O Alcalde de Foz e presidente da Mancomunidade da Mariña pide á xunta que facilite aos rexedores municipais información diaria dos casos de contaxiados de Covid-19 por concellos

 Foz, 5 de xullo de 2020. O alcalde de Foz e presidente da Mancomunidade de Municipios da Mariña, Fran Cajoto, pide á Xunta de Galicia que facilite aos rexedores municipais información diaria dos casos de contaxiados de COVID-19 por concellos e maior coordinación da administración autonómica coas forzas de seguridade para garantir que todas as medidas se cumpran.
Fran Cajoto explicou: “hoxe mantivemos unha reunión os compañeiros alcaldes co conselleiro de Sanidade da Xunta de Galicia e trasladounos as distintas medidas que se van adoptar a partir das 24:00 horas de hoxe nun DOG que sairá publicado esta mesma tarde. Estas medidas son por un prazo de 5 días e a máis importante de todas é o illamento da Mariña durante ese período. Vanse prohibir tanto as saídas como as entradas, salvo casos xustificados”.
Cajoto engadiu que “desde logo todos os concellos de Mariña, e en particular o de Foz, vamos colaborar activamente coa Xunta de Galicia, pero pedimos máis información: datos actualizados e oficiais diarios dos casos de contaxiados por municipios; que se nos traslade aos alcaldes esa información. Tamén pedimos unha maior coordinación por parte da Xunta de Galicia cos corpos e forzas de seguridade; téñenos que pasar protocolos para que tanto a Garda Civil como a Policía Nacional, a Policía Autonómica e a Policía Local actúen de forma coordinada para garantir que todas esas medidas se cumpran. Tamén pedimos un maior liderado por parte da Xunta porque é un momento no que hai que tomar as rendas e atallar o virus con eficacia”.
O alcalde de Foz e presidente da Mancomunidade da Mariña tamén fixo referencia aos establecementos de hostalería e do comercio local, “tan importantes na nosa comarca e concretamente en Foz, que reciben outro duro golpe despois do estado de alarma, no que tiveron que permanecer pechados. A economía vaise resentir e o que podemos facer desde os concellos e acompañar e axudar en todo o que sexa posible. Dar toda a información necesaria e, sobre todo, concienciar á poboación de que hai que usar sempre a mascarilla e hai que manter o distanciamento social. Depende da responsabilidade nosa, de todos os veciños, que atallemos este rebrote e que fagamos fronte ao virus para que non haxa máis porque sabemos que unha mala actuación provoca un novo peche, que ninguén queremos; que suframos unhas consecuencias tan duras por non actuar de forma axeitada”.