Riotorto, 2 de febreiro de 2023. O BNG de Riotorto levará ao vindeiro pleno municipal – 3 de febreiro – unha moción para esixir á Xunta de Galicia a cobertura inmediata e continuada das dúas prazas de médico de familia no centro de saúde, que leva desde o pasado 16 de novembro cun só facultativo.
A formación nacionalista denuncia que “neste tempo, tivemos que escoitar como a responsable de Recursos Humanos do Sergas, Ana Comesaña, xustificou no Parlamento de Galiza este recorte de persoal, cunha intervención que nos fai pensar que a intención da Consellería de Sanidade é manter esta situación indefinidamente suprimindo, de facto, unha das prazas”.
“Non podemos permitir ese recorte no servizo. As institucións locais deben ser activas na defensa da sanidade pública, por iso, a través desta mociòn, pedimos ao goberno municipal que estea a altura da veciñanza e da responsabilidade que lle corresponde e reclame aos dirixentes políticos do seu propio partido unha solución inmediata”.
Ademais de reclamar a cobertura das dúas prazas de médico, a moción demanda á Xunta de Galicia que garanta de forma continuada a atención pediátrica no centro de saúde de Meira, onde tampouco se cubren as ausencias do titular da praza de pediatría.
“Riotorto sufre as consecuencias das políticas do Partido Popular que desmantela a sanidade pública, para favorecer á sanidade privada, que medra de maneira imparable. As persoas responsables dos SERGAS móstranse incapaces de planificar e xestionar a Atención Primaria, replicándose por toda Galiza situacións de falta de persoal e recursos nos centros de saúde”, argumenta o BNG que reclama o apoio do Concello de Riotorto á mobilización en defensa da sanidade pública convocada polo Plataforma SOS Sanidade Pública o vindeiro 12 de febreiro en Compostela facilitando o desprazamento da veciñanza en autobús, cun itinerario e horarios previamente anunciados.
O BNG de Riotorto ven desenvolvendo desde o pasado mes de decembro unha campaña de mobilizacións e recollida de sinaturas en defensa das dúas prazas de médico no centro de saúde.
Dez minutos antes das 21:30 horas do xoves, o 112 Galicia foi informado polo persoal de Adif dun tren detido no medio dun túnel en Mogor, Mañón, debido a unha chapa metálica no medio da vía. Así, aínda que as doce persoas que viaxaban a bordo estaban ilesas, precisaban medios de rescate para baixalas do convoi e desprazalas ata o apeadeiro máis próximo. Nestas tarefas colaboraron a Garda Civil, os Bombeiros do Eume, o GES de Ortigueira e os voluntarios de Protección Civil de Mañón. Finalmente, as persoas foron rescatadas e evacuadas a outro tren, que as levou ata o apeadeiro sen maiores complicacións. Desde alí, continuaron a súa viaxe en taxi.
Competirán durante tres días xunto a outras dezaseis escolas de todo o mundo, elaborando catro propostas de pizza: Polbo á galega, con polbo galego, queixo San Simón e allada picante; Bosque galego, con crema de castañas e mel picante; Terra meiga, con zorza picante; e Rapadoira, con setas, queixo azul e pera. As estudantes viaxan acompañadas pola súa profesora, Conchi Carreiras, coa que levan tempo preparando as receitas. Esta é a terceira participación do IES de Foz neste certame, no que xa acadaron un segundo posto en edicións anteriores. A actividade forma parte do programa Erasmus+ da FP, financiado pola Unión Europea, que facilita a participación do alumnado en competicións de habilidades profesionais por toda Europa.
A xornada comezará ás 12:00 h cun faladoiro titulado “Vizoso e nós”, no que participarán Pepe Penabade, Pepe Blanco, Caxigueiro, Aurelia Balseiro e Mª Cristina Rubal González, moderados por Antonio Reigosa. Ás 13:20 h abrirase a exposición “Xosé Vizoso. O neno que debuxou un cabalo”, que permanecerá dispoñible durante as festas de San Lucas. A partir das 13:45 h terá lugar o acto de inauguración e descuberta da placa da nova rúa Xosé Vizoso, na Praza da Fonte Vella, coa presenza de autoridades, familiares e amizades do artista. As persoas asistentes recibirán no auditorio unha lámina cunha obra de Vizoso como agasallo.
O sindicato denuncia a decisión unilateral da empresa de retirar días de descanso e implantar quendas que dificultan a conciliación. As concentracións serán nos centros de traballo de Foz (Uxío Novoneira s/n) e Ribadeo (Avda. Galicia 27). Lémbrase que non é unha folga e apélase á solidariedade da plantilla para defender as condicións laborais conquistadas.
Ás 15:15 horas deste martes, un particular solicitou asistencia sanitaria tras a caída dun raio no lugar de Castro de Igrexa (Cazás, Xermade). Varias persoas sentiron os efectos da descarga eléctrica e unha delas quedou atolada. Tras dar aviso ao Servizo de Urxencias Sanitarias de Galicia-061, Garda Civil e Protección Civil, a persoa afectada foi evacuada consciente ao Hospital Universitario Lucus Augusti.
A exposición, instalada no Centro Comarcal Pazo de San Tomé, invita a observar con calma, descubrir historias e poñer en valor un patrimonio vivo que forma parte da nosa identidade. Unha maneira diferente de achegarnos ao mundo rural que tanto significa para As San Lucas.
Co sol ocultándose e a lúa asomando entre as torres de Donlebún, o músico e divulgador reivindicou o poder evocador e transformador do bravú fronte á morriña paralizante. Na sala de lectura da biblioteca, Souto explicou a evolución do rock bravú no imaxinario galego, evocando as músicas populares que acompañaron durante décadas os remolques dos pascualiños e os labores comunitarios, e lembrando a vitalidade de grupos como Skornabois, Diplomáticos de Monte Alto, Xenreira, Zënzar, Pinto de Herbón ou os Rastreiros. A boa lembranza da súa anterior visita levou ao artista a pechar a velada interpretando o “Himno de Ribadeo”, composto por Arturo Mogo, nun final cheo de afecto pola vila e pola súa identidade cultural.
