A Xunta de Goberno aprobou tres convenios para acondicionar o local municipal de Cabanón, en Meira; para optimizar o abastecemento de auga en dous núcleos de Cervantes; e para poñer en funcionamento unha gasolineira en Ribeira de Piquín
Lugo, 25 de outubro de 2024. A Xunta de Goberno da Deputación de Lugo aprobou este venres tres investimentos por importe de 541.000€ para continuar mellorando as infraestruturas da provincia e dotar de máis e mellores servizos á veciñanza. Así o anunciou o Deputado de Promoción Económica e Social, Pablo Rivera Capón, que explicou que entre outras cuestións deuse luz verde a tres convenios de colaboración por un importe conxunto de case 336.000€ para os Concellos de Meira e Cervantes e a Fundación Terreo en Ribeira de Piquín.
No caso de Meira, o acordo de colaboración coa institución provincial ascende a case 130.000€ para realizar obras de mellora no local municipal Cabanón, situado na praza do convento do municipio. O proxecto inclúe o acondicionamento integral deste edificio no que se realizan diferentes actividades lúdicas, culturais e deportivas. A Deputación achega preto do 94% -121.527,56€- e o Concello o 6% restante -6.655€-.
“Esta actuación beneficiará directamente aos veciños e veciñas de Meira, pois grazas a estas obras optimizarase o confort da instalación e garantirase que o espazo sexa máis acolledor e accesible para desenvolver diversas iniciativas”, destacou Pablo Rivera.
Tamén se lle deu o visto bo a un convenio de colaboración co Concello de Cervantes por un importe total de case 96.000€. Este acordo permitirá acometer melloras de abastecemento de auga na aldea de Piornedo e no núcleo de Vilarguite, na parroquia de Vilapún. O importe que destina a institución provincial representa o 95% do orzamento total -91.097,10€-, mentres que o Concello asume o 5% restante -4.794,58€-.
Nesta liña, Pablo Rivera recalcou que “a día de hoxe, estas zonas non contan con rede de abastecemento municipal e a traída privada que dá servizo á veciñanza presenta numerosas deficiencias e escaseza de auga en períodos estivais. Con este acordo dotarase a ambos núcleos de abastecemento de auga potable e realizaranse os correspondentes traballos de captación necesarios para facelo posible”.
A Deputación tamén aprobou un convenio coa Fundación Terreo, de Ribeira de Piquín, a través do cal a institución provincial achega 110.000€ para a posta en funcionamento dunha gasolineira situada no núcleo de Barcia desta localidade.
“Trátase dun proxecto que, non só dotará de máis servizos a esta localidade, senón que tamén creará emprego e dinamizará a actividade económica do noso rural, unha cuestión fundamental para poder fixar poboación no territorio”. O Deputado remarcou que “con esta achega” a Deputación continua colaboración coa Fundación Terreo e sinalou que “o orzamento vaise dividir en dúas anualidades e permitirá entre outras cuestións: alugar as instalacións, adaptalas á normativa vixente e contratar a xornada completa o persoal necesario para atender este servizo”.
Camión 4×4 con caixa basculante e quitaneves
Por outra banda, en relación ás estradas e co fin de garantir a seguridade e a mobilidade na rede viaria provincial a Xunta de Goberno adxudicou por algo máis de 205.000€ a contratación dun camión 4×4 con caixa basculante e quitaneves para o parque móbil da Deputación. A empresa adxudicataria é Infonorte Tecnología S.L. e o prazo de entrega é de 60 días naturais.
Baixo o título Memoria de mariñáns. Unha crónica da emigración da Mariña, o xornalista e investigador Martín Fernández Vizoso ofrecerá unha intervención centrada nas historias e vivencias dos emigrantes da comarca, ilustrando o fenómeno migratorio que marcou a vida de moitas familias ao longo do século XX. O evento inclúe tamén unha imaxe histórica de mariñáns retornados de América nos anos 30, que serve de fío visual para contextualizar esta realidade.
En total foron ofertadas preto de 80 prazas de surf, piragüismo e vela, destinadas a nenas e nenos con idades comprendidas entre os 9 e os 15 anos. As escolas desenvolvéronse en diferentes quendas nos meses de xuño e xullo. O concelleiro de Deportes, Francisco José Silvent, subliñou “a importante participación da rapazada ribadense nas escolas deportivas de verán, que organizamos desde o Concello de Ribadeo coa axuda dos clubs que as impartiron. Queremos agradecer ás familias a confianza depositada nas nosas actividades, que lles serviron aos asistentes para practicar deporte na auga e para pasar uns días aprendendo e perfeccionando técnicas”.
No encontro mantido na sede da delegación territorial da Xunta en Lugo, no que tamén estivo o director territorial da Consellería, Marco Antonio Fernández Piñeiro. abordáronse liñas de cooperación para a mellora de Infraestruturas e de seguridade viaria, de interese para este municipio. O departamento que dirixe M. Allegue segue prestando apoio aos municipios para executar actuacións que contribúan a mellorar a calidade de vida da veciñanza e a reforzar a competitividade económica.
No Campo de Fútbol de As Valgas poderanse ver desde as 21.30 horas as actuacións de Netos de Bandim, chegados desde Guinea Bissau; da Philippine Performing Arts Company, das Filipinas; e do grupo anfitrión O Arco da Vella. Un encontro único de culturas, ritmos e emocións que promete unha noite inesquecible.
A mostra sobre Mimina, que repasa a súa traxectoria vital e artística e o seu papel esencial na creación de Sargadelos como empresa cultural, amplía o seu período de apertura até o 12 de agosto grazas á cesión das instalacións por parte do Concello de Cervo. A exposición poderá visitarse todos os días de 12:00 a 14:00 e de 17:00 a 20:00, e tamén se poden concertar visitas noutros horarios ou para grupos chamando ao 636020514 (Lucía).
