Pablo Díaz asegura que o alcalde popular deu instrucións verbais aos traballadores para non realizar compras con cargo ao Concello en establecementos que amosen publicamente a súa oposición ao proxecto
Abadín, 24 de agosto de 2026. O Grupo Municipal Socialista de Abadín denunciou este luns que dende o Goberno local do PP se terían dado instrucións verbais aos traballadores municipais para evitar realizar compras con cargo ao Concello en establecementos e negocios que teñan colocadas pancartas de ‘Biometano Non’.
“Temos constancia de que se trasladaron indicacións aos traballadores para non acudir a determinados establecementos polo simple feito de teren exposta unha pancarta contra o biometano. Se isto é así, o que está a acontecer en Abadín é dunha gravidade enorme e que require explicacións inmediatas”, afirmou o voceiro socialista, Pablo Díaz.
O portavoz do PSdeG cualificou esta situación de “absolutamente inadmisible” e advertiu de que os recursos públicos “non son propiedade do alcalde nin poden utilizarse para premiar a quen cala ou castigar a quen manifesta unha opinión diferente á do Goberno municipal”.
Díaz subliñou que calquera comerciante, empresario ou veciño de Abadín “ten todo o dereito a expresar publicamente a súa posición sobre un proxecto que afecta ao municipio sen temor a sufrir ningún tipo de represalia por parte da administración”.
“Unha pancarta de ‘Biometano Non’ non pode converter un negocio nun obxectivo do Concello. Unha administración pública ten que actuar con imparcialidade e tratar a todos por igual, independentemente das opinións que expresen os seus responsables”, engadiu.
O Grupo Socialista avanzou que levará este asunto ao vindeiro Pleno municipal para que o PP explique se existiron estas instrucións, quen as deu, a que traballadores se lles trasladaron e dende cando se estarían aplicando. “Queremos saber como pretende xustificar o alcalde que determinados establecementos poidan recibir un trato diferente simplemente por expresar libremente unha opinión que non coincide coa súa”, afirmou Díaz.
As e os socialistas consideran que utilizar os recursos municipais para discriminar establecementos pola súa posición sobre o proxecto sería unha actuación especialmente grave. “Non se pode ser tan ruín. Utilizar os recursos de todos para intentar castigar a quen pensa diferente é unha forma de actuar que non debería ter cabida nunha administración pública”, denunciou.
Díaz relacionou estes feitos co acontecido no último Pleno municipal, no que o rexedor ordenou a súa expulsión da sesión mentres exercía a función de control da oposición. “Primeiro chama á Garda Civil e expulsa do Pleno a un concelleiro por formular preguntas. Agora coñecemos posibles represalias contra negocios que colocan unha pancarta de ‘Biometano Non’. Pensar diferente, preguntar ou expresar publicamente unha opinión non pode converter a ninguén nun obxectivo”, criticou.
O voceiro socialista insistiu en que “Abadín non pode funcionar con represalias”. “A liberdade de expresión non se castiga, o comercio local non pode utilizarse como arma política e a oposición non se silencia por facer preguntas. O Concello ten a obriga de respectar e tratar por igual a toda a veciñanza”, concluíu.
Dez minutos antes das 21:30 horas do xoves, o 112 Galicia foi informado polo persoal de Adif dun tren detido no medio dun túnel en Mogor, Mañón, debido a unha chapa metálica no medio da vía. Así, aínda que as doce persoas que viaxaban a bordo estaban ilesas, precisaban medios de rescate para baixalas do convoi e desprazalas ata o apeadeiro máis próximo. Nestas tarefas colaboraron a Garda Civil, os Bombeiros do Eume, o GES de Ortigueira e os voluntarios de Protección Civil de Mañón. Finalmente, as persoas foron rescatadas e evacuadas a outro tren, que as levou ata o apeadeiro sen maiores complicacións. Desde alí, continuaron a súa viaxe en taxi.
Competirán durante tres días xunto a outras dezaseis escolas de todo o mundo, elaborando catro propostas de pizza: Polbo á galega, con polbo galego, queixo San Simón e allada picante; Bosque galego, con crema de castañas e mel picante; Terra meiga, con zorza picante; e Rapadoira, con setas, queixo azul e pera. As estudantes viaxan acompañadas pola súa profesora, Conchi Carreiras, coa que levan tempo preparando as receitas. Esta é a terceira participación do IES de Foz neste certame, no que xa acadaron un segundo posto en edicións anteriores. A actividade forma parte do programa Erasmus+ da FP, financiado pola Unión Europea, que facilita a participación do alumnado en competicións de habilidades profesionais por toda Europa.
A xornada comezará ás 12:00 h cun faladoiro titulado “Vizoso e nós”, no que participarán Pepe Penabade, Pepe Blanco, Caxigueiro, Aurelia Balseiro e Mª Cristina Rubal González, moderados por Antonio Reigosa. Ás 13:20 h abrirase a exposición “Xosé Vizoso. O neno que debuxou un cabalo”, que permanecerá dispoñible durante as festas de San Lucas. A partir das 13:45 h terá lugar o acto de inauguración e descuberta da placa da nova rúa Xosé Vizoso, na Praza da Fonte Vella, coa presenza de autoridades, familiares e amizades do artista. As persoas asistentes recibirán no auditorio unha lámina cunha obra de Vizoso como agasallo.
Ás 15:15 horas deste martes, un particular solicitou asistencia sanitaria tras a caída dun raio no lugar de Castro de Igrexa (Cazás, Xermade). Varias persoas sentiron os efectos da descarga eléctrica e unha delas quedou atolada. Tras dar aviso ao Servizo de Urxencias Sanitarias de Galicia-061, Garda Civil e Protección Civil, a persoa afectada foi evacuada consciente ao Hospital Universitario Lucus Augusti.
A exposición, instalada no Centro Comarcal Pazo de San Tomé, invita a observar con calma, descubrir historias e poñer en valor un patrimonio vivo que forma parte da nosa identidade. Unha maneira diferente de achegarnos ao mundo rural que tanto significa para As San Lucas.
Co sol ocultándose e a lúa asomando entre as torres de Donlebún, o músico e divulgador reivindicou o poder evocador e transformador do bravú fronte á morriña paralizante. Na sala de lectura da biblioteca, Souto explicou a evolución do rock bravú no imaxinario galego, evocando as músicas populares que acompañaron durante décadas os remolques dos pascualiños e os labores comunitarios, e lembrando a vitalidade de grupos como Skornabois, Diplomáticos de Monte Alto, Xenreira, Zënzar, Pinto de Herbón ou os Rastreiros. A boa lembranza da súa anterior visita levou ao artista a pechar a velada interpretando o “Himno de Ribadeo”, composto por Arturo Mogo, nun final cheo de afecto pola vila e pola súa identidade cultural.
