O vicepresidente da Deputación critica o dobre discurso da oposción sobre o emprego na Mariña

Nota de prensa

ANTONIO VEIGA DIXO QUE “Á VISTA DAS ALEGACIÓNS APRESENTADAS NA DEFENSA DOS RECOÑECEMENTOS FRANQUISTAS, AGORA ENTENDEMOS Á PERFECCIÓN A ABSTENCIÓN DO PP”

O PP abstívose na votación para a retirada da presidencia de honra e a medalla de ouro a Franco

“Non se entende de ningunha maneira que o PP non apoie o acordo de goberno que trata de evitar a sobreexplotación hidroeléctrica na conca Miño-Sil”, afirmou Mario Outeiro

Veiga, sobre o acordo de emprego pola Mariña afirma que “hoxe queda patente o dobre discurso do PP: por un lado aproba EREs no Parlamento para botar a xente e aquí quere lavarse as mans amosando un falso apoio aos despedidos na Mariña, quen son a punta do iceberg que se aveciña”

Lugo, 27 de decembro de 2011. No pleno desta mañá da Deputación de Lugo, as tres iniciativas xermoladas polo BNG, referentes á situación económica da Mariña, retirada de mencións honoríficas a Franco e evitar a sobreexplotación hidroeléctrica na conca Miño-Sil, e que chegaban ao debate da corporación provincial como acordos de goberno acadaron a súa aprobación cos votos a favor dos membros das dúas forzas que compoñen o goberno. O grupo provincial do PP votou en contra da proposta de goberno de garantir a riqueza natural e paisaxística da Ribeira Sacra evitando a sobreexplotación hidroeléctrica, que ergeu a crítica do portavoz nacionalista, Mario Outeiro, quen afirmou que “parece que o PP segue instalado na política de ‘queda inaugurado este pantano’, porque non se entende doutra maneira que o PP non apoie o acordo de goberno que trata de evitar a sobreexplotación hidroeléctrica na conca Miño-Sil”. “Ao noso xuízo non é sostíbel medioambientalmente seguir executando máis aproveitamentos hidroeléctricos nesta conca, a non ser que o que se persiga sexa rematar dunha vez por todas co valor do noso patrimonio natural dos ríos Miño e Sil, actuando segundo o interese das empresas hidroeléctricas e contando para isto co beneplácito das administracións”.

E neste sentido, Mario Outeiro afirmou que “por iso demandamos na nosa moción á Xunta de Galiza e ao Goberno do Estado deben que se fagan cargo das súas competencias analizando cun profundo estudo de impacto ambiental e social sobre os aproveitamentos hidroeléctricos existentes na actualidade. Polo tanto, mentres non se coñezan as conclusións dos mesmos, as administracións competentes deberían proceder á paralización das obras dos novos aproveitamentos. No caso de que se acredita que as concas do Miño e do Sil se atopan sobresaturadas debíase proceder á paralización de novas concesións nesa dupla perspectiva de garantir as potencialidades turísticas da zona e tamén a súa potencia como produtora de enerxía eléctrica”.

A moción prosperou cos votos en contra dos once membros do PP presentes no pleno da corporación provincial.

Plan económico para a Mariña
O vicepresidente da Deputación de Lugo, o nacionalista Antonio Veiga, instou unha vez máis ao PP a estar “á altura das circunstancias e apoiar o paquete de medidas anticrise para a Mariña”, e reprochou á portavoz popular Elena Candia, quen se escudou nunha vontade “conciliadora” sobre esta problemática, afirmando que “que tipo de vontade conciliadora pode existir neste xeito de actuar, ao presentar o PP unha alegación á totalidade da moción que nós presentamos para substituíla por completo?”. E nesta liña, Veiga afirmou que “hoxe queda patente o dobre discurso do PP: por un lado aproba EREs no Parlamento para botar a xente e aquí quere lavarse a cara amosando un falso apoio aos despedidos na Mariña, quen son a punta do iceberg que se aveciña”. E Antonio Veiga quixo afondar nesta cuestión xa que “o que hoxe se está a padecer a nivel de destrución de emprego vai chegar a agravarse de non facer valer as administracións as súas competencias, e neste caso é a Xunta quen ten as competencias en Traballo e é quen non está facendo nada. De aí que con esta moción nos queiramos dirixir á Xunta de Galiza para que o executivo galego poña en marcha un plano de incentivación do emprego para a comarca da Mariña. En segundo lugar demándanse Planos de Acompañamento Social para aquelas persoas que se atopan en situación de desemprego, a comezar por aquelas persoas que se atopan sen cobrar ningún tipo de prestación, de cara a amortiguar a súa situación pero tamén de favorecer a súa inserción laboral. En terceiro lugar, liñas de financiación a conta do IGAPE para todos aqueles autónomos e PEMES da Comarca que se atopan atrapados en concursos de acredores e que como se consecuencia dos mesmos a súa viabilidade está en risco. E xa por último, a posta en marcha un Plano de Choque que fomente o consumo a fin de evitar o feche de centos de pequenos negocios”.

O PP negou o apoio a esta moción e presentaba unha alegación de substitución, que non foi admitida, polo que trala votación aprobouse esta proposta cos votos a favor dos membros do goberno e a abstención do PP.

Retirada das mencións honoríficas a Franco
Antonio Veiga, na proposta de retirada de todas as mencións honoríficas a Franco, como a Presidencia de Honra ou a Medalla de Ouro da provincia, ademais de despoxar destes títulos á Falanxe e a Pilar Primo de Rivera como responsábel da Sección Feminina, considerou que con esta retirada se fai “xustiza, e resárcese a aquelas persoas que padeceron a ditadura fascista”. Non obstante, por máis que desexábel, a unanimidade das forzas políticas nesta proposta non se produciu xa que un grupo de cidadáns presentou unhas alegacións pedindo o mantemento das distincións, fronte ao que Antonio Veiga dixo que “á vista das alegacións apresentadas na defensa do mantemento dos recoñecementos franquistas, e ollando os antigos membros do PP que respaldan estas alegacións (Veiga citou algúns exemplos de antigos cargos como ex director xeral de Interior da Xunta e ex delegado de Presidencia, Alfredo Sánchez Carro) agora entendemos á perfección a abstención do PP”.

Polo tanto, aprobouse a moción para tramitar que Franco deixe de ser presidente honorífico da Deputación de Lugo cos votos a favor de BNG e PSOE e a abstención do PP.

Coa aprobación desta iniciativa no Pleno, péchase un expediente administrativo aberto polo BNG en 2009 e que remata desta maneira cunha retirada das mencións honoríficas que en si o conxunto da cidadanía democrática aplaude. A decisión que a Deputación tomou esta mañá ten unha importancia histórica.