O Pleno de Barreiros reclama por unanimidade a financiación íntegra do Servizo de Axuda no Fogar

Barreiros, 31 de marzo, 2026. O pleno do Concello de Barreiros, celebrado na noite de onte, acordou por unanimidade das tres forzas políticas dirixirse á Xunta de Galicia e ao Goberno do Estado para solicitar a financiación íntegra do Servizo de Axuda no Fogar, de acordo coa Lei de Dependencia.

Tras un debate arredor da solicitude do Plan Concertado de Servizos Sociais —no que BNG, PSOE e PP coincidiron na insuficiente financiación por parte das administracións competentes e na asfixia económica á que se está sometendo aos concellos—, a alcaldesa propuxo un acordo de urxencia para reclamar o 100% da financiación e manifestar a insuficiencia da suba anunciada pola Xunta nos últimos días.

A alcaldesa, Ana Ermida, explicou que “os números en groso dos servizos sociais amosan que estes servizos custan ao Concello de Barreiros 1 millón de euros, dos que a Xunta aporta uns 300.000”.

“Nesta situación é insostible que o Concello poida prestar os servizos que lle corresponden, porque se está facendo cargo da financiación dun servizo básico que afecta directamente á vida das persoas e que non pode deixar de prestar. Pero esa financiación municipal detráese doutras obras ou servizos que tamén deberiamos poder ofrecer, e así estase poñendo en risco a viabilidade municipal”, sinalou.

A rexedora destacou que, con este acordo das tres forzas políticas, “trátase de poñer por diante a defensa dos concellos, do Concello de Barreiros, e reclamar ante quen corresponda que se asuman as obrigas de financiación para garantir o funcionamento do SAF e do conxunto dos servizos municipais”.