O Valadouro, 4 de setembro, 2025. O goberno local do Valadouro defende a súa “total disposición a colaborar con todas as asociacións de veciños, sen discriminacións”.
O alcalde, José Manuel Lamela, volveu recalcar no último Pleno o mesmo que xa explicara no momento da aprobación dos presupostos e tamén noutro Pleno posterior sobre as axudas ás asociacións: “o Concello terá en conta todas as solicitudes, pero é necesario que as asociacións presenten unha memoria ou proxecto do que pretenden facer” incluíndo un orzamento estimado. Así, o goberno local comprométese a estudar todas as solicitudes das asociación de veciños e reservar partidas nos orzamentos do ano seguinte para apoiar os seus proxectos.
As subvencións de calquera administración xa sexan dirixidas a outra administración, colectivo, empresa ou particular teñen que ser xustificadas. “O anterior goberno reservaba cartos para as asociacións, pero non eran capaces de xustificar en que os gastaban e foi necesario concederlles prórrogas para que non os perdan. O que estamos facendo é intentando traballar con responsabilidade”.
O alcalde tamén explica que “se concederon subvencións ás asociacións que tiñan solicitado, a de Vilacampa e a do Cadramón”. E, ademais, tamén se está atendendo á asociación de Santa Cruz -da que forma parte o señor Chao- que solicitou unha porta. Lamela apunta, ademais, que “o BNG volve esquecer unha asociación”, a da parroquia de Alaxe.
En canto ás pistas que precisan arranxo, no caso de ser de titularidade municipal correspóndelle ao Concello. E o goberno local está a escoitar as peticións dos veciños e asegura que “se irán facendo en canto se vaia podendo”.
PUNTO LIMPO
O goberno local non pode entender que o BNG reclame agora o que non fixo en 11 anos no goberno. “Tiveron moito tempo de instalar electricidade nas instalacións do punto limpo. Incluso construíron cerca unha nave para tiro con arco que dispón de alumeado, polo que tiveron ocasión de estender a rede eléctrica con facilidade”, expoñen.
Do mesmo xeito, lembran que o BNG estaba no goberno municipal no momento que había que solicitar o punto limpo móbil. “Tiveron oportunidade de solicitalo. Agora hai que agardar a convocatoria de novas subvencións”.
Tamén aclaran dende o goberno municipal que “no verán se incrementa a poboación e xéranse máis residuos” como ten sucedido nos últimos anos con goberno socialista. Con todo, “o servizo funciona sempre que se pode e recollendo o máis rápido posible”.
A conselleira do Medio Rural, María José Gómez, acompañada pola directora xeral de Relacións Institucionais e Parlamentarias, Sandra Vázquez, e a directora xeral de Urbanismo, Encarnación Rivas, asistiu á ofrenda da Virxe dos Remedios en Mondoñedo.
Era o único ocupante do turismo e os Bombeiros de Vilalba tiveron que excarceralo. Ao fío das 13:30 horas, un particular informou ao 112 Galicia dun coche que se saíra da vía e acabara batendo contra unha árbore no quilómetro 75 da N-640, en Ludrio (Castro de Rei). O propio alertador sinalou que o accidente semellaba grave polo estado no que quedara o vehículo. Cando chegaron ao lugar, os servizos de emerxencias confirmaron que só había unha persoa implicada,un home que resultou falecido e foi excarcerado polos bombeiros. No operativo participaron Urxencias Sanitarias de Galicia-061, a Garda Civil de Tráfico, os Bombeiros de Vilalba e os servizos de mantemento da estrada.
O director xeral agradeceu aos membros e traballadores da entidade todo o seu labor na defensa dos dereitos dos máis novos. Deste xeito, puxo en valor a súa traxectoria e o compromiso cun modelo integrador e inclusivo no que os menores do sistema de protección vivan nunha contorna totalmente familiar. Neste sentido, Jacobo Rey fixo fincapé na importancia da colaboración entre a Xunta e o tecido social para seguir fortalecendo un sistema que garanta o benestar dos nenos e adolescentes, con centros como San Aníbal que conforman un auténtico fogar.
A alcaldesa Marta Rouco inaugurou a cita, que abriu coa IV Volta Ciclista á Terra Chá e cunha programación centrada na relación entre Galicia e Cuba e na memoria da emigración. Houbo unha mesa redonda sobre o Centro Galego da Habana, a exposición Galicia Imaxinada e música, ademais dunha mostra de xornais antigos. Rouco reivindicou a importancia de lembrar a emigración galega e apelou a mirar con humanidade as migracións actuais, destacando tamén o papel das asociacións culturais das parroquias na conservación das tradicións. A feira continou con desfile de época, xantar popular, xogos, animación, baile cubano, foliada, queimada e propostas musicais e artesanais ata a noite.
Na IV Festa dos Ovos Rotos con Chourizo e Feira de Artesanía, María José Gómez puxo en valor a importancia económica e social deste produto e o papel da artesanía alimentaria, con sete operadores presentes. Subliñou que o evento consolídase como unha cita que promove a gastronomía galega e recupera oficios tradicionais, dinamizando a vida económica e social de Castro de Rei.
Ocorreu minutos antes das 11:30 horas. Unha persoa foi trasladada ao hospital tras resultar ferida na colisión entre un coche e un autobús no quilómetro 512 da A-8 en sentido A Coruña, en Vilaframil (Ribadeo). Entre os alertadores estiveron as persoas que viaxaban no coche, que puideran saír do vehículo. Por outra banda, o autobús conseguiu deterse uns metros máis adiante. Ao punto desprazáronse Urxencias Sanitarias de Galicia-061, a Garda Civil de Tráfico e os servizos de mantemento da autovía.
O próximo luns 14 de setembro comeza un novo curso de español dirixido a persoas estranxeiras da man de Ecos do Sur, que se desenvolverá ata o 9 de outubro. A formación será dun total de 80 horas e as clases terán lugar de luns a venres, de 9:30 a 13:30 horas no Centro de Formación Ocupacional. O concelleiro de Inmigración, Mario Pillado, destacou o valor destas propostas para “facilitar ferramentas útiles ás persoas estranxeiras residentes no municipio e favorecer a súa integración, tanto social como administrativa”.
