Primeira Feminina. Pescados Rubén 9-1 Xaloc Alacant

 Burela, 5 de decembro, 2020. O Pescados Rubén Burela FS dedicou esta tarde un festival de goles xogando pola Igualdade e a Tolerancia, reivindicando o Non contra a Violencia de Xénero, ante o Xaloc Alacant (9-1), que chegaba á Mariña no fondo da táboa. Ademais do espectáculo sobre a pista, Vista Alegre por fin puido celebrar o regreso de público á Bancada Laranxa, despois de case un mes a porta pechada polas restricións Covid-19.

Toñi erixiuse na protagonista da cita desde o asubío inicial, cun Xaloc moi pechado; a meta alacantina tivo que intervir ata en catro ocasións no primeiro minuto. No minuto 3, Pescados Rubén inaugurou o marcador co pase de Cilene a Ale de Paz, conseguindo sortear a defensa visitante. Con asedio constante, Lara Balseiro, en parede con Dany, anotou o segundo no 7. Toñi mantivo ás súas no encontro gañando un man a man con Dany sobre o ecuador do primeiro acto. A punto estivo de chegar o cuarto, con Peque de cabeza ao segundo pau; tentárono de novo Ale de Paz, por partida dobre, e Leti. Foi entón cando chegou a oportunidade rival. O Xaloc puido xerar perigo á contra, con moita eficacia, culminando María a iniciativa de Eva Ortiz, no 16; dispuxeron segundos despois doutra oportunidade en estratexia. Cando parecía que estaba mellor o conxunto de Rubén López, o brillo de Peque achegouse pola rede alacantina. Non o conseguiu en primeira instancia pero en segunda tentativa o cuarto non se lle resistiu á incombustible internacional española, apoiada en Dany (minuto 18).

Quixo dar un paso adiante Xaloc no regreso, avalada coa solvencia na rede, con Verónica na segunda parte. A gardameta desartellou a Ale de Paz, Leti non puido chegar ao pase en dúas ocasións e un pouco máis tarde Cristina Poveda salvouna ante Peque. No 27, por fin chegou o quinto local, cun centro de Peque, en consonancia con Ale, que introduciu Elena no rexeite. Pouco traballou Sandra Buzón; a primeira chegada neste período para a escuadra alacantina protagonizouna precisamente a 12 no 29, pero fóiselle desviada. Intensificou aínda máis o Pescados Rubén o seu monólogo. Verónica freou o sexto no 33 primeiro ante Lara Balseiro, a pase de Elena Aragón, e pouco despois sacando os pés ante Bea Mateos. Con todo a 14 mariñá estivo moi atenta no 34 para recuperar fronte a Cristina nas proximidades da área visitante, superando despois a Verónica, por fin, e no 35, para sentenciar o rexeite servido por Cilene. Xaloc apostou por xogo de cinco e Burela aproveitou para subir o oitavo nunha mala saída visitante, co hattrick de Ale. A maxia de Cilene non podía faltar á cita, co definitivo 9-1, a falta de dous minutos.

Ficha técnica

Pescados Rubén Burela FS: Sandra Buzón, Cilene, Peque, Ale de Paz, M. Cortés, cinco inicial; tamén xogaron Cami, Lara Balseiro, Dany, Bea Mateos, Elena Aragón

Xaloc Alacant FS: Toñi, Cristina, Eva Ortiz, María, Cristina Poveda, cinco inicial; tamén xogaron Elena, Lara, Teresa, Lydia Vicente, Verónica

Goles: 1-0, minuto 3, Ale de Paz; 2-0, minuto 7, Lara Balseiro; 3-0, minuto 16, Ale de Paz; 3-1, minuto 17, María; 4-1, minuto 18, Peque; 5-1, minuto 27, Peque ( p. p. Elena); 6-1, minuto 34, Bea Mateos; 7-1, minuto 35, Bea Mateos; 8-1, minuto 37, Ale de Paz; 9-1, minuto 38, Cilene

Árbitros: Gallo Suárez // Hevia Campa. Por Burela amarela Peque (minuto 4), Bea Mateos (minuto 8). Por Alacant amarela a María (minuto 14), Lara (minuto 38)

Incidencias: Partido correspondente á xornada 8 de Primeira División Feminina disputado en Vista Alegre, co regreso do público ás instalacións. As Guerreiras Laranxas saltaron á pista co lema “Estáis con Nosotr@s” nas súas camisetas, como apoio ás súas compañeiras lesionadas de longa duración, Cely e Jenny.