Non aprenden

02 Abril, 2011

Non aprenden

Semella que hai xente que non aprende nin que baixen os anxos. Desta volta tocoulle ao señor Aznar laretar usando os vellos tópicos sobre os galegos e galegas á hora de se referir ao seu compañeiro de partido, o señor Rajoy. Nin me paro a reproducir as verbas do presidente da FAES. Como sempre, o líder do PP, disque presidente in pectore do goberno, mira cara a outro lado como se non fora con el. Sen desaproveitar a ocasión de quedar ben, o señor Feijoo acudiu a dar os parabéns ao señor Aznar polo uso da expresión ôgallegoö. Iso si: onde Aznar entendía “indefinición”, Feijoo matizaba “moderación2. Xa é darlle voltas ao significado, oes.

Chama a atención esta reacción de Feijoo, pois cando outros persoeiros da política española ousaron empregar o termo “gallego” con connotacións pexorativas o actual presidente da Xunta reaccionou con contundencia. Por que non agora? Porque foi o señor Aznar quen o fixo? De novo se axeonlla o PP(deG?) ante o líder da FAES? Fai o mesmo cando Aznar proclama a can e gato que hai que rematar coas autonomías? Ou cando afirma que hai que privatizar as tv autonómicas? Ou cando defende que a única lingua verdadeiramente importante é o castelán?

Cando a señora Magdalena Álvarez, colmo de despropósitos para Galiza no Ministerio de Fomento, foi criticada rindo a conta do seu falar andaluz (e por moitos do PP tamén), o señor Javier Arenas petou forte na mesa e proclamou a quen quixera oír que ninguén se ía meter coa súa paisana polos seus falares; con Andalucía ninguén ía xogar. Quen quixera que criticara a ineficacia da señora Álvarez, el o primeiro, pero non a súa condición de andaluza.

Señor Aznar, se non lle serve Rajoy como líder da dereita española critíqueo canto queira, mova “dedo” no seo do seu partido. Pero non o faga a conta dos galegos e galegas. E vostede señor Feijoo, non dea mostras de tanto oportunismo nin covardía política. Defenda a súa condición de galego sempre, non só cando lle conveña para atacar a outros adversarios políticos na súa carreira cara á Moncloa.

Farruco GRAÑA