O PSOE de Viveiro acusa á Xunta de bloquear durante anos a rotonda da Misericordia pese a estar proxectada

Viveiro, 25 de setembro, 2026. O PSOE de Viveiro celebra que a Xunta de Galicia avance finalmente na execución da nova rotonda da Misericordia, unha actuación necesaria para mellorar a seguridade e facilitar a circulación, especialmente dos vehículos pesados.

Os socialistas consideran imprescindible contar toda a historia, porque esta actuación non nace agora nin é un proxecto que comezase coa chegada de Mariña Gueimunde á Alcaldía. Afirman que a rotonda da Misericordia podería estar feita desde hai anos.

O anterior Goberno socialista redactou o proxecto e realizou toda a tramitación previa necesaria, incluído o longo procedemento relacionado cos terreos de Costas e as xestións ante as diferentes administracións implicadas. Foi precisamente esa tramitación a que levou máis tempo. Cando finalmente se dirixiron á Xunta, o Concello xa fixera o seu traballo: había proxecto e estaba realizada a tramitación previa necesaria para poder avanzar na actuación.

Os socialistas subliñan que non acudiron á Xunta para pedir unha subvención para unha obra municipal, senón porque as estradas son de titularidade autonómica e era a Xunta de Galicia a que tiña que actuar. Engaden que nin sequera foron os responsables autonómicos os que se desprazaron ao Concello de Viveiro para abordar o proxecto, senón que foi o Goberno municipal quen tivo que acudir á Delegación de Pesca e Mar en Viveiro para reunirse cos responsables da Xunta. Alí presentaron o proxecto e explicaron todo o traballo realizado.

A resposta da Xunta foi que non había orzamento. E naquela reunión estaba Mariña Gueimunde, daquela representante da Xunta de Galicia. Estaba alí cando a Xunta lle dixo que non a Viveiro, e calou. Non reclamou diante dos responsables da súa propia administración que se acometese unha actuación necesaria para o seu municipio.

Pouco tempo despois cambiou o Goberno de Viveiro. E, de súpeto, cambiou tamén a resposta da Xunta. Agora hai investimento. Agora os responsables autonómicos desprázanse a Viveiro. Agora hai anuncios. E agora a alcaldesa presenta como un logro unha actuación que o anterior Goberno socialista deixara proxectada e coa longa tramitación previa realizada.

Por iso, desde o PSOE formulan unha pregunta: se a rotonda era necesaria daquela e é necesaria agora, se as estradas eran da Xunta daquela e seguen sendo da Xunta agora, e se o Concello xa realizara o traballo previo, por que daquela non había orzamento e agora si?

Para o PSOE de Viveiro, a sucesión dos feitos evidencia o trato político que recibiu o municipio durante os anos de Goberno socialista. “A rotonda podería estar feita desde hai anos. Non faltaba necesidade nin traballo por parte do Concello. Faltou a vontade da Xunta de Galicia para executala.”

Os socialistas consideran especialmente difícil de aceptar que quen hoxe reivindica esta actuación como alcaldesa estivese naquela reunión como representante da Xunta e non defendese diante da súa propia administración que Viveiro merecía esa inversión. “Esa é a diferenza que queremos que coñezan os veciños. Mariña Gueimunde reclama agora á Xunta desde a Alcaldía o que non lle reclamaba cando estaba na oposición e ocupaba responsabilidades no propio Goberno galego.”

Desde o PSOE considérase que este caso exemplifica unha forma de facer política que Viveiro non merece. “Nós queremos que a Xunta invista en Viveiro sempre. Cando goberna o PP e cando goberna o PSOE. Porque os cartos da Xunta non son do Partido Popular: son de todos os galegos e galegas.”

Os socialistas subliñan que a actuación conta co seu apoio porque é positiva para Viveiro e porque responde a unha necesidade pola que xa traballaron desde o Goberno municipal. Pero iso non significa aceptar que se reescriba o sucedido. “Alegrámonos de que por fin se faga. O que lamentamos é que non se fixese cando xa podía facerse. E a alcaldesa terá que explicar por que agora reclama e anuncia o que non defendeu cando estaba do outro lado, formando parte da Xunta de Galicia.”

Para o PSOE, a conclusión política é clara: Viveiro non pode depender da cor política de quen ocupe a Alcaldía para recibir os investimentos que necesita. Porque durante aqueles anos o “non” da Xunta non era un “non” a María Loureiro nin ao Partido Socialista. Era un “non” a Viveiro.