Pablo Díaz advirte de que o municipio afronta a época de maior risco de lumes coas faixas de seguridade sen limpar e sen adherirse ao plan da Xunta para a xestión da biomasa
Abadín, 15 de xullo de 2026. O PSdeG de Abadín, a través do seu voceiro, Pablo Díaz, denunciou hoxe que o municipio volve quedar outro ano máis sen brigada municipal de prevención e defensa contra os incendios forestais, unha situación que atribúe directamente á “falta de previsión, ao desleixo e á incapacidade de xestión” do Goberno local do Partido Popular.
O voceiro socialista advertiu de que Abadín afronta novamente a época de maior risco de incendios sen os medios municipais necesarios, coas faixas de seguridade sen limpar e sen que o Concello se adherise ao plan da Xunta de Galicia para a xestión das faixas secundarias de biomasa.
“Mentres outros concellos se preparan con antelación, en Abadín repítense exactamente os mesmos erros de cada verán. Rancaño coñece perfectamente a situación, pero volve chegar tarde e deixa unha vez máis á veciñanza e ao territorio desprotexidos”, alertou Díaz.
Un problema denunciado dende 2025
O PSdeG lembra que esta situación non é nova. En agosto de 2025, a formación xa denunciara que a brigada municipal fora constituída cando a temporada de maior risco estaba moi avanzada e que quedara inoperativa apenas tres días despois pola renuncia de dous dos seus integrantes.
Daquela, o Grupo Municipal Socialista advertiu de que non se podía improvisar unha cuadrilla en pleno mes de agosto e reclamou unha brigada estable que traballase durante todo o ano en tarefas de prevención, limpeza e mantemento. “Un ano despois, o Partido Popular non adoptou ningunha solución e volve repetir os mesmos erros”, lamentan.
“Advertímolo o ano pasado e volvemos facelo agora. Non se pode improvisar cada verán nin esperar a que se produza unha desgraza para actuar. A prevención require planificación, persoal e traballo durante os doce meses do ano”, explicou o voceiro socialista.
Pablo Díaz incidiu tamén en que o Concello continúa sen adherirse ao plan para a xestión das faixas secundarias de biomasa, malia tratarse dunha ferramenta fundamental para manter limpas as zonas próximas ás vivendas e aos núcleos de poboación. “Abadín segue á marxe dunha medida á que xa se incorporaron numerosos concellos da contorna. Non hai ningunha explicación razoable para continuar dándolle as costas a un instrumento esencial para reducir o risco e protexer as nosas aldeas”, criticou.
Medidas inmediatas e planificación anual
O PSdeG reclama ao Partido Popular que adopte medidas urxentes para garantir a existencia dunha brigada municipal contra incendios, que proceda á limpeza das faixas de seguridade e que formalice a adhesión do Concello ao plan de xestión da biomasa.
“Os veciños e as veciñas de Abadín non poden pagar ano tras ano as consecuencias da falta de planificación do alcalde. Isto non é un xogo: estamos falando da seguridade das persoas, das vivendas e do futuro do noso monte”, advertiu Díaz.
“Xa está ben de actuar tarde e mal. Esiximos medidas inmediatas e unha política de prevención seria, estable e planificada. Se se produce unha situación de emerxencia, Rancaño non poderá alegar descoñecemento, porque levamos anos advertindo deste problema”, concluíu.
Este ano, como novidade, as crianzas participantes neste programa están a desfrutar de sesións de inglés dunha forma lúdica, dinámica e divertida, grazas á colaboración da English School de San Cibrao. A través de xogos, cancións, actividades participativas e moita creatividade, os nenos e nenas reforzan a aprendizaxe do inglés nun ambiente distendido, fomentando a comunicación, a curiosidade e a confianza para expresarse noutra lingua.
A mostra reúne imaxes tomadas en Galicia, Cataluña, Aragón, Andalucía, Senegal e Escocia, ofrecendo un percorrido pola biodiversidade e polos vínculos entre distintos ecosistemas. O fotógrafo, naturalista especializado en ornitoloxía, invita a contemplar a natureza cunha mirada pausada e consciente a través de 50 especies de fauna. Permanecerá aberta ata o 29 de xullo.
O Grupo Sargadelos adquiriu todos os bens inmobles, maquinaria e fondo de comercio de Burelarte S.L. As naves, de máis de 3.000 m² e os terreos anexos, con máis de 4.000 m², destinaranse a ampliar e mellorar a capacidade produtiva das empresas do grupo. Ademais, Sargadelos integrará a maior parte da plantilla de Burelarte e tentará manter viva a marca BurelaRTe, recoñecida pola súa calidade no gres porcelánico, sempre que a autoridade laboral o permita.
Nesta ocasión contará, ademais de cos anfitrións A Subela, como grupo convidado ao Grupo Folclórico e Etnográfico do Cimeiro, procedente de Soure, en Portugal, que participa dentro dun intercambio cultural. A organización destaca que será unha edición especialmente significativa e anima ao público a non perdela. Terá lugar o 18 de xullo, ás 21:00 horas, na Praza Conde de Fontao, de Foz.
Polos micrófonos pasaron entre outras as concelleiras de Cultura e Turismo: Begoña Sanjurjo e Marta Saíz; o alcalde, Dani Vega; a pdta de Acisa, Carmen Cruzado; a dtra da Coral Polifónica de Ribadeo, Mari Carmen Rdez Cancelo; a pregoeira, María Xosé Porteiro ou Ángel Terry, membro do afamado grupo de son cubano, Estrellas de Buena Vista y más que foron os encargados de pechar o evento na xornada do domingo.
A alcaldesa, Dolores García Caramés, e o concelleiro Adrián Arias non quixeron perderse a cita e foron os encargados de facer entrega dos premios ás persoas gañadoras, felicitando a todos os participantes polo seu esforzo e polo gran nivel demostrado durante a competición. Desde o Concello de Cervo expresaron o agradecemento á Asociación Cabaleiros da Bidueira polo excelente traballo de organización, así como a todas as persoas colaboradoras, participantes e público asistente que fixeron posible o éxito desta terceira edición.
María José Gómez, participou este sábado nos actos de celebración do XI Ribadeo Indiano.
