O Observatorio pola Igualdade ve un recorte aos dereitos das mulleres no anteproxecto de Lei da Familia

NOTA DE PRENSA

O OBSERVATORIO DA MARIÑA POLA IGUALDADE CUALIFICA DE RETRÓGRADO  O ANTEPROXECTO DE  LEI DA FAMILIA DA XUNTA DE GALICIA.

Consideran que é un recorte nos dereitos das mulleres e un control na súa vida afectiva e sexual.

Pídenlle á Xunta que en lugar de “mirar atrás”  centre os seus esforzos en crear as condicións sociais e económicas necesarias para que homes e mulleres poidan ter  descendencia.

O Observatorio da Mariña pola Igualdade quere poñer de manifesto o seu total rexeitamento ó  Anteproxecto de Lei de apoio á familia e á convivencia recentemente presentado pola Xunta de Galicia.  Ademais de estar redactado nunha linguaxe sexista, consideran que é unha lei retrógrada que promove a volta a un modelo de familia tradicional e patriarcal no que a muller queda relegada ó ámbito doméstico e ó rol de nai e coidadora.

Con esta norma, o Goberno Galego recorta os dereitos das mulleres e  mestura, a través dun discurso de forte compoñente ideolóxica, maternidade e sexualidade, esquecéndose da liberdade individual das mulleres para ser ou non ser nais. A este respecto, e o máis grave, é que  esta  lei cuestiona o dereito das mulleres a poder interromper o seu embarazo ó considerar que a vida existe no momento mesmo da concepción.

Cunha muller relegada ás tarefas do fogar e á natalidade, a Administración semella perseguir un aforro económico. Coas mulleres na casa deixarían de estar nas listas do paro e non sería necesario a construción de servizos básicos de proximidade para axudar ós homes e ás mulleres no coidado das/os fillas/os, como son as escolas infantís, as actividades extraescolares e outros recursos como os centros de día ou os necesarios para os dependentes.

Dende o Observatorio da Mariña pola Igualdade ínstase á Xunta de Galicia a facer leis realistas, prácticas e que non persigan o control da vida afectiva e sexual das mulleres. Pídenlle, así mesmo, que creen as medidas necesarias para que homes e mulleres poidan ter un fillo e conciliar a súa vida laboral coa familiar.