O PSOE acusa aos alcaldes de Xove e Cervo de “xogar á confrontación” con Alcoa

Madrid, 8 de maio, 2026. A deputada Patricia Otero e o senador César Mogo afirmaron que “as declaracións efectuadas hai 48 horas polos representantes do PP da Mariña puxeron de manifesto que a melloría que experimentou a situación de Alcoa nos dous últimos anos para eles é unha pésima noticia; pero o máis sorprendente é que tamén o sexa para os seus alcaldes”.

Avances na planta e crítica ao discurso do PP

Patricia Otero subliñou que “queda moito por facer até garantir a viabilidade definitiva da empresa, pero só desde a mala fe se pode negar o que se avanzou neste tempo, como proba que hoxe a produción estea ao 100%, con todas as cubas en funcionamento. Todos os traballadores sábeno, pero o PP empéñase en tentar alarmalos sen fundamento”.

Pola súa banda, o senador César Mogo engadiu que “o máis grave é que os alcaldes de Xove e Cervo, en lugar de preocuparse polos seus veciños, xogasen tamén á confrontación, amosando unha ignorancia impropia de quen ten responsabilidades públicas”. Destacou ademais que, grazas ás políticas do Goberno de España en materia de renovables, “o prezo almacenista por megawatt/hora é hoxe dos máis baixos de Europa, menos da metade do de Alemaña ou Italia”.

Investimentos do Goberno e falta de implicación da Xunta

A deputada Otero acusou ao PP de ocultar o compromiso do Goberno coa viabilidade de Alcoa: “Non mencionan as axudas recibidas para compensación de emisións de CO₂ e para electrointensivas, que superan os 30 millóns de euros, nin os máis de 40 millóns concedidos hai unhas semanas para substituír o forno de cocción de ánodos”.

Engadiu que “é patético que o PP só busque rendibilidade política en lugar de esixir á Xunta de Galicia, con competencia industrial exclusiva, que tamén arrime o ombreiro”.

Chamamento á responsabilidade institucional

Mogo lamentou que “a alcaldesa de Cervo e o alcalde de Xove se sumen a esta guerra en lugar de trasladar confianza aos seus veciños”, algo que cualificou de “preocupante e indignante”.

Os parlamentarios concluíron que “a estratexia de terra queimada do PP só conduce a xerar preocupación cando a situación é hoxe considerablemente mellor que hai uns anos”. Tamén destacaron que á mellora contribúe “a subida do prezo do aluminio nos mercados internacionais, que supera xa os 3.500 dólares por tonelada”.

“Queda moito por facer e non botamos as campás ao voo, pero o camiño é estar cos traballadores de Alcoa, non querer valerse deles como fai o PP”, finalizaron.