O PSdeG denuncia o castigo político de Rueda e Candia a Lugo ao excluír a provincia dos fondos estatais para corrixir desigualdades

Lara Méndez reclamará no Parlamento a creación dun rexistro transparente cos investimentos, criterios públicos e xustos de reparto entre provincias e que se reconduzan cara a Lugo os recursos sen executar

Lugo, 8 de agosto de 2025. A vicesecretaria Xeral e secretaria de Organización do PSdeG na provincia de Lugo, Pilar García Porto, e a secretaria de Organización do PSdeG, Lara Méndez, denunciaron con rotundidade a discriminación inxustificable á que Alfonso Rueda somete á provincia de Lugo, excluíndoa dos Fondos de Compensación Interterritorial que o Goberno de España transfire á Xunta para corrixir desigualdades e garantir a cohesión territorial.

“Dos 100 millóns de euros dispoñibles nos anos 2022 e 2023, Lugo non recibiu nin un só euro. Cero. Cero investimento. E iso a pesar de que a Xunta nin sequera foi capaz de executar a metade destes fondos na súa nula xestión habitual”, advertiu Pilar García Porto, que destacou que estes datos foron denunciados polo propio Consello de Contas, entidade independente encargada de fiscalizar a actividade económico-financeira do sector público galego, no seu último informe.

“É intolerable que Rueda converta en arma política uns fondos creados para combater os desequilibrios territoriais. Ao excluír Lugo, frea deliberadamente a súa equiparación con outras zonas máis desenvolvidas e pervirte o propósito destes recursos. Parece claro que o PP prefire que os cartos volvan a Madrid antes que investir un só euro na nosa provincia”, sostivo a secretaria de Organización provincial e deputada, que subliñou que “os concellos non teñen ningunha vía para solicitar estes fondos: non existe unha convocatoria pública nin un procedemento aberto que permita coñecer os criterios de reparto”. Porto engadiu que “mentres en Lugo padecemos a falta de persoal médico e docente, a carencia de residencias de maiores, de infraestruturas e de transporte público, Rueda e Candia utilizan estes recursos enviados polo Goberno do Estado como unha auténtica ferramenta de castigo”.

Pilar García Porto e Lara Méndez esixirán explicacións por esta exclusión, lembrando que os investimentos os decide de xeito unilateral a Xunta e Rueda. “Reclamaremos respostas ante esta situación, que ademais vén a demostrar o que sempre denunciamos, que Elena Candia só usa a provincia como trampolín político: só lle importa medrar no partido, non defender á veciñanza”.

Lara Méndez anunciou que tamén desde o PSdeG esixirán a través dunha batería de iniciativas parlamentarias a posta en marcha inmediata dun rexistro contable onde se recolla con total transparencia onde se levan investidos estes fondos nos anos de Goberno do PP na Xunta, e con que parámetros se tomaron as decisións. Tamén se reclamará o establecemento de criterios públicos e xustos de reparto entre provincias, e se lle dea voz aos concellos nas decisións sobre proxectos e investimentos que se adopten.

Así mesmo, desde Lugo se reclamará a Rueda que reconduza cara a Lugo cunha planificación pública e consensuada parte dos máis de 50 millóns de euros que a Xunta deixou sen executar nos últimos exercicios.

A este respecto, a parlamentaria destacou que o Concello de Contas “sitúa a Galicia como a segunda CCAA con peores índices de execución destes fondos. Nin Rueda agora nin Feijóo antes foron capaces de converter estes recursos de equilibrio territorial nunha ferramenta útil. A realidade é que temos un goberno que non executa, non reparte e non planifica”, argumentou.