O alcalde de Ribadeo asinou en Santiago dous convenios por máis dun millón de euros

FERNANDO SUÁREZ ASINOU DOUS NOVOS CONVENIOS DOS ARIS DE RIBADEO E DE RINLO. O IMPORTE ASCENDE A 1.037.500 EUROS PARA INVERTIR NOS VINDEIROS CATROS ANOS. O ALCALDE DIXO QUE “ASÍ DAMOS UN PASO ADIANTE NA REHABILITACIÓN DOS DOUS CONXUNTOS HISTÓRICOS QUE TEMOS NO CONCELLO”.

Ribadeo, 14 de maio de 2012. O alcalde, Fernando Suárez, asistiu en Santiago á sinatura de dous novos convenios dos ARIS de Ribadeo e de Rinlo. O rexedor sinalou que “continuamos así dando un paso adiante na rehabilitación dos dous conxuntos históricos que temos en Ribadeo”. O importe dos convenios ascende a 1.037.500 euros, dos que o Concello aportará o 19%. Serán 200.000 euros os que destine á rehabilitación de espazos públicos.

O rexedor manifestou que “coa sinatura destes dous novos convenios das áreas de rehabilitación integral de Rinlo e de Ribadeo continuamos dando un paso adiante na rehabilitación dos dous conxuntos históricos que temos no noso concello. É unha inversión moi importante a que teremos que facer o Concello, o Ministerio e a Xunta ao longo dos vindeiros catro anos. Sobre un total de 1.037.500 euros de investimento o Concello terá que aportar o 19% desta cifra, é dicir uns 200.000 euros. Con esto, como outras veces, o que se fará é subvencionar a rehabilitación de vivendas, onde os particulares tamén terán que poñer unha parte, ao igual que Xunta e Ministerio. O Concello o que fai é rehabilitar espazos públicos tanto en Ribadeo coma en Rinlo”.

Suárez Barcia dixo que “estas iniciativas que tratan de recuperar o patrimonio, tanto o privado coma o público, aparte de beneficiar aos directos moradores desa zona tamén benefician a todo o oncello, poñéndoo máis atractivo para que sexa unha fonte de riqueza desde o punto de vista do turismo e para que a xente cando veña a Ribadeo poida ver un casco vello en proceso de rehabilitación, máis vivo que hai uns anos… E ao mesmo tempo é un apoio moi importante a estas actuacións que desde o Concello facemos, por unha banda axudando á xente a que rehabilite e por outra con aquela que ou non vive en Ribadeo ou se desentende do seu patrimonio aplicando unhas medidas máis coercitivas que tamén están dando resultado”.