O ciclo de charlas sobre o futuro laboral na Mariña, que organiza a FCAM, pasou polo IES Monte Castelo, de Burela

A Mariña, 26 de febreiro de 2026. O ciclo de charlas sobre o futuro laboral na Mariña, que organiza a FCAM, pasou polo IES Monte Castelo, de Burela.

A segunda edición deste ciclo, que comezou a finais do pasado ano en Ribadeo, seguiu onte en Burela. A sesión contou coa participación de Raquel Hermida, docente e poñente de habilidades de motivación e marca persoal en Academia A Mariña; e de Xavier Pardiñas, arquitecto técnico, docente e especialista en Prevención de Riscos Laborais.

Hermida falou de motivación e de autoestima e insistiu na necesidade “de aceptarnos como somos, de coñecernos e de valorarnos” e “de ser persoas proactivas”. E Pardiñas centrouse na seguridade nas empresas. A charla contou coa proxección de vídeos e coa interacción do alumnado e do profesorado. Asistiron o ciclo superior de prevención de riscos profesionais e o ciclo medio de coidados auxiliares de enfermaría (adultos e ordinario).

A presidenta da FCAM, Carmen Cruzado, referiuse á falla de man de obra na Mariña e ás condicións laborais que aquí se poden atopar: “iguais ou mellores que noutros puntos da xeografía española” e subliñou que “a calidade de vida aquí é moito mellor”. Cruzado agradece “o convite para estar hoxe aquí, á dirección do centro e ao profesorado preocupado e implicado en motivar ao seu alumnado”.

A segunda edición do ciclo de charlas sobre o futuro laboral na Mariña conta co patrocinio de Reyco e BeOne e a colaboración da Consellería de Educación.