Cospeito, 29 de xullo de 2026. O Grupo Municipal Socialista de Cospeito denuncia as graves deficiencias detectadas na escola infantil municipal tras coñecer o contido das inspeccións realizadas pola Xunta de Galicia, nas que se recolleron incumprimentos relacionados co persoal, co estado das instalacións e coas condicións nas que se presta o servizo.
Segundo explicou o voceiro socialista, Pablo Alvariño, a inspección realizada en abril de 2025 pola Consellería de Política Social e Igualdade constatou o incumprimento da ratio mínima de persoal establecida no Decreto 329/2005, que regula os centros de atención á infancia. A acta recolle que a escola infantil de Cospeito contaba con tres educadoras e unha persoa que desempeñaba funcións de apoio, malia dispoñer de tres unidades en funcionamento: de 0 a 1 anos, de 1 a 2 anos e de 2 a 3 anos.
Alvariño lembra que a normativa establece que o número de profesionais cualificados debe ser equivalente ao número de unidades en funcionamento máis unha persoa e que, ademais, o centro debe contar cunha persoa de apoio para a atención e o coidado das nenas e nenos.
“É dicir, a escola infantil de Cospeito debe contar con catro profesionais cualificados e, ademais, cunha persoa de apoio. A inspección deixou constancia de que este requisito non se estaba cumprindo”, explicou.
O voceiro socialista lembra que, tras coñecerse aquela inspección, o alcalde asegurou que era a primeira vez que a Xunta realizaba esa interpretación da normativa e solicitou unha nova visita á Consellería de Política Social e Igualdade.
O PSdeG advirte de que a acta da segunda inspección, realizada en xuño de 2026, xa non fai referencia á ratio de persoal, pero tampouco aclara se o incumprimento detectado o ano anterior foi corrixido. “O alcalde debe explicar se o centro conta actualmente con todo o persoal esixido e por que unha deficiencia constatada en 2025 desaparece sen máis da seguinte acta”, sinalou Alvariño.
Temperaturas de ata 30 graos e deficiencias nas instalacións
As e os socialistas advirten de que a inspección realizada o pasado mes de xuño detectou novas deficiencias no funcionamento do centro. Entre elas, a acta recolle temperaturas interiores de ata 30 graos, unha situación “indamisible” que compromete o benestar das crianzas e das profesionais, especialmente durante os meses de maior calor.
A inspección identificou tamén graves deficiencias no estado das instalacións, entre elas gretas, humidades, elementos de protección deteriorados e outras incidencias. Ademais, varias familias trasladaron ao PSdeG que o chan de vinilo se atopa moi deteriorado en determinadas zonas, unha situación que consideran un risco importante para a seguridade das nenas e nenos. Segundo denuncia o PSdeG, todas estas deficiencias evidencian a falta absoluta de mantemento por parte do Partido Popular e a necesidade de actuar de maneira inmediata para garantir unhas condicións adecuadas de seguridade.
Preocupación das familias
O PSdeG asegura tamén que varias familias lle trasladaron unha fonda preocupación polo atención que reciben as crianzas no centro e determinadas situacións relacionadas co persoal do mesmo. Segundo a información facilitada polas propias familias, estes feitos poderían ter derivado na apertura dalgún expediente sancionador.
“As familias teñen dereito a coñecer que está acontecendo, se existe algún expediente aberto e que medidas se adoptaron para garantir unha atención adecuada. Falamos do coidado de menores e é imprescindible actuar con transparencia e ofrecer todas as garantías de seguridade e benestar”, alertou o voceiro socialista.
Con todo, o PSdeG formulará varias preguntas no vindeiro Pleno para que o alcalde aclare se se corrixiu o incumprimento da ratio de persoal, informe das medidas adoptadas para emendar as deficiencias detectadas nas instalacións e detalle as actuacións previstas para reducir as elevadas temperaturas no interior do centro.
As e os socialistas reclamarán tamén ao Partido Popular que confirme se existen ou non expedientes abertos en relación co persoal da escola infantil e que medidas se adoptaron para garantir unha atención adecuada, protexer o benestar das crianzas e ofrecer ás familias todas as garantías en relación aos seus fillos e fillas.
Este luns, 14 de setembro, visitaron Mondoñedo, a Praia das Catedrais e Santa Cruz. A viaxe evocou as lecturas de Cunqueiro e as súas Crónicas do sochantre, nun percorrido que incluíu a catedral mindoniense e o barrio dos Muíños, ademais da emblemática praia de Augas Santas. Pola tarde participaron nunha exhibición de billarda grazas á estimable colaboración dos billardeiros da comarca. O martes partirán de regreso a Loktudi.
A conselleira do Medio Rural, María José Gómez, acompañada pola directora xeral de Relacións Institucionais e Parlamentarias, Sandra Vázquez, e a directora xeral de Urbanismo, Encarnación Rivas, asistiu á ofrenda da Virxe dos Remedios en Mondoñedo.
Era o único ocupante do turismo e os Bombeiros de Vilalba tiveron que excarceralo. Ao fío das 13:30 horas, un particular informou ao 112 Galicia dun coche que se saíra da vía e acabara batendo contra unha árbore no quilómetro 75 da N-640, en Ludrio (Castro de Rei). O propio alertador sinalou que o accidente semellaba grave polo estado no que quedara o vehículo. Cando chegaron ao lugar, os servizos de emerxencias confirmaron que só había unha persoa implicada,un home que resultou falecido e foi excarcerado polos bombeiros. No operativo participaron Urxencias Sanitarias de Galicia-061, a Garda Civil de Tráfico, os Bombeiros de Vilalba e os servizos de mantemento da estrada.
O director xeral agradeceu aos membros e traballadores da entidade todo o seu labor na defensa dos dereitos dos máis novos. Deste xeito, puxo en valor a súa traxectoria e o compromiso cun modelo integrador e inclusivo no que os menores do sistema de protección vivan nunha contorna totalmente familiar. Neste sentido, Jacobo Rey fixo fincapé na importancia da colaboración entre a Xunta e o tecido social para seguir fortalecendo un sistema que garanta o benestar dos nenos e adolescentes, con centros como San Aníbal que conforman un auténtico fogar.
Na IV Festa dos Ovos Rotos con Chourizo e Feira de Artesanía, María José Gómez puxo en valor a importancia económica e social deste produto e o papel da artesanía alimentaria, con sete operadores presentes. Subliñou que o evento consolídase como unha cita que promove a gastronomía galega e recupera oficios tradicionais, dinamizando a vida económica e social de Castro de Rei.
Este luns, 14 de setembro, deu comezo un novo curso de español dirixido a persoas estranxeiras da man de Ecos do Sur, que se desenvolverá ata o 9 de outubro. A formación será dun total de 80 horas e as clases terán lugar de luns a venres, de 9:30 a 13:30 horas no Centro de Formación Ocupacional. O concelleiro de Inmigración, Mario Pillado, destacou o valor destas propostas para “facilitar ferramentas útiles ás persoas estranxeiras residentes no municipio e favorecer a súa integración, tanto social como administrativa”.
A programación arrancará de 13:00 a 15:00 horas cos pinchos de benvida e unha sesión vermú a cargo do DJ Peabody. A continuación, de 15:00 a 17:00 horas, terá lugar a comida na Finca San Antonio, cun menú composto por salpicón de rape e langostinos, codillo con patacas, pan, postre, café, chupito e bebida incluída. Os tickets teñen un prezo de 40 euros e poden adquirirse en O Rincón, Confitería Alianza, Comercial Anjor e Perruquería Oriola; os menores de 5 anos asistirán de balde e os de 6 a 10 anos contan cun desconto do 50 %. Xa a partires das 18.30 horas haberá sesión de música con Toxo Guayaba.
