NOTA DE PRENSA:
O centro sito en Burela só foi superado polos complexos hospitalarios de Vigo e o Xeral-Calde, ambos situados en cidades, con maior poboación de referencia e cunha máis ampla carta de prestacións e servizos sanitarios
O HOSPITAL DA COSTA É O TERCEIRO QUE REXISTRA MAIORES LISTAS DE ESPERA DE TODA GALICIA
· Balseiro Orol afirma que a Xunta bipartita foi incapaz de poñer en marcha un plan de acción urxente para evitar que o da nosa comarca forme parte do triplete dos centros hospitalarios máis colapsados de Galicia.
· Segundo o candidato popular socialistas e nacionalistas pecharon os ollos ante esta realidade e, en consecuencia, non son capaces de ofrecer as solucións oportunas.
· Tamén a comparativa con respecto ao ano 2005 –último do Goberno do PPdeG na Xunta- resulta moi negativa para os actuais xestores do bipartito: Máis da metade das especialidades empeoraron o seu tempo de demora.
A Mariña, 13 de febreiro de 2009.- O deterioro progresivo do sistema público de saúde constitúe unha das problemáticas máis salientables que afectan ao benestar das veciñas e dos veciños da Mariña lucense. Consciente desta realidade o candidato número 3 da lista electoral do Partido Popular na nosa provincia, Jose Manuel Balseiro Orol lamenta que nestes catro últimos anos a deficiente xestión do Goberno bipartito e caos provocado dentro do Servizo Galego de Saúde teña como resultado un fracaso estrepitoso na loita contra as listas de espera.
O TERCEIRO POLA COLA
O Hospital da Costa non é alleo a esta realidade e, segundo os datos oficiais que poden ser consultados na web do propio SERGAS, o centro sito en Burela é o terceiro que maiores listas de espera rexistra de entre todos os hospitais galegos. Cada mariñán ve demorada nunha media de 76 días a súa cita co médico especialista.
SANIDADE COLAPSADA
Balseiro Orol amosa a súa disposición de loitar para que a principal infraestrutura sanitaria da Mariña deixe de ter a dubidosa honra de formar parte do triplete dos centros máis colapsados de toda Galicia. O Hospital da Costa só foi superado na súa ampla lista de espera en consultas polo complexo universitario de Vigo (con 82 días de demora) e polo complexo Xeral-Calde (con 91 días de espera) pero ambos son grandes hospitais radicados en cidades –Vigo e Lugo respectivamente-, con moita máis poboación de referencia e unha ampla gama de prestacións e servizos sanitarios, o que non permite ofrecer unha comparativa equitativa con respecto ao noso.
11 DÍAS MÁIS DE ESPERA QUE A MEDIA AUTONÓMICA
Na Mariña as listas de espera no Hospital son un 17% superiores ás do resto de Galicia. Mentres a media autonómica está situada en 65 días na nosa comarca chegan ata os 76 días de demora, isto é 11 días máis. Para o deputado popular, en certo modo, esta situación supera os límites do aceptable por dous motivos: a actual xerencia e os responsables políticos do bipartito manteñen pechados os ollos ante estes datos –lembremos que son oficiais- e, polo tanto, non teñen intención de corrixilos. A maiores, as estatísticas sobre demoras nas consultas non son totalmente reais, pois a maquillaxe estatística, que fai invisibles a centos, quizais miles de doentes, oculta unha realidade moito máis grave obrigaría a articular solucións urxentes e eficaces.
NA METADE DAS ESPECIALIDADES PEOR CA NO 2005
Por outra banda, a comparativa tampouco resulta satisfactoria se empregamos como ano de referencia o 2005, último período de xestión autonómica do Partido Popular. Tras catro anos do bipartito na Xunta as listas de espera empeoraron en 11 das 21 especialidades das que por entonces disponía o Hospital da Costa. Así por exemplo, o tempo de demora para acceder a unha primeira consulta foi superior en dermatoloxía (+53 días), neuroloxía e oftalmoloxía (ambas con +34 días), reumatoloxía (+31 días), anestesioloxía e recuperación (+24 días), medicina interna (+17 días), alergoloxía (+16 días), nefroloxía (+11 días), uroloxía (+8 días), cardioloxía (+7 días) e obstetricia (+1 días).
RESPONSABILIDADE EXCLUSIVA DO BIPARTITO
En todo caso, o candidato popular insistiu que en que o deterioro que rexistra actualmente a sanidade pública comarcal é imputable, en exclusiva, aos xestores políticos do Goberno bipartito xa que o Hospital da Costa, como o resto dos centros de medicina especializada de Galicia, dispón dun magnífico equipo de profesionais, á altura de calquera país europeo.
O domingo 20 de decembro a Praza César Chavarría acollerá de 11:00 a 20:00 horas unha nova edición do Mercadiño de Nadal organizado polo Concello de Lourenzá, “unha cita para desfrutar do ambiente destas datas e compartir unha xornada especial na nosa vila”, anuncia a alcaldesa, Rocío López. O prazo de inscrición para instalar cun posto xa está aberto e a participación é totalmente gratuíta. As solicitudes poden facerse ata o 16 de decembro nas oficinas do Concello de Lourenzá ou a través do teléfono 982.121.006.
Durante 45 minutos, tres malabaristas —Pablo Reboleiro, Aitor Garuz e Santiago Montero— mergúllanse nun caos divertido onde ninguén manda e todo flúe entre xogos de poder, equilibrios imposibles e humor. A obra amosa como, no mundo dos malabares, romper os patróns establecidos pode levar a descubrir que a verdadeira maxia está en aprender a xogar xuntos.
No encontro, abordáronse temas como a posibilidade de colaborar na mellora da formación dos traballadores, destacando a importancia que ten ese aspecto neste sector estratéxico para Galicia. Tamén se trocaron puntos de vista relativos ás condicións laborais dos profesionais do mar.
Pasadas as 13:30 horas deste luns, o 112 Galicia tivo constancia, a través de Urxencias Sanitarias de Galicia-061, dun ciclista que se atopaba en parada cardiorrespiratoria no quilómetro 1 da LU-151, á altura da parroquia de Fazouro. De inmediato, os xestores do Centro Integrado de Atención ás Emerxencias solicitaron a colaboración dos axentes da Garda Civil de Tráfico e da Policía Local de Foz. Malia os esforzos, os profesionais sanitarios só puideron confirmar o falecemento da persoa.
A variada oferta de produtos de artesanía e de alimentación de temporada e proximidade á venda complementouse con degustacións de minihamburguesas de carne de raza Limiá e empanada de carne de porco celta e tenreira de raza Caldelá, que se repartiron gratuitamente entre as peroas que fixeron algunha compra no Mercadiño.
Os cortes produciranse do punto quilométrico 2,800 ao final da vía. Habilitaranse desvíos alternativos que estarán debidamente sinalizados.
A xornada comezará ás 12:00 h cun faladoiro titulado “Vizoso e nós”, no que participarán Pepe Penabade, Pepe Blanco, Caxigueiro, Aurelia Balseiro e Mª Cristina Rubal González, moderados por Antonio Reigosa. Ás 13:20 h abrirase a exposición “Xosé Vizoso. O neno que debuxou un cabalo”, que permanecerá dispoñible durante as festas de San Lucas. A partir das 13:45 h terá lugar o acto de inauguración e descuberta da placa da nova rúa Xosé Vizoso, na Praza da Fonte Vella, coa presenza de autoridades, familiares e amizades do artista. As persoas asistentes recibirán no auditorio unha lámina cunha obra de Vizoso como agasallo.
