O Concello de Burela convidará á Raíña Letizia a asistir á final da Copa de fútbol sala feminino que se celebrará o 16 de xuño

Burela, 21 de maio de 2019. O Concello de Burela convidará de xeito oficial á Raíña Letizia a acudir á localidade o vindeiro 16 de xuño para a entrega da Copa da Súa Maxestade A Raíña de Fútbol Sala Feminino, que se vai disputar a partir a partires do 14 de xuño. O alcalde, Alfredo Llano, considera que esta visita sería moi importante para o deporte, para a comarca da Mariña e para Burela.
O rexedor dixo que “como é sabido este ano imos celebrar aquí en Burela a edición número 25 da Copa da Súa Maxestade A Raíña os días 14, 15 e 16 de xuño. Xa é a terceira edición, con esta, que se vai desenvolver no noso concello, polo tanto desde o propio Concello consideramos que é importante e unha oportunidade extraordinaria que veña a propia Raíña a entregar a Copa”.
Alfredo Llano subliñou que “imos facerlle unha invitación oficial desde o Concello á Súa Maxestade para que puidera, se é posible, vir entregar a Copa á final que vai ser o día 16. Sería unha boa oportunidade porque hai que darse conta que este ano por primeira vez chámase así, a Copa da Súa Maxestade A Raíña. Polo tanto xa que a nomenclatura é moi clara a invitación baséase en que é algo para darlle importancia e valor a este campionato, e tamén para que nos visite, veña a Burela, poder atendela da mellor maneira posible e contar con ela para darlle o valor enorme que ten esa Copa da Raíña cos oito equipos que van xogala, e penso que vai ser moi emocionante, se ademais puidera ver a Raíña sería un evento a lembrar. Así que imos facelo xa. A ver que nos responde, imos pensar que puidera vir e se é así sería extraordinario para o deporte, para a comarca e para Burela”.
Nova xuntanza da mesa de negociación
O alcalde burelés comentou tamén que “seguindo co procedemento que estamos a levar desde fai tempo na elaboración da relación de postos de traballo do Concello de Burela, que se está intentando que sexa consensuado na mesa de negociación do Concello, hai unha convocatoria para o xoves 23, ás once da mañá. Imos facer unha nova reunión onde se vai explicar un modelo de manual para a valoración dos postos de traballo, de cómo se fai a metodoloxía, que é o que se valora en cada posto, para determinar unha cuantificación en puntuación, que é outra cousa que se vai explicar, para valoración dos postos de traballo a incluír na RPT. Sería unha proposta inicial en puntuación, non respecto aos cartos, senón que vai ser primeiro unha explicación de cómo se fai para sacar esta conclusión en puntos, que métodos, que é o que se valora, como se sigue e se conforma, e despois darlle a cada posto de traballo unha valoración en puntos para iniciar as negociacións na mesa”.
Llano engadiu que “é un traballo que se ven facendo desde fai tempo, un traballo técnico rigoroso, hai que facer as cousas ben e ter unha boa proposta en firme e moi xustificada que nos sirva a todos para tela de referencia. Se esta reunión conclúe coa aceptación da forma de valorar e de realizar as propostas, iríamos avanzando xa de cara a sacar unha RPT definitiva para o noso Concello”.