Ribadeo, 29 de setembro de 2022. No pleno ordinario do vindeiro luns, 3 de outubro, tomará posesión do seu cargo como concelleiro David Rivas Peña, en substitución de Mariluz Álvarez Lastra. Na sesión abordarase a adhesión a dous programas europeos, un destinado á rehabilitación de vivendas en Rinlo e Ribadeo e outro á restauración dos hábitats costeiros de flora autóctona na Devesa, en Rinlo e en Vilaframil, segundo deu a coñecer o alcalde, Fernando Suárez.
O rexedor contou que “neste pleno ordinario, que celebraremos o vindeiro luns, son varios os asuntos de interese que se tratarán. O primeiro deles é a toma de posesión do concelleiro electo polo BNG David Rivas Peña, que vai substituír á compañeira Mari Luz Álvarez Lastra, que renunciou á acta na anterior sesión da Corporación”.
Fernando Suárez explicou que “un dos puntos que abordaremos nesa sesión plenaria é a solicitude para que o noso Concello siga a ser un referente en materia de rehabilitación de vivenda e polo tanto solicitar a adhesión a un novo programa financiado pola Unión Europea-NextGenerationEU, para a anualidade 2022 destinado as áreas de Rinlo e Ribadeo, coordinadas coa Xunta de Galicia e co Estado”.
O alcalde dixo que “outro dos puntos é o convenio de colaboración co veciño Concello de Trabada no tocante ao subministro de auga a varias parroquias dese concello a través da acometida municipal de Ribadeo, que toma a auga precisamente desde o río Eo, no lugar de Vilarbetote. Trátase dun novo paso para normalizar e afianzar os compromisos mutuos de boa vecindade que redundan sempre na mellora dos servizos públicos para os veciños e para as veciñas.Tamén outro convenio, neste caso cos Concellos de Barreiros, Trabada e A Pontenova, orientado a accións contra as adiccións ás drogas, especialmente, da xente moza”.
Suárez Barcia seguiu a relatar que “outro dos puntos é a nova solicitude dun novo proxecto europeo, que coñecemos como Life Global, e sería xa a terceira candidatura pois as dúas anteriores non acadaron a puntuación necesaria para obter o financiamento comunitario. Este proxecto segue a estela do Life Fluvial, que está a rematar, e co que se expropiaron nestes últimos tempos terreos na marxe galega da ría de Ribadeo para poñer a disposición de Conservación da Natureza e para actuacións medio ambientais. De aí que se substituísen eucaliptos por frondosas desde As Aceas ata practicamente o inicio da traza do tren mineiro de Ribadeo a Vilaoudriz. Agora trátase de pedir financiamento para adquirir unha serie de parcelas que lindan co mar, na parroquia da Devesa, singularmente no que é o entorno das Catedrais, e tamén en Rinlo e máis en Vilaframil. En definitiva, proponse a compra de 25 parcelas que ocupan unhas catorce hectáreas no seu conxunto. A finalidade é lograr a restauración dos hábitats costeiros de flora autóctona”.
Dez minutos antes das 21:30 horas do xoves, o 112 Galicia foi informado polo persoal de Adif dun tren detido no medio dun túnel en Mogor, Mañón, debido a unha chapa metálica no medio da vía. Así, aínda que as doce persoas que viaxaban a bordo estaban ilesas, precisaban medios de rescate para baixalas do convoi e desprazalas ata o apeadeiro máis próximo. Nestas tarefas colaboraron a Garda Civil, os Bombeiros do Eume, o GES de Ortigueira e os voluntarios de Protección Civil de Mañón. Finalmente, as persoas foron rescatadas e evacuadas a outro tren, que as levou ata o apeadeiro sen maiores complicacións. Desde alí, continuaron a súa viaxe en taxi.
Competirán durante tres días xunto a outras dezaseis escolas de todo o mundo, elaborando catro propostas de pizza: Polbo á galega, con polbo galego, queixo San Simón e allada picante; Bosque galego, con crema de castañas e mel picante; Terra meiga, con zorza picante; e Rapadoira, con setas, queixo azul e pera. As estudantes viaxan acompañadas pola súa profesora, Conchi Carreiras, coa que levan tempo preparando as receitas. Esta é a terceira participación do IES de Foz neste certame, no que xa acadaron un segundo posto en edicións anteriores. A actividade forma parte do programa Erasmus+ da FP, financiado pola Unión Europea, que facilita a participación do alumnado en competicións de habilidades profesionais por toda Europa.
A xornada comezará ás 12:00 h cun faladoiro titulado “Vizoso e nós”, no que participarán Pepe Penabade, Pepe Blanco, Caxigueiro, Aurelia Balseiro e Mª Cristina Rubal González, moderados por Antonio Reigosa. Ás 13:20 h abrirase a exposición “Xosé Vizoso. O neno que debuxou un cabalo”, que permanecerá dispoñible durante as festas de San Lucas. A partir das 13:45 h terá lugar o acto de inauguración e descuberta da placa da nova rúa Xosé Vizoso, na Praza da Fonte Vella, coa presenza de autoridades, familiares e amizades do artista. As persoas asistentes recibirán no auditorio unha lámina cunha obra de Vizoso como agasallo.
O sindicato denuncia a decisión unilateral da empresa de retirar días de descanso e implantar quendas que dificultan a conciliación. As concentracións serán nos centros de traballo de Foz (Uxío Novoneira s/n) e Ribadeo (Avda. Galicia 27). Lémbrase que non é unha folga e apélase á solidariedade da plantilla para defender as condicións laborais conquistadas.
Ás 15:15 horas deste martes, un particular solicitou asistencia sanitaria tras a caída dun raio no lugar de Castro de Igrexa (Cazás, Xermade). Varias persoas sentiron os efectos da descarga eléctrica e unha delas quedou atolada. Tras dar aviso ao Servizo de Urxencias Sanitarias de Galicia-061, Garda Civil e Protección Civil, a persoa afectada foi evacuada consciente ao Hospital Universitario Lucus Augusti.
A exposición, instalada no Centro Comarcal Pazo de San Tomé, invita a observar con calma, descubrir historias e poñer en valor un patrimonio vivo que forma parte da nosa identidade. Unha maneira diferente de achegarnos ao mundo rural que tanto significa para As San Lucas.
Co sol ocultándose e a lúa asomando entre as torres de Donlebún, o músico e divulgador reivindicou o poder evocador e transformador do bravú fronte á morriña paralizante. Na sala de lectura da biblioteca, Souto explicou a evolución do rock bravú no imaxinario galego, evocando as músicas populares que acompañaron durante décadas os remolques dos pascualiños e os labores comunitarios, e lembrando a vitalidade de grupos como Skornabois, Diplomáticos de Monte Alto, Xenreira, Zënzar, Pinto de Herbón ou os Rastreiros. A boa lembranza da súa anterior visita levou ao artista a pechar a velada interpretando o “Himno de Ribadeo”, composto por Arturo Mogo, nun final cheo de afecto pola vila e pola súa identidade cultural.
