Cervo, 14 de xullo, 2025. As persoas e asociacións organizadoras expresan o enorme agradecemento aos centos de persoas que se achegaron a Sargadelos a honrar a memoria de Isaac Díaz Pardo.
A mañá iniciouse coa contorna do canal adornado para a ocasión. A sala das carboeiras completou a súa cabida con gran presenza de extraballadoras e extraballadores que se xuntaron para emocionarse co documental «As miradas de Isac», creado pola súa neta, Cecilia Díaz Betz, no que o propio artista e emprendedor relata a súa vida e proxectos empresariais para dignificar Galiza.
Abriu o acto Alba Fernández Rubal coa lectura do poema «Man a man», dedicado a Isaac polo seu amigo, o poeta Claudio Rodríguez Fer. A continuación, o gaiteiro de vangarda viveirense David Bellas interpretou unha peza composta ex professo para esta homenaxe, mesturando tradición e vangarda á maneira que Isaac utilizaba para xerar riqueza.
Ao mediodía, Sargadelos rememorou as merendas tradicionais con comida caseira, e abundante, gaitas, pandeiretas e bailes espontáneos que recuperaron a alegría de fiarolas e festas de campo de antano.
Á tarde, o recinto das carboeiras volveuse encher cunha mesa redonda amena e participativa na que se relataron con gran emoción e respecto anacos da memoria de Isaac e da semente fértil que deixou.
Camilo e Xosé, fillos de Isaac e Mimina, achegaron, entre outras moitas cousas, datos sobre o nacemento da idea na cabeza de Isaac de recuperar Sargadelos (por influencia do pintor Felipe Bello Piñeiro, amigo do pai de Isaac) ou a creación do Laboratorio de Formas, de onde parten todas as iniciativas empresariais nas que se esforzou Isaac na súa vida, sempre en beneficio colectivo de Galiza. Quedou claro o seu rechazo a iniciativas especuladoras e o desexo de que toda a riqueza revertese no progreso de Galiza.
Juan Carlos Enríquez, extraballador da cerámica, recordou, entre moitas anécdotas, os métodos de traballo fomentados por Isaac na fábrica, que buscaban a participación do persoal, e as innovadoras técnicas ideadas entre Isaac e o seu fillo Camilo, copiadas incluso no resto de Europa. Tamén relembrou as múltiplas iniciativas culturais que patrocinou, nomeadamente as experiencias e escola libre de verán («cursillos») que dinamizaron a comarca con teatro de vangarda, exposicións, conferencias, cine, coloquios…
Fernando Redondo Neira, sobriño de Xosé Neira Vilas e presidente da súa fundación, recordou a intensa relación de amizade entre Xosé e Anisia, e Isaac e Mimina e as súas estadías en Sargadelos. Resaltou a disposición que Isaac tiña en todo momento ante calquera iniciativa cultural que se lle presentase en beneficio de Galiza. El sempre colaboraba e promocionaba, como por exemplo, na edición do best-séller «Memorias dun neno labrego», que nunca sería publicado en Galiza se non chega ser polo pulo de Isaac.
No coloquio posterior, cunha sala chea de persoas emocionadas e desexosas de mostrar o seu respecto pola obra e iniciativas de Isaac, participaron traballadoras e traballadores, veciñanza e persoas que colaboraron con el nas súas múltiples iniciativas e que, entre diversas anécdotas, coincidiron en valorar a gran influencia e beneficios producidos polos emprendementos isaquianos na comarca e en Galiza, tanto económicos como culturais e sociais.
Miro Casabella quixo pechar o acto lembrando cando hai 50 anos actuou en Sargadelos e mostrando o orgullo da gran amizade que mantivo con Isaac. Explicou cando lle encargara interpretar os seus cantares de cego e deleitou ás persoas presentes entoando coa súa zanfona (comprada despois da insistencia de Isaac) o cantar «O Marqués de Sargadelos».
A homenaxe, xa convertida en festa, continuou no bar cultural A Sacabeira, en que entre os contos e a presentación do cervense Caxoto, celebrouse unha emotiva velada musical.
En tanto continuaban as merendas na contorna natural de Sargadelos, Miro Casabella debullou un repertorio de exquisita música medieval con zanfona e guitarra así como as cancións reivindicativas dos anos 70 que sempre lle reclamaba Isaac.
Rematou o concerto coa actuación de Catro nun Zoco, grupo do histórico Mini acompañado pola violinista Mariña Quintillán e as súas fillas Navia e Iria Rivas. A voz poderosa e comprometida de Mini resoou en honra de Isaac reforzada pola colaboración das voces femininas e un experto violín. A memoria de Isaac non podía ter mellor acompañamento.
Organizadoras e organizadores “estamos inmensamente contentos e orgullosos da alegría e respecto que inundou toda a xornada. Isaac, máis unha vez, volveu proporcionar riqueza a este pobo. Grazas e até o ano que vén!”.
«Porque se algo é mentira, compañeiros, é que morreu Isaac.» (Claudio Rodríguez Fer)
A representación terá lugar este sábado día 18, ás 19:30 horas, no local social da Asociación de Veciños de Marzán, un dos destinos habituais nas xiras anuais da compañía. O Centiño mantén así a tradición de visitar este espazo, onde agarda compartir co público unha tarde divertida e chea de humor. A agrupación teatral continúa así coa difusión da súa nova obra, que segue a percorrer diferentes escenarios da comarca.
Dezaoito locais hostaleiros de Ribadeo, Rinlo e Vilaframil ofrecerán diversas preparacións ata o vindeiro domingo: en escabeche, en salpicón, en empanada, ao allo, á prancha, en albóndega, etc… Todas as propostas poden consultarse nas redes sociais de Acisa Ribadeo, que agradece “unha vez máis o apoio da OPP do Porto de Burela, que nos doou 90 quilos de cabala para estas xornadas, produto que entregamos de xeito gratuíto aos locais participantes. Achegámoslles así unha parte do peixe que empregarán nesta nova cita gastronómica na que tamén colabora o Concello de Ribadeo”. Ata o porto, ao restaurante Marinero, se achegaron este mediodía o director territorial da Consellería de Mar, Alexandre Piñeiro, as concelleiras ribadenses Montse Seijo, Elena Sierra e Begoña Sanjurjo, a presidenta de Acisa, Carmen Cruzado, o xerente do colectivo empresarial, Jesús Pérez, e o técnico de Acisa, Jorge Fernández, que puideron degustar as elaboracións realizadas por este establecemento hostaleiro.
Durante a xornada Lionel compartirá a súa experiencia no mundo da escrita, dando a coñecer os seus procesos creativos e as temáticas que caracterizan os seus libros. O acto incluirá un coloquio participativo cos asistentes do club onde poderán preguntar e intercambiar opinións co autor sobre o libro lido “A raíña das velutinas”.
O sábado terá lugar no Casino o III Showcooking, con cociña en directo e maridaxe de viños. O público poderá votar os seus pinchos favoritos e participar no sorteo dunha noite no hotel Marqués de Riscal. A entrega de premios será o luns 20 ás 19:00 h. O Concello e Destino Navia animan a veciños e visitantes a gozar desta cita gastronómica.
Haberá degustación diaria de ostras na carpa do porto. Concertos, showcookings, visitas guiadas e actividades mariñeiras. Lancha pola ría, exposición de maquetas e concurso fotográfico #somoslasostra2026, ademais propostas especiais en Acueo, La Casilla e Restaurante Peñalba.
A etapa, cun percorrido duns 150 quilómetros, partiu arredor das 11:30 horas e rematou en Barreiros, atravesando concellos como Xermade, Muras, Viveiro ou Foz. A proba reúne a equipos do ciclismo profesional internacional e sitúa a provincia de Lugo como escenario dunha das citas deportivas máis destacadas do calendario. O Goberno colabora no desenvolvemento da carreira a través das Forzas e Corpos de Seguridade do Estado, que velan polo correcto desenvolvemento da proba e pola seguridade de participantes e afeccionados.
As persoas interesadas poden anotarse ata o 24 de abril na Casa do Concello (Cervo) ou na Casa da Cultura (San Cibrao). A actividade está dirixida a persoas pensionistas empadroadas no municipio. Trátase dunha xornada pensada para compartir, celebrar e desfrutar en comunidade.
