SANTIAGO .- O Consello da Xunta aprobou o decreto de medidas urxentes polo que regula a concesión de axudas para a reparación dos danos causados polas inundacións nos concellos de Alfoz, Barreiros, Burela, Cervo, Foz, Lourenzá, Mondoñedo, Ourol, A Pontenova, Ribadeo, Trabada, O Valadouro, Viveiro, O Vicedo e Xove na provincia de Lugo e Cariño e Ortigueira na de Coruña.
Nota de Prensa
O CONSELLO DA XUNTA APROBA O DECRETO DE MEDIDAS URXENTES POLO QUE DARÁ AXUDAS A 17 CONCELLOS PARA A REPARACIÓN DOS DANOS CAUSADOS POLAS INUNDACIÓNS
# ?
# Os concellos destinatarios da axudas son Alfoz, Barreiros, Burela, Cervo, Foz, Lourenzá, Mondoñedo, Ourol, A Pontenova, Ribadeo, Trabada, O Valadouro, Viveiro, O Vicedo e Xove na provincia de Lugo e Cariño e Ortigueira na de Coruña ?
Daranse axudas por danos causados en vivendas e enxoval doméstico, en establecementos comerciais, industriais, turísticos e mercantís, nas explotacións agrícolas e ás entidades locais
O Consello da Xunta aprobou hoxe na súa xuntanza semanal o decreto de medidas urxentes para a reparación dos danos causados polas inundacións acaecidas na Mariña lucense durante os días 9 e 10 de xuño de 2010, que causaron danos en diversos bens de titularidade pública e privada. O decreto foi aprobado tras analizar o informe sobre os danos elaborado pola Axencia Galega de Emerxencias (Axega).
As axudas previstas neste decreto aplicaranse á reparación dos danos e perdas polas inundacións nos termos e nas contías que se establezan neste así como nas correspondentes disposicións de convocatoria que o apliquen. Os termos municipais e núcleos de poboación afectados aos que concretamente lles serán de aplicación ditas axudas serán, na provincia de Lugo: Alfoz, Barreiros, Burela, Cervo, Foz, Lourenzá, Mondoñedo, Ourol, A Pontenova, Ribadeo, Trabada, O Valadouro, Viveiro, O Vicedo e Xove. Na provincia da Coruña, inclúense Cariño e Ortigueira.
O decreto aprobado hoxe establece na súa disposición derradeira que se impulsará a creación dunha comisión coa Administración do Estado, a Deputación Provincial de Lugo e a da Coruña e as administracións locais afectadas, co fin de determinar as cantidades que achegarán por cada unha delas para a asunción de danos e, se é o caso, o sinalamento e identificación dos que serán reparados ou sufragados por cada administración.
A concesión de axudas terá carácter subsidiario respecto de calquera outro sistema de cobertura de danos, público ou privado, do que poidan ser beneficiarios os afectados. Non obstante, cando os mencionados sistemas non cubran a totalidade dos danos producidos, as axudas previstas neste decreto concederanse con carácter complementario e serán compatibles en concorrencia con outras subvencións, indemnizacións, axudas, ingresos ou recursos, procedentes de sistemas públicos ou privados, estatais ou internacionais, ata o límite do valor do dano producido.
O decreto faculta aos distintos titulares dos departamentos autonómicos para que diten as ordes necesarias para o seu desenvolvemento. Así, corresponderán ao Instituto Galego de Vivenda e Solo as axudas por danos causados en vivendas e instalacións complementarias; mentres que as axudas para compensar os danos sufridos en establecementos comerciais, industriais, turísticos e mercantís corresponderá á Consellería de Economía e Industria e á Consellería de Cultura e Turismo.
Pola súa banda, a Consellería do Medio Rural é a competente para habilitar as axudas por danos nas explotacións agrícolas e gandeiras e as axudas ás entidades locais ou actuacións directas sobre os seus bens corresponden á Consellería de Presidencia, Administración Públicas e Xustiza, á de Medio Ambiente, Territorio e Infraestruturas, á de Economía e Industria, á de Cultura e Turismo e á do Medio Rural, no ámbito das súas respectivas competencias e funcións.
Poderán solicitar as axudas as persoas físicas propietarias de vivendas que sufrisen danos que afecten tanto o inmoble como o enxoval. Así mesmo, poderán facelo os titulares dos establecementos comerciais, mercantís, industriais, turísticos e deportivos en que se producisen danos derivados directamente do temporal. Tamén poderán solicitar axudas polos danos sufridos os titulares de explotacións agrícolas e gandeiras e as corporacións locais.
Antecedentes
A existencia de situacións de emerxencia de natureza catastrófica como as acontecidas na Mariña pode traer consigo danos con repercusión no ámbito económico e social, o que fai necesario articular mecanismos de colaboración e cooperación entre todas as administracións implicadas. Xa o propio ditame do Comité das Rexións (2010/C 79/04) establece a necesidade dunha resposta inmediata e directa ante a existencia de calquera situación de natureza catastrófica.
O artigo 38 da Lei 5/2007, do 7 de maio, de emerxencias de Galicia, prevé a actuación das administracións públicas na medida das súas competencias para a rehabilitación dos servizos esenciais para a comunidade que foran afectados pola situación de emerxencia, así como o establecemento de axudas en atención ás necesidades derivadas das ditas situacións cando teñan natureza catastrófica.
Axudas por danos causados en vivendas e enxoval doméstico
Serán obxecto de axuda os danos causados polas inundacións na vivenda que constitúa a residencia permanente e habitual dos seus moradores e nas súas instalacións complementarias. Poderán recibir axudas ata o 100% do valor de reparación ou reposición do inmoble danado, sen que o importe da axuda, en conxunto, poida superar o límite do 75% do prezo de venda dunha vivenda protexida de réxime xeral na mesma localidade.
Os danos no resto das vivendas poderán recibir axudas ata acadar o 40 por cento do valor de reparación ou reposición do inmoble danado, aínda que en ningún caso poida superar o 40% do 75% do prezo de venda dunha vivenda protexida de réxime xeral na mesma localidade.
Serán igualmente obxecto de axudas os danos sufridos no enxoval doméstico de primeira necesidade cando non estivesen incluídos nas axudas que para o mesmo efecto puidesen aprobar outras administracións.
Axudas por danos sufridos en establecementos comerciais, industriais, turísticos e mercantís
Serán obxecto de axuda os danos provocados nos establecementos comerciais, industriais, turísticos ou mercantís como consecuencia dos estragos ocasionados polas inundacións nas súas edificacións, instalacións, maquinaria e nas mercadorías neles depositadas, así como nos vehículos comerciais ou industriais afectos a estas actividades.
Axudas por danos nas explotacións agrícolas ou gandeiras
Serán obxecto de axudas os danos sufridos polos titulares de explotacións agrícolas ou gandeiras que, tendo pólizas en vigor amparadas polo correspondente Plan de seguros agrarios combinados, sufrisen perdas superiores ao 30 por 100 da súa produción, de acordo cos criterios establecidos pola Unión Europea a este respecto.
Axudas ás entidades locais
Serán obxecto de axudas ou de actuación directa sobre os bens afectados, segundo os casos, os danos provocados en infraestruturas locais non previstos nas axudas que para o efecto puidesen aprobar outras administracións, así como os gastos extraordinarios en que incorresen como consecuencia directa das inundacións. As axudas terán, en todo caso, carácter complementario ás que sexan aprobadas por outras administracións. Quedan excluídas as infraestruturas de xeración, transporte e distribución de enerxía eléctrica.
Pasadas as 13:30 horas deste luns, o 112 Galicia tivo constancia, a través de Urxencias Sanitarias de Galicia-061, dun ciclista que se atopaba en parada cardiorrespiratoria no quilómetro 1 da LU-151, á altura da parroquia de Fazouro. De inmediato, os xestores do Centro Integrado de Atención ás Emerxencias solicitaron a colaboración dos axentes da Garda Civil de Tráfico e da Policía Local de Foz. Malia os esforzos, os profesionais sanitarios só puideron confirmar o falecemento da persoa.
A variada oferta de produtos de artesanía e de alimentación de temporada e proximidade á venda complementouse con degustacións de minihamburguesas de carne de raza Limiá e empanada de carne de porco celta e tenreira de raza Caldelá, que se repartiron gratuitamente entre as peroas que fixeron algunha compra no Mercadiño.
Os cortes produciranse do punto quilométrico 2,800 ao final da vía. Habilitaranse desvíos alternativos que estarán debidamente sinalizados.
Cada participante pode presentar unha única fotografía, en papel e formato dixital, seguindo as bases dispoñibles na web da Deputación. A celebración do aniversario inclúe actividades como a Xornada de Degustación da Tenreira de Ancares, unha xornada micolóxica e un obradoiro de rescate na montaña, ademais doutras propostas ambientais e divulgativas nos próximos meses.
A xornada comezará ás 12:00 h cun faladoiro titulado “Vizoso e nós”, no que participarán Pepe Penabade, Pepe Blanco, Caxigueiro, Aurelia Balseiro e Mª Cristina Rubal González, moderados por Antonio Reigosa. Ás 13:20 h abrirase a exposición “Xosé Vizoso. O neno que debuxou un cabalo”, que permanecerá dispoñible durante as festas de San Lucas. A partir das 13:45 h terá lugar o acto de inauguración e descuberta da placa da nova rúa Xosé Vizoso, na Praza da Fonte Vella, coa presenza de autoridades, familiares e amizades do artista. As persoas asistentes recibirán no auditorio unha lámina cunha obra de Vizoso como agasallo.
Competirán durante tres días xunto a outras dezaseis escolas de todo o mundo, elaborando catro propostas de pizza: Polbo á galega, con polbo galego, queixo San Simón e allada picante; Bosque galego, con crema de castañas e mel picante; Terra meiga, con zorza picante; e Rapadoira, con setas, queixo azul e pera. As estudantes viaxan acompañadas pola súa profesora, Conchi Carreiras, coa que levan tempo preparando as receitas. Esta é a terceira participación do IES de Foz neste certame, no que xa acadaron un segundo posto en edicións anteriores. A actividade forma parte do programa Erasmus+ da FP, financiado pola Unión Europea, que facilita a participación do alumnado en competicións de habilidades profesionais por toda Europa.
A exposición, instalada no Centro Comarcal Pazo de San Tomé, invita a observar con calma, descubrir historias e poñer en valor un patrimonio vivo que forma parte da nosa identidade. Unha maneira diferente de achegarnos ao mundo rural que tanto significa para As San Lucas.
