‘Ribadeo, prepara o teu camiño’ o catálogo interactivo de produtos e servizos para o peregrino no que participan medio cento de empresas locais

Ribadeo, 5 de xullo de 2021. O parque de San Francisco acolleu esta mañá a presentación de Ribadeo, prepara o teu camiño, un catálogo interactivo de produtos e servizos para o peregrino no que participan medio cento de empresas locais. No acto compareceron o alcalde, Fernando Suárez, e o concelleiro de Turismo, Pablo Vizoso. E asistiron representantes das firmas adheridas, que se converten en Establecementos amigables co peregrino. Grazas ás novas tecnoloxías os camiñantes poderán selar as súas credenciais cos seus dispositivos móbiles.

Vizoso Galdo explicou que “este proxecto, que naceu hai uns meses promovido polo Concello e que lle puxemos como denominación Ribadeo, prepara o teu Camiño, hoxe ve oficialmente a luz, despois de moitas horas de traballo, vicisitudes e as complicacións dos últimos meses, que todos coñecedes”.

O edil ribadense lembrou que “forma parte doutro proxecto tamén desenvolto polo Concello, o obradoiro Ribadeo Alén do Camiño, e nace cando nos paramos na Concellería de Turismo a analizar o que podemos considerar unhas evidencias: en primeiro lugar que o Xacobeo 2021, ampliado ao 2022, ía constituír unha oportunidade marabillosa e excepcional, de gran repercusión internacional, para poñer en valor as nosas costumes, a nosa forma de ser, a nosa paisaxe, pero tamén o noso bo saber e o noso oficio; a segunda evidencia era que o Camiño Norte a Santiago, que foi declarado pola Unesco Patrimonio da Humanidade hai uns anos, ten en Ribadeo un dos puntos significativos do seu percorrido porque Ribadeo é a porta norte desde camiño, é a entrada en Galicia do Camiño do Norte cara a Compostela; a terceira evidencia é que se trata dun camiño en crecemento constante porque esta ruta é a terceira en importancia, tanto só por detrás do Camiño Francés e do Camiño Portugués; e a cuarta evidencia é que o perfil do peregrino actual correspóndese co dunha persoa que cada utiliza máis internet, as novas tecnoloxías, para consultar e buscar datos sobre o Camiño e para preparar e organizar o seu itinerario. Por iso sabíamos que había que estar nese ámbito, en internet e nas novas tecnoloxías, dar a información directa e especial que busca o peregrino nunha web ben posicionada”.

O concelleiro de Turismo dixo: “e todo isto había que facelo dunha maneira singular, dunha forma diferente, situando como protagonista principal ao peregrino, que o é, pero tamén contando con que cada un dos vosos establecementos, no número maior posible, sexades tamén os protagonistas deste proxecto. E isto ten unha tripla finalidade: en primeiro lugar desenvolver unha serie de produtos e servizos pensados especificamente para o peregrino; potenciar a imaxe de Ribadeo como punto de inicio do Camiño; e a terceira, desenvolver un modelo de xestión sostible cos valores do Camiño de Santiago e da figura do peregrino e que iso funcionase todo como un eixo vertebrador, como núcleo central, de todo ese proceso de deseño e de concentración dos produtos especiais”.

Pablo Vizoso subliñou que “con ese fin creamos un catálogo denominado Ribadeo prepara o teu Camiño, que é interactivo, accesible a través dun sistema web, onde aparece información detallada de cada un dos establecementos, os datos de contacto, os produtos que ofrecen e tamén información moi particularizada desa gama de produtos específicos e pensados especialmente para o peregrino. En definitiva o que lles estamos transmitindo aos peregrinos que escollen o Camiño Norte é que aquí, en Ribadeo, van poder atopar todo canto necesitan, ou ben para iniciar o camiño e tamén para aqueles que non nos escollen como inicio, pero estamos convidándoos dalgunha maneira para que pasen e prolonguen a súa estadía en Ribadeo e que desfruten dunha gama completísima de servizos que entre todos lles ides ofrecer. E iso complementado por unha oferta gastronómica de enorme calidade e unha importantísima infraestrutura de aloxamentos de diferente tipo”.

O concelleiro de Turismo e Desenvolvemento Local seguiu a relatar que “hoxe este catálogo conta xa con case medio cento de participantes, pero non é un proxecto pechado. Todo o contrario, é un proxecto aberto co que o Concello pretende ir periodicamente actualizando os datos e incorporando novos participantes, novos establecementos adheridos. Outro dos obxectivos deste proxecto é que implantedes nos vosos establecementos un distintivo que denominamos Establecemento amigable co peregrino porque, ademais de facilitarlle as cousas ao peregrino a nivel informativo, trasládase unha imaxe de mellor identificación de Ribadeo cun entorno confiable e que respecta os valores do Camiño de Santiago. E por último neste proxecto tamén se inclúe un selo individualizado para cada un dos vosos establecementos, que lle permitirá ao peregrino selar a súa credencial de forma cómoda e áxil e, sobre todo, vainos permitir en conxunto prestarlle un mellor servizo e información”.

O alcalde, Fernando Súarez, manifestou que “estamos afanados en seguir dando a coñecer o noso concello e a nosa comarca, loxicamente. Pretendemos vender o mellor de nós, que temos moito. Hoxe estamos aquí polo Camiño de Santiago, mañá estaremos por outras cousas porque Ribadeo ten moito que vender e é un punto obrigado de chegada, de partida, de paso e de encontro, iso por riba de todo”.

O rexedor destacou que “quixemos utilizar a potencia das novas tecnoloxías para darlle unha volta e facelo máis atractivo para o peregrino. Estamos aproveitando o bo facer dun obradoiro, que funciona de maneira marabillosa, con xente cualificada e capacitada, que aparte de traballar para formarse estannos axudando nun proxecto complexo e que vai durar moito máis aló que o propio obradoiro.

Quixemos aproveitar as novas tecnoloxías para poder facer o que ata agora era unha quimera. Cando un peregrino chegaba a un concello tiña que asinar o selo para conseguir a Compostela en Santiago: ou tiña que ir á casa do cura ou a un determinado sitio, como a igrexa, etcétera. Agora vamos dar un cambio notable porque vosoutros, como hospitaleiros, podedes ter á vosa disposición no voso establecemento para que alguén cun código QR e un móbil, que todo o mundo ten, á unha da tarde ou ás cinco da mañá poida dicir eu marco aquí e xa quedei cumprido e acreditarei cando chegue a Santiago que polo menos por Ribadeo pasei. Iso é algo que ata hai moi pouco tempo non se podía facer e agora pódese por moitas cousas: polas persoas do obradoiro e porque vosoutros tamén vos implicades pois, como dicía Pablo, é unha honra empezar este proxecto aberto, vivo e que seguramente se vai ir mellorando e complementando, con medio cento de hostaleiros e comerciantes que apostan por esta cuestión”.

Para Fernando Suárez “é algo práctico que contribúe a ir facendo un sumatorio: o voso bo servizo e as posibilidades tecnolóxicas para seguir dando a coñecer o noso concello. Penso que esta iniciativa pioneira, polo menos na comarca, seguramente vai ter moita incidencia”.