contentos pola boa resposta dos asistentes”. E tiveron palabras de agradecemento “para os Concellos de Barreiros e de Foz pola boa colaboración”.
Familias, amizades e persoas de todas as idades viviron cada xogada e cada aplauso, evidenciando que o fútbol é tamén unha oportunidade para fortalecer a convivencia e a unión da veciñanza. O municipio felicitou á Selección Española polo seu título mundial, un éxito histórico que fixo vibrar a toda a comunidade.
Trátase dunha mostra de 28 fotografías de gran formato do naturalista Ezequiel Martínez que reivindica a diversidade e a conservación da fauna salvaxe. A iniciativa, organizada polo Concello da Pastoriza en colaboración con ABANCA e Afundación dentro do proxecto Corrente cultural, poderá visitarse de balde ata o 26 de agosto. As imaxes, acompañadas de textos divulgativos elaborados por especialistas de Naturnova, amosan especies emblemáticas como o oso pardo, a cegoña, o cervo ou a aguia imperial, convidando a reflexionar sobre a importancia de protexer o patrimonio natural.
A cita, consolidada como un referente do verán cultural no municipio, reuniu na Praza dos Campos á formación anfitriona do encontro, a Agrupación La Sidrina, de Lugones (Asturias) e o Grupo Folklórico Estampas de México. A programación continuou o sábado coa celebración do Festival Folklórico Infantil. Villares puxo en valor o labor que o grupo Mistura desenvolve durante todo o ano na conservación e difusión do patrimonio cultural galego, así como a importancia de iniciativas coma este festival “para manter vivas as tradicións e dinamizar a vida social e cultural dos nosos concellos”.
A mostra reúne imaxes tomadas en Galicia, Cataluña, Aragón, Andalucía, Senegal e Escocia, ofrecendo un percorrido pola biodiversidade e polos vínculos entre distintos ecosistemas. O fotógrafo, naturalista especializado en ornitoloxía, invita a contemplar a natureza cunha mirada pausada e consciente a través de 50 especies de fauna. Permanecerá aberta ata o 29 de xullo.
As familias, o equipo docente, e o alumnado da Escola Infantil Municipal desfrutaron esta semana dunha xornada de convivencia e aprendizaxe neste parque. Ao longo do día, ademais de visitar a reserva e coñecer de preto numerosas especies animais, compartiron un agradable picnic nas instalacións do parque e tiveron acceso tanto á zona exclusiva da reserva como ao resto do recinto. A xornada rematou cunha actividade moi especial: un pequeno teatro participativo sobre a prevención dos incendios forestais, no que os nenos e nenas aprenderon a importancia de coidar os nosos montes e de evitar condutas que poidan provocar lumes, como abandonar obxectos de vidro na natureza. Un día cheo de experiencias, convivencia e aprendizaxes que reforzan o compromiso coa educación ambiental desde as primeiras idades.
