Burela, 3 de decembro de 2020. O alcalde, Alfredo Llano, agarda que o municipio recupere a mobilidade o sábado, é dicir que se levante o peche perimetral. O rexedor participou hoxe nunha xuntanza coas autoridades sanitarias e valora de xeito positivo o comportamento da veciñanza para tentar parar os contaxios por covid. Llano lembra que a hostalería abrirá mañá con restricións nos aforos tanto no interior como no exterior dos establecementos.
O alcalde burelés contou que “acabamos de rematar unha vídeo conferencia coas autoridades sanitarias e os Concellos de Viveiro, Monforte, Chantada e Vilalba. Estivemos analizando a situación, hai que destacar que Monforte e Viveiro van moi ben e Burela tamén estes días foi mellorando dunha forma espectacular. Agora mesmo andamos roldando entre 7 e 13 casos activos, pero xa van collendo as altas. E no hospital hai 3 casos. Imos evolucionando ben. Temos unha acumulada de 146, polo tanto estamos por debaixo de 150 casos. Iso implica entrar doutra maneira na normativa”.
Alfredo Llano explicou que “en principio se vai abrir a hostalería, a partires de mañá pola mañá e van estar abertos ata as once da noite. No interior poderá haber un 30% do aforo e fora un 50%. Tamén está permitido facer agrupacións de 6 persoas, sexan convivintes ou non, nos parques, andando ou facendo vida social”.
Para o rexedor burelés “é unha boa noticia. Penso que a hostalería e o comercio estarán contentos de recuperar a actividade dunha vez. Hai que ter en conta que Burela se sacrificou moito durante este mes de novembro. Practicamente da Mariña fomos os únicos que tivemos o peche perimetral e iso restou afluencia para moitas cousas. Destacar tamén que Burela é un pobo co que hai que estar contentos, dada a súa maneira de traballar en conxunto e grazas a esa colaboración global da veciñanza volvemos agora saltar a outro nivel. Foi un mes de sacrificio.”
O alcalde de Burela engadiu: “esperemos que agora xa esteamos nun punto que isto sexa bo indefinidamente e que poidamos pasar un Nadal entre todos ben e a gusto. Tamén agardo que se poida recuperar a mobilidade a partir do sábado, ao estar xa nunha posición optimista non temos porque estar diferenciados doutros concellos da Mariña”.
O Alcalde de Burela agarda que o municipio recupere a mobilidade este sábado
Relacionado
Pasados dez minutos das 15 horas deste martes, un particular alertou ao 112 Galicia dun coche envorcado fóra da vía en San Martiño de Ferreiros, Pol. Aconteceu no quilómetro 3 da LU-750, e a única persoa implicada permanecía atrapada no interior. De inmediato, desde o Centro Integrado de Atención ás Emerxencias activouse un operativo no que participaron Urxencias Sanitarias de Galicia-061, os Bombeiros de Vilalba, a Garda Civil de Tráfico e os servizos de mantemento da estrada. Os bombeiros actuaron para liberar á persoa, que foi evacuada en ambulancia polos profesionais sanitarios desprazados ata o lugar.
Ofreceranse as seguintes modalidades e horarios: adestramento de forza/funcional os luns e mércores ás 9.00 horas; pilates os luns e mércores ás 11.00 horas; e TRX os martes e xoves ás 9.00 horas. A inscrición e a información sobre estes cursos realizarase na recepción da Piscina Municipal. Ademais, durante este mes habilítase a opción de proba gratuíta.
O investigador achegarase a Ribadeo para falar sobre Urraca, considerada por moitos a emperatriz de todos os galegos e galegas. A entidade xa coñece o bo facer de Picallo, pois en anteriores ocasións participou como ilustrador nas presentacións das novelas Ao sur da liberdade e Entre a vontade e o destino, de Xosé Henrique Costas, deixando unha excelente impresión. Nesta ocasión, o público poderá escoitar ao Picallo historiador, que achegará novos datos sobre o reino de Galiza, unha realidade histórica que durante anos permaneceu agochada e que hoxe se recupera grazas a publicacións e investigacións como a súa.
A última xornada tivo lugar o sábado 7 de marzo no Local Social, coa disputa da final entre as dúas parellas clasificadas. A continuación celebrouse a tradicional cea e a entrega de premios ás tres primeiras parellas. Os equipos gañadores foron: 1º posto: Carlos e Toñito. 2º posto: Eladio e Santi. 3º posto: Tomás e Demetrio. A Xunta Directiva agradece a excelente acollida desta edición e expresa o seu desexo de seguir contando coa participación de todos nas vindeiras convocatorias.
No marco desta iniciativa, a asociación realizará o 6 de maio unha viaxe a Monforte, que incluirá visitas ao Museo do Ferrocarril ou ao Pazo de Tor, ao conxunto monumental de San Vicente do Pino, ao Centro do Viño da Ribeira Sacra e unha explicación exterior do Colexio de Nosa Señora da Antiga. As persoas interesadas en participar poden inscribirse entre o 10 de marzo e o 10 de abril chamando ao 660 47 72 30 ou escribindo ao correo vencelloburela@gmail.com.
Esta iluminación comezará acendendo en días sinalados, nos que se celebre ou queira darlle visibilidade a algún acontecemento. “Pareceunos un bo día este 8 de marzo, no que conmemoramos o Día da Muller, comezar o uso desta instalación”, explica a concelleiro de alumeado, Ángel Fernández Neira. “As letras de Foz son un signo de identidade do noso pobo e esta iluminación dálles unha nova vida”, explica o alcalde, Fran Cajoto.
Durante a visita, as representantes municipais fixéronlle entrega dun ramo de flores e compartiron con ela un momento moi agradable, celebrando xuntas esta data significativa. Con este xesto, o Concello quixo recoñecer e poñer en valor ás persoas maiores de Burela, que forman parte fundamental da comunidade e son depositarias da memoria, da experiencia e dos valores do municipio.
