Máis de 400 persoas gozaron da Festa das Letras organizada polo BNG de Foz

Nota de prensa

Máis de 400 persoas gozaron da Festa das Letras organizada polo BNG de Foz

Basanta declarou que “o BNG desde o Concello poñerá esta data no calendario como un día de festa e de reivindicación aberto a todos os veciños e veciñas de Foz”

Foz a 18 de maio de 2011.- O Bloque Nacionalista Galego celebrou onte, 17 de Maio, no Polideportivo do Campo da Cabana un acto de reivindicación dos nosos sinais centrais de identidade como son a nosa lingua e a nosa cultura, cuxo nome foi a “Festa das Letras” e que coa humildade desta primeira edición pretende converterse nunha referencia da actividade cultural no noso Concello.

O programa deste acto comezou cun espectáculo de maxia para os máis cativos, a cargo dos magos de Burela “Pi e Senin” que puxeron en cea, trucos do seu repertorio habitual con novos trucos que sorprenderon aos cativos e non tan cativos. Despois procedeuse a proxección de “Riquezas Lucenses”, que dado o interese da xente houbo que facer dous pases, un documental que recolle os traballos da pesca e da conserva en Foz en 1946, centrados na empresa “Dalo”. A par da programación cultural prevista para esta xornada festiva pero tamén de reivindicación, o acto tivo un compoñente gastronómico coa Chourizada e Torrezmada popular, ao acudiron moitas persoas que disfrutaron ao mesmo tempo das actuacións de grupos tradicionais como, “Tumba e Dalle”, o “Grupo da Pomba do Arco” e “Músicos da Subela” que interpretaron diferentes temas e que fixeron do campo da Cabana un espacio para a foliada e a festa. O feito de escoller dous productos da terra, pretende valorizar tamén ese aspecto rural de Foz, na medida que na festa da Patria que celebramos en Xullo o producto é o chicharro lañado, tan ligado neste caso ao mar.

Xoán Carlos G. Basanta destacou que “queremos aproveita esta data para que sexa un pequeno espello do moito que se está a facer no mundo da cultura así como poñer en valor un elemento que é noso pero que ao mesmo tempo nos fai universais como é o idioma propio, un idioma que non ten máis dereito que ningún outro, pero que aínda a día de hoxe é víctima de persecución e segue apartado do espacio público”. E apuntalou que “o BNG desde o Concello poñerá esta data no calendario como un día de festa e de reivindicación aberto a todos os veciños e veciñas de Foz porque temos a sorte de conservar aínda o uso normalizado do noso idioma”

O candidato do BNG a Alcaldía de Foz indicou que “non é casual a elección do espacio para este acto, no corazón do Foz mariñeiro, un espacio que segue a conservar parte da identidade de Foz que as políticas urbanísticas dos últimos anos están a eliminar, e que nos temos claro que compre preservar. Pero tamén un espacio que recolle unha das páxinas máis substantivas da nosa historia e mesmo que mellor nos define, como pobo mariñeiro, traballador e embornado ao mar. Compre poñer en valor o noso pasado, preservar o que fomos, restaurar a nosa dignidade, para querernos e recuperar a autoestima”. Xa por último Basanta agradeceu a todos os veciños e veciñas que compartiron esta xornada con nós o bo ambiente que se formou.