A institución provincial recibiu este mércores o ditame favorable do Consello Consultivo de Galicia, un trámite obrigatorio e necesario para avanzar neste proceso e reactivar as obras de ambos centros de atención a maiores
Lugo, 30 de xaneiro de 2026. A Xunta de Goberno da Deputación de Lugo celebrada este venres vén de aprobar a resolución dos contratos de construción das residencias da Pontenova e Guitiriz tras o incumprimento nas dúas obras por parte da empresa adxudicataria. Así o informou a Voceira socialista do Goberno, Pilar García Porto, quen recalcou que “a Deputación elaborou os informes técnicos necesarios para proceder á resolución de ambos os dous contratos”.
García Porto lembrou que “no Pleno deste martes aprobamos a ampliación do prazo dos traballos recollido no convenio coa Pontenova, porque expiraba o 15 de agosto do 2025; mentres que no caso de Guitiriz non foi necesario porque continúa en prazo. De feito, no Pleno insistimos tamén na necesidade de que o Consello Consultivo de Galicia emitise o seu ditame para poder resolver estes contratos, porque é un trámite obrigatorio e necesario para avanzar neste proceso”.
Nesta liña avanzou que “o mércores recibimos a resposta deste órgano, favorable á nosa petición para as dúas residencias e, polo tanto, xa podemos proceder á liquidación definitiva do acordo con esta empresa e continuar dando os pasos necesarios para poder reactivar as obras”.
“Con este acordo, cumprimos coa nosa palabra e reafirmamos o noso compromiso co coidado das persoas maiores, porque seguimos adiante coas obras destas dúas residencias. Facémolo a través dunhas residencias únicas que sacamos adiante en solitario, sen ningún tipo de colaboración, nin económica nin en materia de xestión, por parte da Xunta de Galicia, que como saben, é a Administración que ten atribuídas as competencias en servizos sociais”, reiterou.
Así mesmo, recordou que a institución provincial ten abertas nove residencias e que o “o noso compromiso é o de sempre, a pesar do ruído que outros queren facer”.
Máis de 900.000€ para mobilidade e infraestruturas
Na reunión desta mañá aprobouse un investimento conxunto de máis de 900.000€ para mellorar tres estradas provinciais ao seu paso polos concellos da Pastoriza, Outeiro de Rei, Begonte, O Corgo e acondicionar infraestruturas en Guitiriz.
– Licitouse por 53.545,57€ as obras para acondicionar un treito da LU-P-3006, a vía que une Meira con Pastoriza por Fonmiñá. Con este proxecto arranxarase un tramo de algo máis de 800 metros -do punto quilométrico 1,120 ao 1,935-. García Porto resaltou a importancia desta vía “porque vai desde o núcleo meirense da Pena ata a LU-122. Ademais dá servizo a explotacións gandeiras, conecta directamente co polígono industrial de Meira, no que se atopan establecementos hostaleiros e diferentes negocios, e dá acceso ao centro de saúde do municipio”.
As obras que se van acometer son a reapertura de cunetas, a pavimentación do firme con aglomerado en quente e o repintado da vía mediante marcas reflexivas brancas. Unha vez se inicien os traballos o prazo de execución será de 3 meses.
– Licitado tamén por 754.307,53€ un proxecto para mellorar tres tramos do cinto comarcal que afectan aos concellos de Outeiro de Rei, Begonte e O Corgo. Os treitos que se van arranxar son:
Algo máis de cinco quilómetros á altura do límite municipal entre Outeiro de Rei e Begonte -do punto quilométrico 56,745 ao 62,175-.
Case un quilómetro no concello do Corgo, preto do límite con Castro de Rei -do punto 125,850 ao 126,825-.
E tamén no Corgo, preto doutro quilómetro no Alto de Gomeán -do punto 130,559 ao 131,314-.
Os traballos que se van acometer son: a reapertura de cunetas, a pavimentación do firme con aglomerado en quente, o repintado da vía e a reposición de sinais verticais. Unha vez se inicien as obras o prazo de execución será de 3 meses.
A Voceira socialista anunciou tamén a adxudicación ao Grupo Bascuas, por 92.439,05€, das obras para a instalación do alumeado e a ampliación da zona de aparcamento da LU-P-2304, a estrada que comunica o núcleo urbano coa área recreativa Sete Muíños, no concello de Guitiriz.
Estes traballos terán un prazo de execución de dous meses e medio e consistirán na reparación da explanada para o aparcamento, na execución da drenaxe, no estendido do firme e no pintado das marcas viais. Ademais, tamén se executará a canalización, cimentación e colocación das luminarias. García Porto recordou que “esta actuación súmase ao proxecto que xa realizamos desde a institución provincial para rehabilitar o firme e a senda peonil e no que investimos máis de 100.000€”.
13,2M€ para o Plan Anual de Contratación 2026
Aprobado o Plan Anual de Contratación 2026 dotado con 13,2M€. O documento recolle a previsión dos procedementos de contratación de servizos, subministracións e obras que desenvolverá a institución provincial ao longo deste ano. “A cifra do Plan Anual de Contratación para este ano é estimativa, pero a elaboración deste texto reflicte a capacidade de planificación, de xestión e de transparencia deste Goberno”, finalizou a Voceira socialista.
Neste espazo radiofónico, de 12 a 14 horas, Félix Jorquera falará coa directora do IES de Foz, Leticia Maseda, co coordinador do evento, José Ríos, así como con alumnado e profesorado participante e moi implicado nos Campionatos Internacionais de Baristas e Catas de Café, que estes días enchen Foz de xente e de aroma cafeteiro.
Os propietarios, Javier Montero e Tita Iglesias, recolleron o recoñecemento na Coruña, agradecendo o apoio da clientela, do seu equipo —formado integramente por mulleres— e da propia guía. O establecemento mantén esta recomendación desde 2021 e suma tamén un Sol Repsol, obtido en 2024 e renovado para 2026. O hotel restaurante Javier Montero abriu as súas portas en novembro de 2018.
Unha comedia orientada para público adulto dirixida por Cándio Pazó. Hora: 20.30. Sipnose: 1880, Curros Enríquez é denunciado polo bispo de Ourense por uns poemas do seu libro Aires da miña terra, un dos piares do Rexurdimento Galego. A pesar da opinión contraria do fiscal, un xuíz dá curso á denuncia e o célebre escritor é procesado e condenado.
A xornada comezou cun aperitivo no bar O Colorado, onde os socios se reuniron para o tradicional brinde previo ao xantar. O encontro continuou no Restaurante Asturias nun ambiente de fraternidade, gozando dun cocido digno de exaltación e dunha longa sobremesa. Durante a velada, os asistentes compartiron lembranzas e falaron das actividades que a asociación prepara para o futuro, nun ano no que Os Cacholeiros se achegan ao seu 35º aniversario. A entidade aproveita esta celebración para reivindicar unha vez máis os pratos tradicionais, elaborados con produtos locais e de tempada, e o labor dos establecementos hostaleiros do concello e da comarca.
A cita terá lugar ás 14.30 horas no Restaurante Louzao, en Area. A actividade, promovida polo Centro de Información á Muller e pola Delegación Municipal da Muller do Concello de Viveiro, está concibida como un encontro de convivencia e participación arredor do 8M. O prezo do xantar é de 50 euros. O Concello de Viveiro publicará nos vindeiros días a programación completa organizada con motivo do 8M.
A presidenta da Deputación, Carmela López, e outros cargos do PSdeG destacaron o valor do grelo como produto emblemático e subliñaron que iniciativas como esta impulsan a economía local, apoian ao sector produtor e reforzan a identidade do rural lucense.
O distintivo, concedido por ADEAC, recoñece a excelencia ambiental e a xestión sostible do territorio.En 2026 o programa acada cifras récord, con máis de 1.200 km de sendeiros en 154 municipios. A senda franquía destaca pola súa calidade paisaxística e ambiental, ao unir Castello e Porcía a través de acantilados, praias e espazos de alto valor ecolóxico. Este recoñecemento reforza o compromiso de El Franco cun modelo que combina conservación, educación ambiental e turismo sostible, situando o concello na rede estatal de itinerarios de excelencia. A entrega oficial das bandeiras será o 6 de marzo no Castelo de Cullera.
