Viveiro, 28 de xullo, 2026. O BNG de Viveiro cuestiona a actitude da Xunta de Galicia ao considerar que as últimas decisións de Portos de Galicia van contra os intereses da veciñanza e supoñen un cambio de criterio “sen explicación”, con efectos negativos tanto na mobilidade como nas reivindicacións sociais do municipio.
A formación lembra que durante anos Portos de Galicia foi permisivo co desenvolvemento de actividades sociais e económicas no seu dominio público, sempre que fosen compatibles coa actividade portuaria e contribuísen ao interese xeral. Porén, nas últimas semanas, o BNG considera que o organismo dependente da Xunta iniciou actuacións “difíciles de comprender” e claramente prexudiciais para Viveiro.
Entre elas, destaca o peche do acceso á zona portuaria durante o Resurrection Fest para impedir o estacionamento de vehículos, unha medida inédita ata o de agora. O BNG sostén que existían alternativas baseadas na coordinación entre administracións para compatibilizar o uso do espazo coa actividade portuaria.
Tamén critica a prohibición de que o autobús urbano realice a parada no Porto de Celeiro, un servizo que se prestaba desde abril coa liña circular Escourido–Celeiro. Portos xustificou a decisión ao considerar que se trata dunha actividade allea á actividade portuaria.
A portavoz do BNG, Iria Cotelo, asegura que “non se entende esta decisión súpeta, máis cando no porto tamén se desenvolven outras actividades, como as hostaleiras ou o servizo de taxis, que prestan un servizo ao ben común e son perfectamente compatibles coa actividade portuaria”. Lembra que a parada era especialmente útil para persoas traballadoras do porto e para mariñeiros que desembarcan cos petates, que agora deberán desprazarse a pé ata a Praza do Náufrago “sen ningunha xustificación”.
O BNG denuncia tamén a retirada das pancartas reivindicativas instaladas no valado fronte ao centro de saúde, pertencentes á Plataforma Sanitaria e á propia organización nacionalista. Cotelo afirma que “en Viveiro sempre houbo cabida para as reivindicacións sociais, que non fan mal a ninguén, agás aos intereses do Partido Popular”, e vincula a retirada das pancartas á visita de cargos do PP durante a procesión dos barcos.
A portavoz considera que “este intento do PP de silenciar o clamor social non vai impedir que a veciñanza continúe reclamando, por outras vías, unha sanidade e unhas estradas dignas”.
O BNG estende as críticas ao goberno municipal, ao que acusa de pasividade e de aliñarse sistematicamente co Partido Popular. A formación asegura que o executivo local “non buscou solucións ao problema de aparcamento durante o Resurrection Fest, intensificou as sancións, non defende a continuidade do autobús urbano, non reclama melloras para o centro de saúde e acepta unha estrada deficiente no lugar dunha verdadeira variante”.
Cotelo subliña que o máis preocupante é o cambio de actitude de Portos de Galicia: “Durante anos, con outros gobernos, Portos nunca puxo problemas. Agora que goberna o Partido Popular só vemos prohibicións que van en contra dos intereses da veciñanza”.
O BNG aposta pola colaboración entre administracións para compatibilizar a actividade portuaria coas necesidades da veciñanza, garantir servizos públicos de calidade e respectar as reivindicacións sociais. “Viveiro merece unha alcaldesa que poña por diante os intereses da súa xente, que dialogue e que non actúe como unha simple delegación da Xunta”, conclúe Cotelo.
Arxentina de nacemento e viveirense de corazón, retomou en Galicia a súa vocación artística e atopou na escultura a súa forma de expresión. A súa obra céntrase en figuras humanas cargadas de emoción, en soidade ou en relación cos outros. A exposición reúne pezas seleccionadas e premiadas en certames de Madrid, Barcelona, Valdepeñas e Florencia nos últimos oito anos, que agora regresan —como a súa autora— á casa. Poderá visitarse ata o 29 de agosto.
Villares gabou o traballo do club Val de Francos, “que en tempo récord logrou situar esta cita entre as máis atractivas da provincia para os afeccionados á hípica”. Neste sentido, destacou a proxección que está a gañar este deporte e o impulso que recibe da Xunta, principalmente a través dun convenio coa Federación Hípica Galega polo que destina máis de 80.000 euros para as actividades a desenvolver este ano. A proba discorrerá por camiños forestais de terra, a excepción dos cruces de estradas, e constará de tres modalidades, con distancias de 80, 60 e 40 quilómetros respectivamente.
A clasificación final quedou do seguinte xeito: en Sub-10, Los 5 FC proclamáronse campións, seguidos de Los Balones; en Sub-12, o primeiro posto foi para Aston Birra, seguido de Minavo de Kiev e The Blues Bananas; en Sub-15, o equipo Piti levou o título, seguido de PDC e Camoca; en Sub-17, PDC acadou o primeiro posto, por diante de Papa Cu Leti e Motototo; e na categoría Sénior, Motototo resultou gañador, seguido de Descansa e Texeira Lima. As medallas foron entregadas pola alcaldesa, Dolores García Caramés, acompañada polos concelleiros José Manuel Balseiro e Alfredo Fernández, que felicitaron a todos os participantes polo seu esforzo e deportividade.
As reservas poderán realizarse por teléfono, chamando ao 982 560 162, ou a través do correo electrónico cultura@viveiro.gal, en horario de 9:00 a 14:00 horas. Cada persoa poderá solicitar un máximo de catro entradas. Desde o Concello de Viveiro anímase á veciñanza a asistir a esta representación e lembra que as reservas se atenderán a partir da apertura do prazo.
A clasificación final situou a Braulio Gayoso (TM Luarca) como gañador, seguido de Eugenio Alonso (CD San Ciprián), e dun terceiro posto compartido por Carlos Ron (Atletic Génova TM) e Domingo Larriety (TM Luarca). A alcaldesa de Cervo, Dolores García Caramés, entregou os trofeos e destacou o éxito dun torneo que xa se consolidou como unha cita imprescindible do calendario deportivo estival. O Concello felicita aos gañadores, a todos os participantes polo alto nivel amosado durante a xornada e ao CD San Ciprián pola excelente organización dun evento que continúa reforzando o seu papel como referente do tenis de mesa no norte peninsular.
Durante o evento realizouse unha ofrenda aos mariñeiros falecidos e, seguidamente, tivo lugar a subida da imaxe da Virxe do Carme ata a Igrexa. Esta última xornada continuou cunha misa solemne, á que asistiron numerosos veciños e visitantes que se achegaron ata a localidade mariñá, seguida da procesión acompañada pola Banda Naval e de actuacións musicais. A programación completarase a partir das 17:00 horas con diferentes actividades para os máis cativos e cativas.
Estará dedicada á figura de Leopoldo Calvo-Sotelo, xa que neste 2026 cúmprese o centenario do nacemento de quen fora presidente do Goberno. No acto interviñeron o presidente do RCNR, Pablo Fernández, o director territorial de Deportes da Xunta, Manuel Otero, un dos fillos do tamén alcalde honorario de Ribadeo Víctor Calvo-Sotelo, e o rexedor ribadense, Dani Vega. Todos exaltaron a práctica deportiva na ría, a labor desenvolvida polo Real Club Náutico e a vinculación de Leopoldo Calvo-Sotelo co estuario. Entre o público asistente estaban máis membros da familia Calvo-Sotelo, directivos e ex directivos do RCNR, edís de Ribadeo e representantes de Acisa.
