129 persoas optan ás bolsas de emprego no sector da innovación da Deputación

Nota de prensa:
129 persoas optan ás bolsas de emprego no sector da innovación da Deputación

– A Deputación publicou este venres, tanto no taboleiro de anuncios como na súa páxina web, a listaxe de admitidos no proceso de selección das 30 becas remuneradas

– O seguinte paso será a avaliación do expediente académico, a experiencia profesional e a memoria do proxecto de cada solicitante, cuxos resultados se coñecerán o 20 de abril

– Os beneficiados traballarán durante 6 meses desenvolvendo proxectos tecnolóxicos que obterán, sen custe algún, empresas sen ánimo de lucro

A Deputación publicou este venres, tanto no taboleiro de anuncios, como na páxina web www.deputacionlugo.org, a listaxe de admitidos no proceso de selección das primeiras bolsas de emprego no sector da innovación na provincia. 129 lucenses actualmente no paro, licenciados, diplomados ou con formación profesional –FP-, optan agora a unha das 30 becas remuneradas con 800 euros mensuais, que ofertan 6 meses de emprego en entidades sen ánimo de lucro, as cales desexan desenvolver novos proxectos tecnolóxicos para potenciar a súa actividade.

O seguinte paso será a avaliación do expediente académico, a experiencia profesional, e a memoria do proxecto a desenvolver de cada solicitantes. O resultados desta fase, que puntuará cun máximo de 7 puntos, darase a coñecer o vindeiro mércores, 20 de abril. As puntuacións tamén se publicarán no taboleiro de anuncios e na web do organismo provincial. Ese mesmo día, daranse a coñecer tamén as datas nas que se desenvolverán as entrevistas persoais, última parte do proceso de selección, que contará como moito 3 puntos.

As bolsas de emprego no sector da innovación na provincia están impulsadas dende o 1º Centro de Innovación Social de Galicia –“In Lugo”-. Trátase dun proxecto da Deputación, cofinanciado polo Ministerio de Industria nun 88,9% mediante o Plan Avanza. Estas becas buscan dar emprego a lucenses que actualmente se atopan en paro, así como ofrecer un servizo, sen custe algún, ós colectivos sen ánimo de lucro que se sumaron á iniciativa da Deputación. Son:

– Centro Tecnolóxico Agroalimentario de Lugo, CETAL: o proxecto a desenvolver neste colectivo consiste na identificación das necesidades tecnolóxicas e de produtos innovadores no sector agroalimentario da provincia, ademais da transferencia desta información ós traballadores neste campo.

– Asociacións de Jóvenes Empresarios –AJE-, de Empresarias de Lugo, e Empresarial de Industria de Transformación del Polígono do CEAO: formación especializada ós empresarios para coñecer as necesidades das entidades en materia de innovación, e facilitar ó cambio de cultura nos procesos empresariais.

-Universidades de Santiago de Compostela. Aula TIC: elaboración dunha guía de boas prácticas no emprego da Administración electrónica dirixida ós cidadáns e as entidades sen ánimo de lucro.

-Universidade da Coruña. CITIC: creación de produtos e servizos informáticos dirixidos á empresa.

As bolsas de emprego no sector da innovación engádense ás becas Lug02 mediante as cales 18 mozos lucenses están xa a traballar en prestixiosas empresas de Hamburgo, Praga, Belfast, Florencia, Viena e Lisboa nas que se empregan innovadoras técnicas medioambientais. Unha vez que rematen o período de formación nestas entidades, os rapaces terán a oportunidade de poñer en práctica o aprendido en empresas lucenses durante 8 meses, nos que percibirán un salario mensual de 1.000 euros. Da mesma forma, tamén se convocaron as primeiras 5 bolsas de artesanía e deseño de Lugo dotadas con 12.000 euros cada unha, que se resolverán nos vindeiros días.