César Mogo acusa os senadores do PP de “estafa política” co cuartel do Valadouro

A Mariña, 22 de marzo, 2026. O senador socialista César Mogo advertiu de que “os veciños da Mariña deben saber que están a ser obxecto dunha estafa política por parte dos senadores do PP por Lugo”. Segundo explicou, “nas últimas semanas a súa adicción ás mentiras multiplicouse ata niveis récord”.

En relación coa situación do Cuartel da Garda Civil do Valadouro, Mogo considera que o engano aos veciños dos dous municipios afectados é “descarado”. Primeiro —explica— “manipularon unha resposta do Goberno dicindo o que non dicía”. E agora anuncian unha nova iniciativa parlamentaria “cando xa presentaran outra en xaneiro co mesmo obxectivo e que nunca levaron a debate na Comisión de Interior do Senado porque non quixeron”.

O senador socialista subliña que “presentan o mesmo dúas veces para enganar aos veciños do Valadouro”. Engade que os populares acumulan xa “dúas iniciativas sobre a reforma da Casa Cuartel sen chegar sequera a debater a primeira, unicamente para saír dúas veces nos xornais”.

Mogo considera que esta actuación se suma ás “abundantes meteduras de pata dos senadores lucenses da dereita”. E pregúntase: “Para que o fan? Para gañarse un oco nos medios. E cal é o prezo? Confundir aos veciños mediante enganos e trucos”.

O senador conclúe que “os veciños da Mariña merecen coñecer a verdade e non ser torpedeados con falsedades”. Por iso propón un debate público, sen límites de tempo, entre os dous parlamentarios con residencia na comarca: “Así quedaría ao descuberto a roda de mentiras do senador do PP”.