O Alcalde de Foz valora positivamente as propostas de FpF para o orzamento municipal deste ano, pero pide que concreten en que festas queren recortar as achegas do Concello

Foz, 4 de abril de 2019. O alcalde de Foz, Javier Jorge Castiñeira, valora moi positivamente a reunión con Foz Plataforma de Futuro sobre o orzamento do Concello para este ano 2019, porque fan propostas positivas e viables, pero pide que concreten en que festas queren que se recorten as achegas do Concello. O rexedor anuncia que tratará de levar o novo orzamento, consensuado con FPF, a pleno a vindeira semana.
Javier Castiñeira declara: “desde o equipo de goberno do Concello de Foz valoramos moi positivamente a última reunión con Foz Plataforma de Futuro, concretamente o pasado martes, respecto aos orzamentos municipais do 2019, que quedaron encima da mesa no último pleno, aínda que puideron ser aprobados polo equipo de goberno co voto de calidade do alcalde. Pero tamén é ben certo que Foz Plataforma de Futuro ofreceuse para que eses orzamentos foran máis apoiados e nós aceptamos”.
O alcalde salienta que “o bo clima das negociacións. A verdade é que tanto Foz Plataforma de Futuro como o equipo de goberno sabemos a situación real destes orzamentos. En liñas xerais as propostas que fai Foz Plataforma de Futuro vémolas positivas, e se hai que poñer quizais algún pero sería ese recorte no capítulo das festas, de 48.000 euros sobre un orzamento inicial de 198.000 euros, cando eses cartos son os necesarios para as festas que se veñen facendo durante todos estes últimos anos. Nós dicímoslle a Foz Plataforma de Futuro, e a calquera outro partido político que queira recortar o capítulo de festas, que nos diga de que festas queren prescindir ou que festas queren reducir; e, loxicamente, que llo digan tamén ás comisións que levan tempo xa preparando toda a oferta de ocio do noso concello para todo este verán. É moi fácil dicir que se recorten festas, pero que despois sexa o Concello o que asuma rebaixalas, non facelas ou deixalas sen pagar. Sabemos que é moi probable que o que estea faga as festas igual que as fixo o equipo de goberno nestes últimos anos, en todo caso haberá algunha delas que quede fóra de contabilidade e teña as súas circunstancias para poder pagarse”.
Castiñeira engade que “con respecto ao resto de temas estamos contentos de poder chegar a un acordo con Foz Plataforma de Futuro e para a semana que vén trataremos de facer o pleno definitivo e con elo ter aprobado eses orzamentos antes da Semana Santa para poder aplicalos xa inmediatamente antes do verán. Hai un plan de emprego, que propón Foz Plataforma de Futuro, e se queremos que estea efectivo antes do verán hai que aprobar o antes posible estes orzamentos. Polo tanto estamos encantados de poder chegar a un acordo moi necesario nos orzamentos municipais”.