TRABADA .- A Sociedade Agraria de Transformación Monte Trabada recibiu o segundo premio da VII Edición dos Premios Agader ás Iniciativas de Desenvolvemento Rural polo seu Plan de Xestión Integral do Monte da Concentración Pública de Trabada. Un proxecto pioneiro en Galicia que incide sobre 1.000 hectáreas e beneficia a 235 propietarios. O presidente da Xunta, Alberto Núñez Feijóo, asistiu ao acto de entrega, no que estivo acompañado polo conselleiro do Medio Rural, en Nogueira de Ramuín, Ourense.
Nota de Prensa
“Unha Galicia sen un rural forte será sempre unha Galicia mancada”, subliña
FEIJÓO DESTACA OS “NOVOS INSTRUMENTOS” DA XUNTA PARA INCREMENTAR A FORZA DO MEDIO RURAL GALEGO E DESBOTA “VISIÓNS PATERNALISTAS”
* “Fronte a visións paternalistas é preciso darlle protagonismo a medidas valentes e imaxinativas que nos permitan saír das dificultades e seguir adiante”, asevera
* Avoga por potenciar o medio rural e por iso, remarca, “cada una das nosas preocupacións vai seguida dunha decisión”
* Pon como exemplo a aprobación dun Plan para o sector lácteo con máis de 800 millóns de euros; a posta en marcha da marca de calidade do leite galego; a renovación da Lei de Montes; a creación dunha nova figura de xestión forestal ou outras iniciativas encamiñadas a reducir a fenda entre o rural e o urbano
* “O noso sector primario foi desventurado en moitos momentos do seu pasado, pero ten a fortuna de poder ambicionar un porvir esperanzador”, sinala
* Salienta que para conseguir este futuro “cómpre ter presente que cando falamos do rural falamos de moitas cousas: de agricultura, de gandería e de aproveitamento forestal pero, por riba de todo, falamos de persoas”
* Felicita aos galardoados hoxe cos Premios Agader –Casa Museo A Solaina, Sociedade Agraria de Transformación Monte Trabada, ASPANAES, SAUDETER, APACAF e CAURELOR- “por facer do rural un lugar máis próspero e máis orgulloso de si mesmo”
Nogueira de Ramuín (Ourense), 14 de xullo de 2010.- O presidente da Xunta, Alberto Núñez Feijóo avogou hoxe por potenciar o medio rural galego dándolle “novos instrumentos para que siga adiante coa mesma forza que sempre” e evitando actitudes “paternalistas que servirían de ben pouco”. “Fronte a visións paternalistas é preciso darlle protagonismo a medidas valentes e imaxinativas que nos permitan saír das dificultades e seguir adiante”, aseverou.
No acto de entrega da VII Edición dos Premios Agader ás Iniciativas de Desenvolvemento Rural, no que estivo acompañado polo conselleiro do Medio Rural, o mandatario galego insistiu en que non nos podemos conformar “coa identidade rural que temos configurado ata os nosos días” xa que, argumentou, “de pouco nos servirá se non poñemos en marcha as claves que nos axuden a asentar a nosa posición en España, en Europa e no mundo”.
“Unha Galicia sen un rural forte será sempre unha Galicia mancada”, subliñou. “Quizais iso non importe moito nalgúns centros de decisión de Madrid ou Bruxelas; pero a nós si que nos importa; impórtalle a quen ten unha explotación, unha horta, un monte; impórtalle aos empresarios que distribúen os noso produtos; e impórtalle á Xunta de Galicia”. Por iso, agregou Feijóo, “cada unha das nosas preocupacións vai seguida dunha decisión”.
Como exemplo desta política e do compromiso do Executivo que preside co agro galego lembrou a aprobación dun Plan para o sector lácteo dotado con máis de 800 millóns de euros; a posta en marcha da marca de calidade do leite galego; a renovación da Lei de Montes; a creación dunha nova figura de xestión forestal; ou outras iniciativas encamiñadas a reducir a fenda existente entre o mundo rural e o urbano, como o Plan de Banda Larga, os Plans Impulsa Lugo e Impulsa Ourense, a modificación da Lei do Solo ou o Plan Move.
Un rural con moito que achegar
Na súa intervención, Alberto Núñez Feijóo considerou que o rural galego “aínda ten moito que achegar” e lembrou que “lonxe daqueles que ven nas aldeas un modo de vida antigo” nelas radica “un fondo de creatividade e unha consistencia que –dixo- ten moito que ver con desenvolvemento cultural, social e, por suposto, económico de Galicia”. “Do contrario –engadiu-, non se entendería que daquela economía de subsistencia de antano pasaramos a xuntar dúas palabras outrora case antagónicas para formar un único concepto: desenvolvemento e rural”.
“O noso sector primario foi desventurado en moitos momentos do seu pasado pero ten a fortuna de poder ambicionar un porvir esperanzador”, sinalou Feijóo amosando tamén a súa confianza en que o rural “pode ser competitivo e sostible”. Pero para iso, advertiu, é preciso, en primeiro lugar, “ser, existir como tal e manter a súa identidade”. “Para que isto sexa posible cómpre ter presente que cando falamos do rural falamos de moitas cousas: de agricultura, de gandería e de aproveitamento forestal pero, por riba de todo –subliñou- falamos de persoas. O factor humano é o máis valioso recurso do noso mundo rural, o seu valor supremo”, incidiu.
Os galardoados cos Premios Agader
Por iso se congratulou da entrega dos Premios Agader ás Iniciativas de Desenvolvemento Rural que nesta sétima edición premiaron seis proxectos “de heroes individuais ou colectivos que fan do rural un lugar máis próspero e máis orgulloso de si mesmo”.
O primeiro destes premios recaeu, nesta ocasión, na Fundación Casa Museo A Solaina de Piloño, situada no concello pontevedrés de Vila de Cruces a quen Feijóo lle agradeceu “que o seu –que tamén é o noso- se perpetúe no tempo”. Esta Fundación, de interese cultural galego, leva 25 anos organizando eventos culturais relacionados coa pintura, a música ou o teatro desde o rural.
O segundo premio, concedéuselle á Sociedade Agraria de Transformación Monte Trabada, “que tanto fai polo mantemento da nosa riqueza forestal e pola superación de minifundismos desatinados”, polo seu Plan de Xestión Integral do Monte da Concentración Pública de Trabada. Un proxecto pioneiro en Galicia que incide sobre 1.000 hectáreas e beneficia a 235 propietarios.
A Asociación de Pais de persoas con trastorno do Espectro Autista (ASPANAES), con sede na localidade coruñesa das Pontes de García Rodríguez, recibiu o terceiro premio en apoio ao seu labor con persoas con esta enfermidade en toda Galicia e porque ten conseguido que entidades públicas e privadas se mobilizasen para ofrecer oportunidades reais para as persoas que sofren esta doenza. O cuarto e quinto dos galardóns foron, respectivamente, para a iniciativa Mellorando a túa saúde, de SAUDETER, S.C., de Verín, e para a candidatura presentada pola Asociación de Pais de persoas con Trastorno do Espectro Autista en Centros de Apoio Familiar (APACAF), con centros nas localidades pontevedresas da Estrada e Moraña. A estas tres organizacións, o presidente da Xunta déullelas grazas “por achegar coidados, benestar e dignidade ás xentes do rural”.
Da empresa artesá de transformación de produtos agroalimentarios CAURELOR, situada en Folgoso do Courel, e que recibiu o Premio especial para mozos de Agader, o presidente da Xunta destacou a posta en valor da produción agroalimentaria galega, en particular, da castaña e con ela, dixo, “da nosa marca máis próspera, que é a marca Galicia”. Actualmente, esta empresa distribúe os seus produtos de fabricación 100% ecolóxica en tendas de delicatessen de Madrid, Barcelona e varios puntos de Galicia.
Segundo explicou o conselleiro do Medio Rural, Samuel Juárez, na súa intervención, os Premios Agader pretenden “animar á participación pública e privada no proceso de desenvolvemento rural e contribuír á conservación e dinamización do contorno rural facendo del un ámbito máis atractivo”. Tratan, incidiu, de recoñecer aquelas actuacións que fomentan a xeración dunha sociedade rural “máis viva e cohesionada”.
Samuel Juárez, destacou, ademais, a pluralidade que caracteriza ás entidades e persoas galardoadas hoxe. “Representades unha selecta escolma de loables iniciativas que amosan, o carácter plural que ten o rural galego e que demostran que é posible dinamizar este medio non só a través dos sectores produtivos tradicionais, senón potenciando nel todas as facetas da actividade económica, social e cultural, concluíu.
O lume iniciouse ás 14.51 horas e para a súa extinción mobilizáronse, polo de agora, 2 técnicos, 7 axentes, 11 brigadas, 12 motobombas, 1 pa, 5 helicópteros e 7 avións.
Os subcampións foron Benja e Álvaro. O torneo reuniu no Real Club Náutico arredor dun centenar de xogadores procedentes de Galicia, Asturias e Castela e León, consolidándose como unha das citas máis destacadas do calendario musístico da costa lucense. Desde LuMus agradecen “el apoyo del Concello de Ribadeo, del Real Club Náutico de Ribadeo, de Mapfre y del resto de colaboradores y patrocinadores que hicieron posible esta cita, que dio comienzo a primera hora de la mañana y se prolongó durante toda la jornada del sábado”.
O festival De Cabo a Cabo, organizado por Fanto Fantini cunha achega provincial de 20.000 €, puxo en valor a diversidade cultural de Burela, onde o 10% da poboación é de orixe caboverdiana. A programación espallouse por varios espazos da vila con música, intervencións artísticas e torneos deportivos, e contou coa presenza de artistas como Baiuca, DJ Danifox, DJ Kandole, Batuko Tabanka, Lilaina ou Saya. A contribución da Deputación permitiu cubrir a infraestrutura técnica e loxística, así como os custos de organización e contratación das actividades.
Esta cita, xa consolidada dentro da programación estable do centro, permitirá ao público gozar dunha mostra do traballo artístico e formativo desenvolvido ao longo do curso polo alumnado da especialidade. A actividade constitúe unha oportunidade para achegar a danza á cidadanía e poñer en valor o esforzo, a dedicación e a evolución das alumnas e alumnos participantes.
O Concello destaca que este novo éxito é froito do compromiso, do esforzo e da dedicación constante do deportista, cualidades que lle permiten seguir acadando resultados destacados a nivel estatal. Desde a entidade municipal transmítense os parabéns a González Villares por este subcampionato de España.
A proba, organizada polo CP Altrúan, reuniu máis de 130 palistas dos seis clubs lucenses de augas tranquilas que participan na competición: o propio Altruán, o CD San Ciprián, o Club Kayak Foz, o CP Viveiro Urban Hotel, o Cidade de Lugo e o Club Fluvial de Lugo. O deputado de Mocidade Daniel García entregou os premios da proba, na que Club Fluvial de Lugo, Cidade de Lugo e Altruán coparon o podio por equipos. A Copa Deputación de Piraguismo, que conta de 6 regatas, organízase no marco da colaboración que a Vicepresidencia da Deputación de Lugo mantén coa Federación Galega de Piragüismo para a promoción deste deporte, ofrecendo aos clubs a posibilidade de participar en competicións federadas nas súas comarcas e contribuíndo así á consolidación de equipos de base.
Malia a intensa calor, o pavillón encheuse de público para gozar das actuacións das numerosas alumnas, que ofreceron exercicios individuais, por parellas e en grupo, destacando pola súa beleza e dificultade técnica ao ritmo da música escollida. Ao remate, a concelleira Ana Rubal entregou medallas ás participantes, que tamén agradeceron o traballo e os valores transmitidos pola súa monitora, Lorena Fernández. Lémbrase que a festa de clausura das Escolas Deportivas terá lugar o luns 29 ás 19:00 horas, nun acto conxunto co Concello de Alfoz, no que haberá diversas actividades de celebración e a entrega de diplomas.
