Ribadeo, 23 de marzo, 2023. Unha vez máis, o goberno do señor Rueda (antes do señor Feijóo) volve tropezar coa mesma pedra. Unha vez máis, o goberno da Xunta de Galicia, sustentado entre outros polo voto do señor Daniel Vega Pérez, voceiro do grupo municipal do PP na corporación de Ribadeo, négase a atender as demandas do Concello de Ribadeo, de todo o pobo de Ribadeo, e volve poñer atrancos na atención ás persoas maiores. Antes foi cando a construción da Residencia de Maiores. Agora é a conto da reforma integral do Hospital Asilo. E o señor Daniel Vega Pérez, voceiro do grupo municipal popular no Concello de Ribadeo (ou do goberno do señor Rueda?), toma unha vez máis partido polo seu partido na Xunta, e non polo conxunto da veciñanza ribadense. E para iso, volve sacar as súas teimas preferidas á hora de facer fronte a este tema.
De novo volve facer gala dunha aparente, e fatua, actitude de home de goberno como se fora el quen fai, e como se o goberno municipal de Ribadeo contemplara pasivamente como se desenvolven os feitos. Pois non. O goberno municipal, sustentado polo BNG de Ribadeo, foi quen loitou, día si e día tamén, para facer realidade a reforma integral do Hospital Asilo. Ao señor Daniel Vega Pérez parécelle que con adiantarse a dicir que hai que facer cousas é como se xa se puidera apropiar do feito de que as cousas se fagan. Pero claro: non é o mesmo anticiparse pedindo que se limpe unha beirarrúa, que pedir unha comisión para estudar que facer coa reforma do Hospital Asilo.
Cando un está na oposición, porque así o quixo o electorado, non che dá para quereres dirixir unha comisión para redactar o proxecto de reforma da residencia. Tes todo o dereito do mundo a opinar sobre dita reforma e mesmo a ofrecer unha alternativa incluso diametralmente oposta. Pero non te capacita para denunciar que, como non se fai como ti pensas, pois non hai transparencia. Non, señor Vega: vostede non ten o patrimonio da verdade. E este goberno ten o aval dos feitos, do traballo levado a cabo e que cristalizou, nesta semana anterior, na publicitación da reforma do Hospital Asilo no perfil do contratante, para que as empresas interesadas poidan presentar as súas ofertas. Velaquí feitos, e non escusas de mal pagador. De mal pagador… e firme defensor de intereses alleos a Ribadeo.
Volver insistir na esixencia de explicacións pola herdanza do Doutor Moreda cansa, raia no ridículo. Tal e como o señor Feijóo sae sempre a defender os intereses da gran banca, da “xente de ben” (non lle di así o señor Feijóo?!), semella que o señor Daniel Vega quixese defender intereses de parte que se viron claramente contrariados pola sentenza que deu a razón ao Concello de Ribadeo na actitude adoptada polo goberno municipal á hora de xestionar o tema de dita herdanza. Pero o señor Vega, a piñón fixo, segue ao seu.
Como tamén segue ao seu defendendo a actitude do goberno do señor Rueda á hora de facer fronte ao necesario traslado dos usuarios do Hospital Asilo namentres se leva a cabo a súa reforma. Todas e todos nós puidemos ver na prensa, e mesmo nas redes sociais, a reacción inicial da Xunta: é cousa do Concello solucionar ese problema, pois a residencia é municipal. Insistir agora en que non había motivo para convocar un pleno extraordinario para abordar o tema, pois, segundo o PP de Ribadeo, un goberno serio non pode reaccionar a golpe de “artigo de opinión” (?), é non ter xa nada que dicir.
Ante as noticias que saíron na prensa referidas ao tema, o goberno municipal, sustentado polo BNG de Ribadeo, reacciona e move ficha: convoca un pleno extraordinario para abordar a cuestión. Posteriormente, o goberno da Xunta, sustentando entre outros polo voto do señor Vega, reacciona e di que si, que agora si procede falar do tema do traslado dos usuarios do Hospital Asilo. A través dun correo electrónico póñense en contacto con técnicos do Concello de Ribadeo e indican que desexan facer unha reunión, entre técnicos, para abordar o tema. Esas non son maneiras, señor Vega. A relación entre institucións soberanas segue outras vías. Por suposto que os técnicos van ter moitas achegas que facer nesas reunións; pero son os responsábeis políticos quen as organizan e dirixen. E a solicitude das mesmas faise aos responsábeis políticos e institucionais, por moito que as xestionen os técnicos.
Señor Daniel Vega, toda a veciñanza de Ribadeo puido escoitar as súas intervencións no pleno extraordinario deste venres 17 de marzo de 2023. Francamente, xa tiñamos a sensación de que estaba máis pendente do goberno do señor Rueda que dos intereses de todo o pobo de Ribadeo. Pero despois deste pleno confirmouse aínda máis. Volver sacar vellas teimas para disimular a actitude amarrada do goberno da Xunta, sempre apoiada por vostede, mostra cales son as súas cartas. Alá vostede coas súas apostas.
Desde o BNG de Ribadeo, a través da acción do goberno que sustenta, seguiremos a achegar feitos e resultados. Xa o puido comprobar toda a veciñanza a través do Parladoiro. Neste tema, xa o puido comprobar ao ver que se publicaba no perfil do contratante do Concello de Ribadeo a reforma do Hospital Asilo. Xa se sabe: traballo feito non mete ansia. Ben: a algúns semella que si, que ben que corren para lle lavar a cara ao señor Rueda.
Malia a intensa calor, o pavillón encheuse de público para gozar das actuacións das numerosas alumnas, que ofreceron exercicios individuais, por parellas e en grupo, destacando pola súa beleza e dificultade técnica ao ritmo da música escollida. Ao remate, a concelleira Ana Rubal entregou medallas ás participantes, que tamén agradeceron o traballo e os valores transmitidos pola súa monitora, Lorena Fernández. Lémbrase que a festa de clausura das Escolas Deportivas terá lugar o luns 29 ás 19:00 horas, nun acto conxunto co Concello de Alfoz, no que haberá diversas actividades de celebración e a entrega de diplomas.
A cantante e instrumentista asturiana Mónica Acevedo actuará en formato solista, mentres que o equipo do local ofrecerá un menú especial con pratos como o tartar de xarda, gañador do “Ribadeo Sabe”, gazpachuelo de tempada, lomo de sardiña con berenxena afumada, cóctel de lagostinos, bonito de Burela con melocotón asado e sopa de cebola, e solombo de porco celta con xudías tenras. A cita comeza ás 21:15, con prazas limitadas e reserva imprescindible.
A xornada incluíu tamén o IV Torneo de Pádel, que continuará durante a fin de semana. O evento, organizado polo Concello xunto con ASAPA e Miño Vivo e coa colaboración da Xunta, recupera unha iniciativa nacida hai catro anos a petición da mocidade, coa intención de consolidala no tempo. O tenente de alcalde, Marcos García Lombardero, destacou a alta participación —catro veces maior ca na primeira edición— e agradeceu a implicación de entidades, colaboradores e asistentes, así como a presenza de representantes da Xunta, do Parlamento e da Deputación.
Adultos, nenos, familias, grupos de amizades fixeron o percorrido nun día espectacular de sol e cunha temperatura de 26º á hora da saída. Acudiron á cita o presidente provincial da AECC, José Manuel Rozas, o alcalde de Ribadeo, Dani Vega, as concelleiras e concelleiro ribadenses, Marta Saiz, Begoña Sanjurjo, Elena Sierra e Francisco José Silvent, a presidenta e o xerente de Acisa, Carmen Cruzado e Jesús Pérez, así como representantes da AECC de Ribadeo coa súa presidenta, Tea Martínez, á cabeza. A II Andaina Ribadeo en marcha contra o cancro contou co patrocinio de Solán e Acisa Ribadeo e coa colaboración do Concello de Ribadeo, Eroski e 2M.
A partir das 19:45 horas abrirán a xornada o Cuarteto Illa Pancha e Tradigalu, mentres que desde as 20:00 horas se poderán degustar hamburguesas á parrilla, bocadillos de panceta e chourizos asados. Xa pola noite, ás 21:30, tomarán o relevo Mi Rollo es el Rock, antes da tradicional fogueira de San Xoán, prevista para as 00:00 horas. A celebración, organizada por A Rebolaxe coa colaboración do Concello de Cervo e a Deputación de Lugo, inclúe tamén o sorteo dunha paleta de cocho e contará con aparcamento habilitado no Estanco da Praia do Torno.
Pasada a medianoite, un vehículo saíuse da vía na N-634. Como consecuencia do impacto, tres persoas resultaron feridas. Da asistencia sanitaria ocupáronse os profesionais de Urxencias Sanitarias de Galicia-061 e os axentes da Garda Civil de Tráfico da seguridade na vía. Os Bombeiros de Barreiros tamén acudiron, sen embargo, ningún dos feridos estaba atrapado.
