Balseiro di que o Concello de Ribadeo ten trámites aínda pendentes para abrir a residencia, non imputables a Xunta, e acusa ao Alcalde de demagogo

Ribadeo, 6 de febreiro de 2019.-O delegado territorial, José Manuel Balseiro, asegura que as queixas do alcalde de Ribadeo, Fernando Suárez, nas que sementa dúbidas sobre o proceder da Xunta para autorizar da apertura da nova residencia “son pura demagoxia”

“O que non ten ningún sentido é que a mesma persoa que tardou seis meses en solicitar á Xunta o permiso de actividade desde que remataron as obras da residencia, agora poña o grito no ceo porque a Xunta leva mes e medio estudando a documentación que desde o Concello presentaron”

Os medios de comunicación recollían que as obras de construción do edificio da residencia remataron a principios do mes de xuño –á falta de pequenos remates no exterior- e non foi ata mediados de decembro cando solicitou á Xunta este permiso.

Balseiro lembra ademais que para proceder á apertura da residencia de Ribadeo faltan aínda outros trámites pendentes, como son a selección de persoal e a adxudicación dos servizos do centro, “que aínda o Concello non completou, son exclusiva responsabilidade municipal e para os que non necesita a autorización da Xunta”.

Finalmente o delegado territorial recorda que Fernando Suárez sempre se negou á colaboración da Xunta en todo este proceso.

“Primeiro renunciando á posibilidade de concertar 40 prazas na residencia, que suporía unha achega de entorno a 700.000 euros anuais pagados pola Xunta. E, en segundo lugar, rexeitou o medio millón de euros que a administración autonómica estaba disposta a ofrecer porque nin tan sequera entregou a documentación que se lle pedía, nin fixo a xustificación oportuna”

Balseiro cre que si o alcalde de Ribadeo estivese nunha empresa privada xa estaría despedido “porque foi un mal negociador, en contra dos intereses dos seus veciños” e insiste en que pensar que a Xunta retrasa deliberadamente o permiso de inicio de actividade “é propio dunha mentalidade infantil ou moi retorcida”