O PSdeG denuncia que o Concello de Abadín publicou con oito días de atraso as probas da brigada contra incendios

Pablo Díaz critica que o Concello difundise o 16 de xullo unha resolución que fixaba para o día 8 as probas de selección do persoal

Abadín, 17 de xullo de 2026. O PSdeG de Abadín denunciou hoxe que o Goberno local do Partido Popular publicou este xoves 16 de xullo, un día despois da denuncia pública realizada pola formación socialista sobre a falta de brigada contra incendios, unha información relativa ao proceso de selección na que se anunciaban unhas probas que se celebrarían o mércores 8 de xullo, oito días antes da súa difusión.

“Publican o 16 de xullo unha información que anunciaba unhas probas para o día 8. Onde estaba cando tocaba? Non difundiron as listaxes, os prazos e as datas nas redes municipais cando eran útiles para as persoas aspirantes, e agora saen con este ridículo”, censurou o voceiro socialista, Pablo Díaz.

Díaz considera “especialmente grave” que a publicación se producise ao día seguinte de que o PSdeG denunciase nos medios de comunicación que Abadín afrontaba outro ano máis a época de maior risco de incendios sen brigada municipal. “Non é casualidade. “Saen agora a publicar isto despois de que nós denunciásemos nos medios de comunicación que Abadín quedaba outro ano máis sen brigada. Non é casualidade. Quitan o foco e fan como que se fixo todo ben. Pero non, a información estaba oculta ata que saltou a denuncia pública”.
“Isto é de traca. Non é un simple erro, é unha falta de respecto á veciñanza e ás persoas aspirantes. Mentres outros concellos xa teñen as súas brigadas traballando, en Abadín seguen dando pésimos espectáculos. Se o proceso se fixese a tempo, igual hoxe teriamos brigada, pero prefiren facer as cousas tarde, mal e a rastro”, afirmou.

As e os socialistas censuran tamén que o Concello destine 420 euros á administración da súa páxina de Facebook para acabar publicando información “cando xa perdeu toda utilidade para a veciñanza e para as persoas interesadas no proceso”.

O PSdeG reclama ao alcalde explicacións públicas sobre o desenvolvemento do proceso, sobre as datas reais de publicación das listaxes e das probas e sobre a situación actual da brigada municipal.

“Non nos poden tomar por parvos. Estamos falando dun servizo esencial para protexer as persoas, as vivendas e o noso territorio. Esiximos responsabilidades xa”, concluíu Díaz.