600 persoas reservaron xa rutas do Km0 Fin de Semana, que arranca este sábado con actividades acuáticas en Ribadeo
– 24 socios do colectivo Xuvenalfoz estrearán a nova etapa do programa medioambiental, co que a Deputación quere abrir o abano de público participante e potenciar os beneficios económicos que ten para as PEMES e autónomos da provincia
– A modalidade Xtreme é a máis demandada para as catro fin de semanas de xullo, pois, ademais de actividades multiaventura na vila ribadense, haberá unha viaxe en helicóptero
– O Deputado de Cooperación recibiu este martes a un grupo da Asociación de Amigos do Patrimonio de Castroverde, que viaxou ó Vicedo
Tan só seis días despois de que a Deputación anunciase a posta en marcha do Km0 Fin de Semana, xa hai preto de 600 persoas que teñen reservada unha ruta nesta nova modalidade do programa medioambiental, que o organismo lugués pon en marcha co obxectivo de abrir o abano de público participante e, deste xeito, potenciar os beneficios económicos que ten para as PEMES e autónomos da provincia. Deste xeito, coas 566 reservas feitas a día de hoxe, están cubertas todas as fins de semana deste mes de xullo, de setembro e de outubro (en agosto non hai programación).
24 socios do colectivo xuvenil Xuvenalfoz estrearán este sábado, 7 de xullo, o Km0 Fin de Semana, que arranca con actividades acuáticas en Ribadeo, precisamente o Concello máis demandado e que máis volume de negocio concentrou ata o momento. O grupo alfocense iniciará a xornada cun percorrido polas cetáreas de Rinlo e Illa Pancha e, tras comer no restaurante O Cabazo, gozará de diversas actividades acuáticas no porto deportivo da vila mariñana.
A modalidade Xtreme é a máis demandada para as catro fin de semanas de xullo, pois, ademais de actividades multiaventura en Ribadeo –solicitadas para este sábado e para o 28 de xullo-, haberá unha viaxe en helicóptero o día 21.
A Deputación decidiu poñer en marcha o Km0 Fin de Semana tras constatar, grazas a un exhaustivo balance elaborado por persoal da Deputación, os beneficios económicos que xera -1,5 millóns de euros de volume de negocio dende a súa posta en marcha hai tres anos e medio- e pola demanda das propias empresas colaboradoras, que a día de hoxe son preto de 250 PEMES e autónomos, que dan emprego directo a unhas 1.400 persoas. Para fomentala participación, o organismo provincial enviou información sobre a nova etapa de Km0 a 500 asociacións da provincia, sobre todo xuvenís e culturais.
Tres rutas pola semana
En canto á programación ordinaria da semana, seguirá habendo actividades os martes, mércores e xoves, aínda que unicamente unha ruta, non dúas como ata o momento. Deste xeito, nesta primeira semana de xullo 144 persoas desprazaranse á Mariña e á Ribeira Sacra. O Deputado de Cooperación e Asistencia ós Concellos, Juan José Díaz Valiño, recibiu este martes no Salón de Actos do Pazo de San Marcos ó primeiro grupo da semana, 48 integrantes da Asociación de Amigos do Patrimonio de Castroverde. O itinerario continuou cunha visita ás instalacións da Fundación TIC, dependente da Deputación, unha comida no restaurante Area Grande do Vicedo, e percorridos ó faro de Estaca de Bares, Illa Coelleira, á praia de Area e ó porto vicedense.
A zona de Amandi será o destino das outras dúas rutas da semana, solicitadas pola Asociación de Veciños de Triabá, de Castro de Rei, e da Unión Democrática de Pensionistas (UDP) de Lugo. No caso do colectivo de Castro de Rei, 48 persoas coñecerán mañá mércores a olería de Bonxe, farán unha ruta de sendeirismo hasta Pena do Castelo e logo darán un paseo en catamarán por Amandi. A comida terá lugar no restaurante A Cantina de Doade. Pola súa banda, 48 socios da UDP lucense desprazaranse o xoves ó mazo de Santa Comba, comerán no restaurante Casa Felisa de Doade, farán unha ruta de sendeirismo hasta Pena do Castelo e logo embarcarán no catamarán.
Como inscribirse
Todos os interesados en participar en Km0 poden inscribirse de xeito rápido e sinxelo chamando ó número de teléfono 982-26-00-74/75; ou entrando en www.deputacionlugo.org onde, dende a portada, deberán acceder ó espazo Km0, cubrir o formulario e envialo á km0@deputacionlugo.org A continuación, poderán efectuar o pago, que será de 8 euros para grupos de menos de 24 persoas e individuais, e de 5 euros para grupos de máis de 24 persoas. Quedan excluídos da modalidade de pago todos os colexios e institutos públicos. A institución facilita dúas modalidades de pago: persoalmente no servizo de Tesourería (Pazo de San Marcos) ou nas sucursais de NovaGalicia (co número de conta 20800152663110001425).
A reserva e pago das rutas tamén pode facerse a través da plataforma de comercio electrónico www.losproductosdelugo.com da Deputación, onde o usuario ten que pinchar, á esquerda do portal, no apartado Ocio, onde atopará un link cos itinerarios. Optando por esta alternativa, os participantes teñen un desconto do 10% no custe das actividades.
O Concello destaca que este novo éxito é froito do compromiso, do esforzo e da dedicación constante do deportista, cualidades que lle permiten seguir acadando resultados destacados a nivel estatal. Desde a entidade municipal transmítense os parabéns a González Villares por este subcampionato de España.
A proba, organizada polo CP Altrúan, reuniu máis de 130 palistas dos seis clubs lucenses de augas tranquilas que participan na competición: o propio Altruán, o CD San Ciprián, o Club Kayak Foz, o CP Viveiro Urban Hotel, o Cidade de Lugo e o Club Fluvial de Lugo. O deputado de Mocidade Daniel García entregou os premios da proba, na que Club Fluvial de Lugo, Cidade de Lugo e Altruán coparon o podio por equipos. A Copa Deputación de Piraguismo, que conta de 6 regatas, organízase no marco da colaboración que a Vicepresidencia da Deputación de Lugo mantén coa Federación Galega de Piragüismo para a promoción deste deporte, ofrecendo aos clubs a posibilidade de participar en competicións federadas nas súas comarcas e contribuíndo así á consolidación de equipos de base.
Malia a intensa calor, o pavillón encheuse de público para gozar das actuacións das numerosas alumnas, que ofreceron exercicios individuais, por parellas e en grupo, destacando pola súa beleza e dificultade técnica ao ritmo da música escollida. Ao remate, a concelleira Ana Rubal entregou medallas ás participantes, que tamén agradeceron o traballo e os valores transmitidos pola súa monitora, Lorena Fernández. Lémbrase que a festa de clausura das Escolas Deportivas terá lugar o luns 29 ás 19:00 horas, nun acto conxunto co Concello de Alfoz, no que haberá diversas actividades de celebración e a entrega de diplomas.
A cantante e instrumentista asturiana Mónica Acevedo actuará en formato solista, mentres que o equipo do local ofrecerá un menú especial con pratos como o tartar de xarda, gañador do “Ribadeo Sabe”, gazpachuelo de tempada, lomo de sardiña con berenxena afumada, cóctel de lagostinos, bonito de Burela con melocotón asado e sopa de cebola, e solombo de porco celta con xudías tenras. A cita comeza ás 21:15, con prazas limitadas e reserva imprescindible.
A xornada incluíu tamén o IV Torneo de Pádel, que continuará durante a fin de semana. O evento, organizado polo Concello xunto con ASAPA e Miño Vivo e coa colaboración da Xunta, recupera unha iniciativa nacida hai catro anos a petición da mocidade, coa intención de consolidala no tempo. O tenente de alcalde, Marcos García Lombardero, destacou a alta participación —catro veces maior ca na primeira edición— e agradeceu a implicación de entidades, colaboradores e asistentes, así como a presenza de representantes da Xunta, do Parlamento e da Deputación.
Adultos, nenos, familias, grupos de amizades fixeron o percorrido nun día espectacular de sol e cunha temperatura de 26º á hora da saída. Acudiron á cita o presidente provincial da AECC, José Manuel Rozas, o alcalde de Ribadeo, Dani Vega, as concelleiras e concelleiro ribadenses, Marta Saiz, Begoña Sanjurjo, Elena Sierra e Francisco José Silvent, a presidenta e o xerente de Acisa, Carmen Cruzado e Jesús Pérez, así como representantes da AECC de Ribadeo coa súa presidenta, Tea Martínez, á cabeza. A II Andaina Ribadeo en marcha contra o cancro contou co patrocinio de Solán e Acisa Ribadeo e coa colaboración do Concello de Ribadeo, Eroski e 2M.
Foi unha xornada máxica na que a música e a convivencia se deron a man nunha contorna única. Os instrumentos de corda encheron de melodías os xardíns do centro, creando unha atmosfera especial que emocionou ao público asistente e puxo en valor o talento e a ilusión da mocidade. A alcaldesa de Cervo, Dolores García Caramés, non quixo perderse esta cita tan especial e desfrutou da tarde xunto ás persoas usuarias, e o persoal do centro. Durante o encontro, agradeceu o convite e felicitou á organización por promover actividades que fomentan a cultura, a inclusión e os espazos de encontro entre a veciñanza.
