O BNG de Ribadeo asegura que “o alcalde embarra o ambiente nos plenos para acalar as nosas propostas construtivas”

Ribadeo, 16 de xullo, 2025. O BNG de Ribadeo asegura que “o alcalde embarra o ambiente nos plenos para acalar as nosas propostas construtivas”. Nun pleno máis, “Daniel Vega non se aguantou sen xerar polémica e lanzar insidias contra a oposición. Cada vez que facemos unha proposta positiva, ou denunciamos situacións como os verquidos incontrolados (tal e como pasa na praia de Illas estes días), o alcalde de Ribadeo lánzase en tromba e solta mil e unha mentiras pola súa boca. Imaxínase insultos e inventa situacións nas que se pon como vítima”.

“Pero as verdadeiras vítimas somos nós e, por extensión, toda a veciñanza. No pleno deste martes 15 de xullo, de novo Daniel Vega volveu abusar do procedemento de urxencia. Como é posible que, se o martes 8 se comentou na Comisión Informativa que podían aparecer novos temas que tratar no pleno do día 15, non nos chegara a documentación necesaria para estudalos? Os concelleiros e a concelleira do BNG non podemos votar sobre facturas pendentes de pago sen antes poder consultalas. Xa comentamos no Parladoiro o exceso que houbo con gastos superfluos. Non estamos dispostos a votar a cegas”.

“Pero o colmo xa se produciu coa actitude do alcalde ante a proposta de creación dunha sala de estudo na Biblioteca Municipal El Viejo Pancho. No canto de buscar un punto de encontro e facer algo positivo, comezou a faltar ao respecto ao noso voceiro facendo falsas acusacións. Ao longo de todo o pleno o BNG adoptou unha actitude construtiva. Pero Daniel Vega non foi quen de evitar abrir o melón da polémica e dedicouse a increpar con actitude prepotente”.

“Con todo, e tras soportar dita prepotencia por parte do alcalde, logramos chegar a un acordo coa concelleira delegada de Cultura e a proposta saíu adiante de forma consensuada”.