Ollomao, de Barreiros, presenta ‘Pan con chocolate’ este domingo na Casa da Cultura do Vicedo

Tres “nenos” e tres “nenas” que se acaban de “retirar” reúnense para celebrar a xubilación da máis nova dos seis, recordando inevitablemente as cousas da súa vida, de cando eran novos, sacando temas que a todas e todos nos resultan familiares e recreando o mundo das décadas dos 60 e os 70. Era aquel un mundo de amigos e amigas que compartían as súas inquedanzas e as súas dúbidas. Un mundo de descubrimentos constantes, de aprendizaxe continuo, non sempre o máis adecuado, pero sempre necesario. De todos os xeitos, os recordos, as lembranzas, por malas que sexan, sempre se van suavizando co paso do tempo. Por moi mal que o teñas pasado cando eras novo, ao volver a vista atrás, recordas aqueles anos con tenrura, con agarimo…, con nostalxia,… eu que sei… O caso é que cando se xuntan tres ou catro persoas daquela xeración, sempre, sempre, sempre, se veñen á cabeza aquelas merendas de “pan con chocolate”. 19.30 horas.